ސީދާ ތިން ސެޓުން ޕޮލިސް ކްލަބް ބަލިކޮށް، ކްލަބް ވެމްކޯ އިން ވޮލީބޯލް އެސޯސިއޭޝަން ކަޕްގެ ތަށި ދިފާއުކޮށްފި އެެވެ.
އެންމެ ފަހުން 2019 ވަނަ އަހަރު ވީއޭއެމް އެސޯސިއޭޝަން ކަޕް ބޭއްވިއިރު، ވެެމްކޯ އިން ޗެމްޕިއަންކަން ހޯދީ ފައިނަލުގައި ޕޮލިސް 3-1 ސެޓުން ބަލިކޮށްގެންނެވެ. މި ފަހަރުގެ ފުރަތަމަ ސެމީގައި ވެމްކޯ އަށް ޕޮލިސް އަތުން މޮޅުވެވުނީ 3-2 ސެޓުންނެވެ. އެކަމަކު، މިރޭގެ ފައިނަލުގައި ޕޮލިހަށް މާ ބޮޑު ފުރުސަތެއް ނުދީ ވެމްކޯ ވަނި މެޗުން މޮޅުވެފަ އެވެ.
ވެމްކޯ އިން މިރޭގެ ފައިނަލް މެޗުގެ ސެޓުތައް ގެންދިޔައީ 25-20، 25-16 އަދި 25-12 އިންނެވެ.
ޒުވާނުންގެ މަރުކަޒު އެތެެރެ ކޯޓުގައި މިރޭ ކުޅުނު ފައިނަލުގައި ގިނަ ސަޕޯޓަރުންތަކެއްގެ ކުރިމަތީގައި ކުޅުނު މެޗު ޝަރަފްވެރިކޮށްދެއްވީ ރައީސް އިބްރާހިމް މުހައްމަދު ސޯލިހުގެ އަނބިކަނބަލުން، ފަޒްނާ އަހުމަދު އެވެ.
މިރޭގެ ފައިނަލް މެޗުގެ ފުރަތަމަ ޕޮއިންޓުން ފެށިގެން ވެމްކޯ ފެނުނީ ތަފާތު ރޫހެއްގައި ކުޅެލިތަނެވެ. އެ ޓީމުގެ ސެޓަރު، ޖޫޒާން ޒަރީރު ދޭ ބޯޅަތަކުގައި ޓީމުގެ އެޓޭކަރުން ކަމަށްވާ ތައިލެންޑްގެ ޕަޗަރަޕޯން ސިތިސާދު އާއި އައިޝަތު މާޖިދާ އަދި އައިމިނަތު އަރީޝާގެ ޝޮޓްތައް ވަރުގަދަކޮށް ފެނިގެންދިޔައިރު، ޕޮލިހަށް އެ އެޓޭކްތައް ހުއްޓުވަން މާ ބޮޑު ކަމެއް ނުކުރެވުނެވެ.
ފުރަތަމަ ސެޓުގައި ޕޮލިހުން ކޮންމެ ވެސް ވަރަކަށް ހަމަލާތައް ފޮނުވާލިއިރު، ވެމްކޯ އިން ސެޓު ނިންމާލީ 25-20 އިންނެވެ.
ދެން ކުޅުނު ދެ ސެޓުގައި ވެސް ވެމްކޯ އޮތީ ބޮޑު ލީޑެއްގަ އެވެ. ޕޮލިހުން ސެމީ ދެ މެޗު (ފުރަތަމަ ސެމީގައި ވެމްކޯއާ ދެކޮޅަށާއި ތިން ވަނަ ސެމީގައި އީގަލްސްއާ ދެކޮޅަށް) ކުޅެފައި އައުމުން އެ ޓީމުގެ ފަރާތުން ފަހު ދެ ސެޓުގައި ވަރުބަލިކަން ފެނިގެންދިޔަ އެވެ. ޕޮލިހުގެ ނޭޕާލް ކުޅުންތެރިޔާ، ކަމަނަ ބިސްޓާ އާއި ކެޕްޓަން، ހައްވާ ރާޝިދާ (ހައްވަ)ގެ އެޓޭކްތައް ޑިފެންސްކުރުމުގައި ވެސް ވެމްކޯ އިން މިރޭ ކާމިޔާބު ހޯދި އެވެ.
މުހައްމަދު ނަދީމް (ނަދީމްބެ)ގެ ކޯޗުކަމުގައި ކުޅުނު ޕޮލިހުގެ ޑިފެންސްގައި މިރޭ ގިނަ ގޯސްތަކެއް ހެދުނެވެ.
މެޗުގެ މޮޅު ކުޅުންތެރިއަކަށް ހޮވުނު ވެމްކޯގެ، ޕަޗަރަޕޯން އެކަނިމާ އެކަނި އަރައި ވެސް ޕޮލިހުގެ ބައެއް ހަމަލާތައް ބްލޮކްކުރިއިރު، ޖުމްލަކޮށް ބަލާއިރު، ވެމްކޯގެ ކޮންމެ ކުޅުންތެރިއަކު ވެސް ޓީމު ރޫހުގައި މޮޅު ކުޅުމެއް ދެއްކި އެވެ.
އައިޝަތު ނާޒިމާގެ ކޯޗުކަމުގައި ކުޅުނު ވެމްކޯ އިން ތަށި ހޯދީ ކުޅުނު ހުރިހާ މެޗަކުން މޮޅުވެގެންނެވެ. މުބާރާތުގެ މޮޅު ކޯޗުގެ މަގާމު ވެސް ލިބުނީ ނާޒިމާ އަށެވެ.
އަންހެން ޑިވިޝަންގެ ޑްރީމް ޓީމުގައި ހިމެނެނީ، ޕޮލިހުގެ ހައްވަ، އައިޝަތު ޝަހާ ޝާމިން، މަރިޔަމް އަޒުމާ، ވެމްކޯގެ އަރީޝާ، ހައްވާ ނާޒިމާ، ސިލްމާ ޒާހިރު އަދި ޖޫޒާން އެވެ. އެންމެ އުންމީދީ ކުޅުންތެރިއަކަށް ހޮވުނީ ވޮލީބޯލް ޔޫތު ނިއު ޖެނެރޭޝަންގެ ނަރީމާ އިދުރީސް (ނަންނި) އެވެ. މުބާރާތުގެ އެންމެ މޮޅު ކުޅުންތެރިއަކީ ވެމްކޯގެ މާޖިދާ އެވެ. އެންމެ މޮޅު ބިދޭސީ ކުޅުންތެރިއަކީ ވެމްކޯގެ ޕަޗަރަޕޯން އެވެ.
