އެންމެ ފަހުގެ ޗެމްޕިއަން ކްލަބް ވެމްކޯ ފައިނަލަށް ދިޔައީ މެޗަކުން ބަލިނުވެ އެވެ. މުބާރާތުގެ އެންމެ ކާމިޔާބު އެއް ޓީމު ޕޮލިސް ކްލަބް، ފައިނަލާ ހަމައަށް ކުރި ދަތުރުގައި ބަލިވީ ހަމައެކަނި ފުރަތަމަ ސެމީގައި ވެމްކޯ އަތުންނެވެ. ވެމްކޯ އިން މިރޭގެ ފައިނަލް މެޗު ތިން ސެޓުން ކާމިޔާބުކުރަން އަމާޒުހިފާފައިވާއިރު، ޕޮލިސް ވެސް އޮތީ ވަރުގަދަ ރޫހެއްގައި ތަށި ހޯދުމަށް ކުރެވުނު ހުރިހާ ކަމެއް ކުރަން ތައްޔާރަށެވެ.
ފުރަތަމަ ސެމީގައި ވެމްކޯ އިން ދެ ސެޓު ގެންގޮސްފައި ވަނިކޮށް ޕޮލިހުން އެއްވަރުކުރި އެވެ. ވެމްކޯ މޮޅުވީ ނަތީޖާ ނެރެން ކުޅުނު ފަސް ވަނަ ސެޓު ކާމިޔާބުކޮށްގެންނެވެ.
ސެމީ ފައިނަލު މެޗުގައި ކުރެވުނު ތަޖުރިބާގެ އަލީގައި އަމާޒަކީ ސީދާ ތިން ސެޓުން ޕޮލިސް ކުލަބު ބަލިކޮށް ވީއޭއެމް އެސޯސިއޭޝަން ކަޕްގެ ތަށި ދިފާއުކުރަން ބޭނުންވާ ކަމަށް ވެމްކޯގެ ކޯޗު އައިޝަތު ނާޒިމާ ވަނީ ބުނެފަ އެވެ.
ނާޒިމާ ބުނީ ޓީމާ މެދު 100 ޕަސެންޓު އިތުބާރު އެބައޮތް ކަމަށެވެ. ފައިނަލް މެޗަށް ނުކުންނަނީ ޕޮލިހަކީ ވަރުގަދަ ޓީމެއްގެ ގޮތުގައި ގަބޫލުކުރާ ކަމަށް ވެސް ނާޒިމާ ވަނީ ބުނެފަ އެވެ. ޕޮލިހުގައި ހުރީ ތަޖުރިބާކާރު ކޯޗެއް ކަމަށާއި، ސެމީ ފައިނަލު މެޗުގައި އެކަން ފެނުނު ކަމަށް ނާޒިމާ ބުންޏެވެ.
ސެމީގެ މެޗަކީ ސީދާ ތިން ސެޓުން ވެމްކޯ އަށް މޮޅުވެވޭނެ މެޗެއް ކަމަށާއި، ފަސް ސެޓަށް މެޗު ދިޔައީ ކުޅުންތެރިންނަށް ހެދުނު ގޯސްތަކެއްގެ ސަބަބުން ކަމަށް ނާޒިމާ ބުންޏެވެ. އެކަން މިރޭގެ ފައިނަލުގައި ތަކުރާރުވިޔަ ނުދޭން ނާޒިމާ ހުރީ އަމާޒުހިފައިގެންނެވެ. ކުޅުންތެރިންނަށް ވިސްނައިދެނީ ވެސް އެ ގޮތަށެވެ.
"ޓީމާ މެދު 100 ޕަސެންޓް އިތުބާރު އެބައޮތް. ގަބޫލުކުރަން ޕޮލިހަކީ ވަރުގަދަ ޓީމެއްކަން، އެ ޓީމްގައި ހުރީވެސް ތަޖުރިބާކާރު ކޯޗެއް. އެކަން އެނގިގެން ނުކުންނާނީ. ޔަގީންކަން އެބައޮތް ޓީމާ މެދު. ސެމީގައި ވަރަށް މަސައްކަތްކޮށްގެން ފައިނަލަށް ދިޔައީ. އެކަމަކު އަމާޒަކީ ފައިނަލުގައި ސީދާ ތިން ސެޓުން މޮޅުވެ ތަށި ހޯދުން." ކުރިން ވޮލީ ކުޅުންތެރިއެއްގެ ގޮތުގައި ގިނަ ކާމިޔާބީތަކެއް ހޯދާފައިވާ ނާޒިމާ ބުންޏެވެ.
ނާޒިމާ ބުނީ މެޗަކުން ބަލިނުވެ، ކުޅުންތެރިން ތިބީ ރަނގަޅު ފޯމެއްގައި ކަމަށެވެ. ހުރިހާ މެޗެއްވެސް އެއް ފޯމެއްގައި ފަސޭހަ ނުކޮށް ކުޅެފައިވުމަކީ ފައިނަލަށް ނުކުންނައިރު، ޓީމާ މެދު އިތުރަށް ޔަގީންކަން ބޮޑުވާ ސަބަބެއްގެ ގޮތުގައި ނާޒިމާ ފާހަގަކުރި އެވެ.
"އަސްލުގައި ކުޅުންތެރިން މިއަދާ ހަމައަށް ވެސް އައީ އެއްވެސް މެޗެއް އީޒީނުކޮށް ވަރަށް ފަރުވާތެރިވެގެން ކުޅުނީ. ސެމީގައި ފަސް ސެޓަށް ދިޔަސް، މިސްޓޭކްތައް ރަނގަޅުކޮށް އިތުބާރާ އެކު އެ ކުޅުނީ. ފައިނަލަށް ނުކުންނައިރު، އެއީ ވަރަށް ބޮޑު ހިތްވަރަކަށްވާނެ،" ނާޒިމާ ބުންޏެވެ.
ފުރަތަމަ ސެމީގައި ވެމްކޯ އަތުން ބަލިވެ، ޕޮލިސް ފައިނަލުގެ ފުރުސަތު ހޯދަން ކުޅެން ޖެހުނީ ތިން ވަނަ ސެމީގައި ކްލަބް އީގަލްސްއާ އެެވެ. އީގަލްސް އަތުން ޕޮލިސް މޮޅުވީ 3-1 ސެޓުންނެވެ.
ޕޮލިސް ކުލަބުގެ ކޯޗު މުހައްމަދު ނަދީމް (ނަދީމްބެ) ބުނީ ސެމީ ފައިނަލު ފުރަތަމަ މެޗުގައި ވެމްކޯއާ ދެކޮޅަށް ވަރަަށް ވަރުގަދައަށް ކުޅެފައި ޖެހިގެން އައި ދުވަހު ތިން ވަނަ ސެމީގައި އީގަލްސްއާ ކުޅެން ޖެހުމުން ޓީމުން ވަރުބަލިކަން ފެނުނު ކަމަށެވެ. ނަމަވެސް އީގަލްސް ބަލިކޮށް ފައިނަލަށް ދެވުމަކީ ހުރިހާ ކުޅުންތެރިން ކުރި ބުރަ މަސައްކަތުގެ ނަތީޖާ ކަމަށް ނަދީމްވެ ވަނީ ފާހަގަކޮށްފަ އެވެ.
"އަޅުގަނޑުމެންނަށް ފާހަގަކުރެވުނީ ކުޅުންތެރިންގެ މަސައްކަތް. އެއީ ވަރުގަދަ ޓީމަކާއި ދެކޮަޅަށް ފަސް ސެޓު ކުޅެފައި މި މެޗަށް (ތިން ވަނަ ސެމީ އަށް) މި އައީ. އެ ވަރުބަލިކަމާ އެކު މި މެޗަށް ނުކުމެ ކުދިން ކުރި މަސައްކަތުން މޮޅުމިވީ. ވަރުބަލި ކަންމަތީގައި ފަސޭހަކޮށްލިނަމަ މި މެޗު ވަރަށް ޓަފްވީސް އޭ ބުނެވޭނީ." ގައުމީ ލެވަލްގައި ތަޖުރިބާ ބޮޑު ކޯޗު ނަދީމްބެ ބުންޏެވެ.
ނަދީމްބެ ބުނީ ފައިނަލަށް ނުކުންނައިރު ކުޅުންތެރިން އަރާމުކުރަން އަދި ރިކަވަރީއަށް ވަގުތުކޮޅެއް ލިބުމަކީ ލިބޭ ހިތްހަމަޖެހުމެއް ކަމަށެވެ. އޭނާ ބުނީ ފުރަތަމަ ސެމީގައި ވެމްކޯ އަތުން ބަލިވި މެޗުގައި ފެށުން ދިޔައީ ގޯސްކޮށް ކަމަށެވެ. އެކަމުން އިބުރަތް ނަގައި، ފޯކަސް ރަނގަޅަށް ބަހައްޓައިގެން ފަހުން މެޗުޔަކުގައި ހެދުނު ގޯސްތައް ރަނގަޅުކޮށްގެން ފައިނަލުގައި ކުޅެން މަސައްކަތް ކުރާނެ ކަމަށް ނަދީމްބެ ވަނީ ބުނެފަ އެވެ.
"މި މުބާރާތުގައި އަޅުގަނޑުމެން މި ވިސްނަނީ މެޗަކަށް ފަހު މެޗެއް. އެހެންވީމަ ޕްރެޝަރު ހޭންޑްލްކުރުމާއި ކަންކަމަށް ބަލާއިރު، ކުދިން ވަރަށް ރަނގަޅަށް ހޭނިފައި އެ ތިބީ. އެ ގޮތަށް ވަރަށް ރަނގަޅަށް ތައްޔާރުވެފައި މި ތިބީ. އިރާދަކުރެއްވިޔާ، ފައިނަލް މެޗު ކާމިޔާބުކުރުން އަމާޒަކީ" ނަދީމްބެ ބުންޏެވެ.
އެންމެ ފަހުން އެސޯސިއޭޝަން ކަޕް އޮތީ 2019 ވަނަ އަހަރުގަ އެވެ. އެ މުބާރާތުގައި ފައިނަލުގައި ވެމްކޯ އިން ވަނީ ޕޮލިހުގެ މައްޗަށް 3-1 ސެޓުން ކުރި ހޯދާ ފައެވެ. ވެމްކޯ އާއި ޕޮލިސް ވާދަކުރާ އެސޯސިއޭޝަން ކަޕްގެ ފައިނަލް މެޗު ފަށާނީ މިރޭ 20:15 ގަ އެވެ.
