ރާއްޖޭގެ ބެޑްމިންޓަން ކްލަބް، ރިވައިވަލް ސްޕޯޓްސް ކްލަބުން މެލޭޝިއާގައި މިހާރު ކުރިއަށްގެންދާ ޓްރެއިނިން ޓުއާގައި ކުޅުނު ފުރަތަމަ މެޗުތަކުގައި ރަނގަޅު ކާމިޔާބެއް ހޯދައިފި އެވެ.
މި މަހުގެ ފަސް ވަނަ ދުވަހުން ފެށިގެން ހަތް ދުވަހު މުއްދަތަށް މެލޭޝިއާގައި ކުރިއަށްގެންދާ ޓްރެއިނިން ކޭމްޕްގައި ރިވައިވަލް އިން ބައިވެރިވަނީ ގައުމީ ޗެމްޕިއަންކަން ހޯދާފައިވާ އަހުމަދު ތޯއިފް، ޒަޔާން ޒަކީގެ އިތުރުން ގައުމީ ޓީމަށް މީގެ ކުރިން ކުޅެފައިވާ ރިޝްވާން ޝިޔާމްގެ އަދި އަރަމުން އަންނަ ބެޑްމިންޓަން ކުޅުންތެރިޔާ، ހައިޝަމް އިބްރާހިމް އަދި ރިވައިވަލްގެ ކޯޗު ނަޝްފާން މުހައްމަދު އެވެ.
ޓްރެއިނިން ކޭމްޕްގެ ފުރަތަމަ ދެ ދުވަހު ރިވައިވަލް އިން ވަނީ މެލޭޝިއާގެ ނިއު ވިޝަން އެކެޑަމީއާ ދެކޮޅަށް މެޗުތަކެއް ކުޅެފަ އެވެ. މިއަދު ކުޅުނު މެޗުތަކަށް ބަލާއިރު، ރިވައިވަލް އިން ވަނީ އަށް މެޗުގެ ތެރެއިން ހަތަރު މެޗުން މޮޅުވެފަ އެވެ. ޒަޔާން ދެ މެޗުން މޮޅުވިިއިރު، ތޯއިފާއި ހައިޝަމް ވެސް ވަނީ މެޗަކުން މޮޅުވެފަ އެވެ.
މޮރިޝަސް ގައުމީ ޓީމުގެ ދެ ކުުޅުންތެރިން ވެސް މެލޭޝިއާގައި ޓްރެއިނިން ކޭމްޕް ފުރިހަމަކުރަމުން އެބަދެ އެވެ. އެންމެ ފަހުން، 2019 ވަނަ އަހަރު ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ރިހި މެޑަލް ހޯދި ޖީން ބެނާޑް ބޮންގޯއާ ދެކޮޅަށް ރާއްޖޭގެ ރިޝްވާން ރަނގަޅު ކުޅުމެއް ދެއްކިއިރު، ސެޓުތައް ނިމުނީ 21-18، 21-16 އިންނެވެ. މޮރިޝަސްގެ ހަތަރު ވަނަ، ތޭޖްރަޖް ޕުލްޓޫއާ ވާދަކޮށް ރާއްޖޭގެ ޒަޔާން މޮޅުވީ 21-07، 21-09 އިންނެވެ.
ރިވައިވަލް ސްޕޯޓްސް ކްލަބުން މެލޭޝިއާގައި ކުރިއަށްގެންދާ ޓްރެއިނިން ކޭމްޕްގެ ތެރެއިން.--- ފޮޓޯ: ރިވައިވަލް ސްޕޯޓްސް ކްލަބް
ނިއު ވިޝަން ޓީމާ އެކު ލިބުނު ތަޖުރިބާ އަށް ފަހު ރިވައިވަލް އިން ދެން ޓްރެއިިނިން ޓުއާގައި ދެން ކުޅޭނީ މެލޭޝިއާގެ އެކި ކްލަބްތަކާ ދެކޮޅަށެވެ.
ޓްރެއިނިން ކޭމްޕް ދިއުމުގެ ކުރިން ރިވައިވަލްގެ ކޯޗު ނަޝްފާން، "އަދަދު" އަށް ބުނީ މި ޓުއާގެ ބޭނުމަކީ ރިވައިވަލްގައި ތިބި ކުޅުންތެރިން ކުރިއަށް ހުރި، ބައިނަލްއަގުވާމީ މުބާރާތްތަކަށް ތައްޔާރުކުރުމުގެ ގޮތުން، ވަރުގަދަ ކޮމްޕެޓިޓިވް މެޗުތަކަށް ހޭނިފައި ބެހެއްޓުން ކަމަށެވެ.
މިއީ އަންނަ އަހަރުގެ އައިއޯއައިޖީ އަށް ތައްޔާރުވުމުގެ ޕްލޭނާއި މި އަހަރު ރާއްޖެ އާއި ޕާކިސްތާންގައި ބާއްވަން ނިންމާފައިވާ އިންޓަނޭޝަނަލް މުބާރާތްތަކުގައި ރަނގަޅު ކާމިޔާބެއް ހޯދަން ރިވައިވަލް އިން ހޯދާ މުހިންމު މެޗު ތަޖުރިބާތަކެއް ކަމަށް ވެސް ނަޝްފާން ވަނީ ބުނެފަ އެވެ.
