ޒިއުރިކް، ސްވިޒަލެންޑް (ޖޫން 10) - ނޭޝަންސް ލީގުގައި މިރޭ ކުޅުނު މެޗުތަކުން، ޗެކް ރިޕަބްލިކް 2-0 އިން ބަލިކޮށް ޕޯޗުގަލް ގްރޫޕްގެ ކުރިއަށް ޖެހިލިއިރު، ސްވިޒަލެންޑް އަތުން 1-0 އިން ކުރިހޯދައި، ސްޕެއިނުން މި ފަހަރުގެ މުބާރާތުގައި ފުރަތަމަ މޮޅު ހޯދައިފި އެވެ.
މިދިޔަ އަހަރުގެ ނޭޝަންސް ލީގުގެ ފައިނަލުގައި ފްރާންސް އަތުން ބަލިވި ސްޕެއިން މި ފަހަރުގެ މުބާރާްތް ފެށީ ޕޯޗުގަލް އާއި ޗެކް ރިޕަބްލިކާ ދެކޮޅަށް ކުޅުނު މެޗުތަކުން އެއްވަރުވެގެންނެވެ. ޕޯޗުގަލް ކައިރިން ފުރަތަމަ ލީޑުނަގާފައި ވީ އެއްވަރެވެ. ޗެކް ރިޕަބްލިކް އަތުން ބަލިވާން ދަނިކޮށް ފަހު ވަގުތު އެއްވަރުކުރީ އެވެ.
މިރޭގެ މެޗުން ސްޕެއިން މޮޅުވިއިރު، އެއް ވަނައިގައި އޮތީ ތިން މެޗުން ހަތް ޕޮއިންޓް ހޯދި ޕޯޗުގަލް އެވެ. ދެ ވަނަ ލިބެނީ ތިން މެޗުން ފަސް ޕޮއިންޓް ހޯދާފައިވާ ސްޕެއިން އެވެ. ތިން ވަަނައިގައި އޮތީ ތިން މެޗުން ހަތަރު ޕޮއިންޓާ އެކު ޗެކް ރިޕަބްލިކް އެވެ. ފުލުގައި އޮތް ސްވިޒަލެންޑަށް އަދި ޕޮއިންޓެއް ނުލިބެ އެވެ.
ސްޓޭޑް ޑީ ޖެނީވާގައި ކުޅުނު މިރޭގެ މެޗުގައި ސްޕެއިނުން ޖެހި ހަމައެކަނި ގޯލު ކާމިޔާބުކުރީ މެޗުގެ 13 ވަނަ މިނިޓްގައި ޕަބްލޯ ސަރާބިއާ އެވެ. މާކޯސް ލޮރެންޓޭ ގޯލު ކުރިމައްޗަށް ހުރަސްކޮށްލި ބޯޅަ ސަރާބިއާ ވަނީ ވެއްޓިގެންފައި ގޯލު ތެރެއަށް ފޮނުވާލައިފަ އެވެ. މެޗުގެ ރެފްރީ ސަރްދާރް ގޮޒްބުޔޫކް މި ގޯލު ބަލައިގަންނަން ނިންމީ ވީޑިއޯ އެސިސްޓަންްޓް ރެފްރީ (ވީއޭއާރް) އިން ވަރަށް ގިނަ އިރުތަކެއް ވަންދެން ބެލުމަށް ފަހު އެވެ.
މިރޭގެ މެޗުގައި ސްޕެއިންގެ ހަމައެކަނި ގޯލު ޖެހި ސަރާބިއާ މެޗުގެ ތެރެއިން ބޯޅަ ކޮންޓްރޯލްކުރަނީ.-- ފޮޓޯ: އޭއެފްޕީ
ސްޕެއިނާއި ސްވިޒަލެންޑަށް ވެސް މި މެޗުގައި ގޯލާ ސީދާކޮށް މާ ނުރައްކާތެރި ހަމަލާތަކެއް ފޮނުވާލެވޭ ގޮތެއްނުވި އެވެ. ސްޕެއިނުގެ މާކޯސް އަސެންސިއޯ ޖެހި ޝޮޓެއް ސްވިޒަލެންޑްގެ ޔެން ސޮމާ އަތަށް ނެގިއިރު، ސްވިޒަލެންޑްގެ ފޯވާޑް ހަރިސް ސެފެރޯވިޗް ޖެހި ބޯޅަ ސްޕެއިން ޑިފެންޑަރުން ވަނީ ބްލޮކްކޮށްފަ އެވެ.
ޗެކް ރިޕަބްލިކް ކޮޅަށް ޕޯޗުގަލް އިން ދެ ގޯލު ޖެހީ ވެސް ފުރަތަމަ ހާފުގަ އެވެ. ޕޯޗުގަލް އިން ފަސް މިނިޓް ތެރޭ ދެ ގޯލު ޖެހިއިރު، ދެ ގޯލަށް ވެސް ފުރުސަތު ތަނަވަސްކޮށްދިނީ މެޗުގެ މޮޅު ކުޅުންތެރިޔާ، ބެނާޑޯ ސިލްވާ އެވެ. އެ ގޮތުން މެޗުގެ 33 ވަނަ މިނިޓްގައި ޔާއޯ ކަންސޭލޯ ހަނި އޭންގަލުން ވައްދާލި ގޯލުން ޕޯޗުގަލް ލީޑުނެގި އެވެ.
ޕޯޗުގަލް އިން ފުރަތަމަ ގޯލު ޖެހިތާ ފަސް މިނިޓް ފަހުން، މެޗުގެ 38 ވަނަ މިނިޓްގައި ދެ ވަނަ ގޯލު ޖެހީ ފޯވާޑް، ގޮންކާލޯ ގުއޭޑޭޝް އެވެ. ބެނާޑޯ ސިލްވާ ދިން ބޯޅަ، ގުއޭޑޭޝް ވަނީ ގޯލުގެ ތިރީ ކަނަށް ފޮނުވާލައިފަ އެވެ.
ޕޯޗުގަލް އަކީ މި މުބާރާތުގެ އެންމެ ފުރަތަމަ ޗެމްޕިއަނެވެ. އެ ގޮތުން 2019 ވަނަ އަހަރު ޕޯޗުގަލް އިން މުބާރާތް ކާމިޔާބުކުރީ ފައިނަލުގައި ނެދަލެންޑްސް ބަލިކުރުމަށް ފަހު އެވެ. ނޭޝަންސް ލީގުގައި މިހާތަނަށް ކުޅުނު މެޗުތަކުން ޕޯޗުގަލް ބަލިވި ހަމައެކަނި މެޗަކީ މިދިޔަ އަހަރުގެ ގްރޫޕް ސްޓޭޖުގައި ފްރާންސް އަތުންނެވެ.
