ވޮލީބޯލް އެސޯސިއޭޝަން ކަޕްގެ ތިން ވަނަ ސެމީ ފައިނަލުގައި މިރޭ ޕޮލިސް ކްލަބާ ދެކޮޅަށް ކްލަބް އީގަލްސް އަށް މޮޅެއް ހޯދޭނީ ޓީމެއްގެ ގޮތުގައި ވަރަށް ރަނގަޅަށް ކުޅެގެން ކަމަށް އީގަލްސްގެ ކޯޗު، މުނާ މުނީރު (މުންނަ) ބުނެފި އެވެ.
އެސޯސިއޭޝަން ކަޕްގެ އަންހެން ޑިވިޝަނުގެ ފުރަތަމަ ސެމީގައި ރޭ ކްލަބް ވެމްކޯ އަތުން 3-2 ސެޓުން ޕޮލިސް ބަލިވެ، އެ ޓީމުން ތިން ވަނަ ސެމީ ފައިނަލުގައި ކުޅެން ޖެހުނީ އީގަލްސްއާ އެވެ. އީގަލްސް އިން ރޭ ވަނީ ދެ ވަނަ ސެމީ ފައިނަލުގައި ފަސޭހަކަމާ އެކު ކްލަބް ވޮލީބޯލް ތިން ސެޓުން ބަލިކޮށްފަ އެވެ.
މެޗަށް ފަހު, "އަދަދު" އަށް މުންނަ ބުނީ ކްލަބް ވޮލީބޯލް އަތުން މޮޅުވެވޭނެ ކަމުގެ ޔަގީންކަން އޮތުމުން ރޭގެ މެޗުގައި ކުޅުނީ ވަރަށް ބޮޑަށް ރެސްޓްކުރެވޭ ގޮތަށް ބަލައިގެން ކަމަށެވެ. އެ ގޮތުން ރޭގެ މެޗަށް ޓީމު ރޭވިއިރު ވެސް މުންނަގެ ފޯކަސް ބޮޑަށް އޮތީ ތިން ވަނަ ސެމީ އަށެވެ.
"ޕޮލިހަށް އިންނާނެ އެޑްވާންޓޭޖަކީ އެ މީހުން އޭޒް އަ ޓީމް (ޓީމެއްގެ ގޮތުގައި) ވަރަށް ގިނަ ދުވަސްތަކެއްވެއްޖެ ހަމަ މި މުބާރާތަށް ތައްޔާރުވާތާ، އެކަމަކު، އީގަލްސްގައި މި އޮތީ ޓޫ ވީކްސް އިން (ދެ ހަފްތާ އިން) ފޯމް ކޮށްލި ޓީމެއް، އެކަމަކު، ތަޖުރިބާއާ އެކު ވަރަށް ރަނގަޅަށް މެނޭޖް އެބަކުރޭ، އެހެންވީމަ އަޅުގަނޑުމެން ވެސް ފޯރި ނަގާފައި، ޓީމް ވޯކް ދައްކައިފިއްޔާ، އިރާދަކުރެއްވިއްޔާ މޮޅުވެވޭނެ ޕޮލިސް ކައިރިން ވެސް،" މުންނަ ބުންޏެވެ.
އީގަލްސް އިން ޓީމު އެކުލަވާލިއިރު، އެންމެ ބޮޑު ގޮންޖެހުމަކަށް ދިމާވީ ސެންޓަ ބްލޮކަރެއް ނެތުމުން ކަމަށް މުންނަ ވަނީ ބުނެފަ އެވެ. އަދި މެޗުތައް ދާގޮތުން ވެސް އެ އުނދަގޫ ކުރިމަތިވާ ކަމަށް މުންނަ ފާހަގަކުރި އެވެ.
"މި ޓީމުގައި ވާގޮތަކީ، ސެންޓަ ބްލޮކަރެއް އެކަކު، ހަމަ މަދު، އެހެންވެ، އަޅުގަނޑުމެންގެ އައުޓްސައިޑް އެޓޭކަރެއް މި ކުޅެނީ ސެންޓަ ބްލޮކަރަކަށް،" މުންނަ ބުންޏެވެ.
ގްރޫޕް ސްޓޭޖުގައި ޕޮލިހުން ވަނީ އީގަލްސް އަތުން ސީދާ ތިން ސެޓުން މޮޅުވެފަ އެވެ.
ރޭގެ މެޗުގެ ތެރެއިން ޕޮލިހުގެ ކޯޗު ނަދީމްބެ: ޕޮލިސް އަށް ފައިނަލަށް ދެވޭނެ ކަމުގެ އުންމީދު އެބައޮތް ކަމަށް ނަދީމްބެ ވަނީ ބުނެފައި.-- ފޮޓޯ: މުހައްމަދު ޝާބިން/ އަދަދު
ފައިނަލަށް ދެވޭނެ ކަމުގެ އުންމީދު ޕޮލިހަށް ބޮޑު
ސެމީ މެޗަށް ފަހު ޕޮލިހުގެ ކޯޗު މުހައްމަދު ނަދީމް (ނަދީމްބެ)، "އަދަދު" އަށް ބުނީ ވެމްކޯ އަތުން ބަލިވުމުގެ އެންމެ ބޮޑު ސަބަބަކީ ރަނގަޅަށް ނުފެށުން ކަމަށެވެ. އަދި ފުރަތަމަ ސެޓުތަކުގައި ހެދުނު ގޯސްތައް ރިކަވާނުވެގެން ފަހު ސެޓުގައި ވެސް އުޅެން ޖެހުނު ހާލަތުތައް އައި ކަމަށް ނަދީމްބެ ވަނީ ބުނެފަ އެވެ.
"އަޅުގަނޑުމެންގެ އެބަހުރި ރަނގަޅު ކުރަން ޖެހޭ ކަންކަން، އެކަމަކު، ބައެއް ވަގުތު އެބަހުރި އެކަންކަން ވަރަށް ރަނގަޅަށް ކޮށްފައި ވެސް އެކަމަކު، ކޮންސިސްޓަންޓްކޮށް އެކަން ނުކުރެވިގެން ފުރުސަތުތަކެއް ގެއްލިގެންދިޔަ އޯވަރޯލްކޮށް ދަންނަވަންޖެހޭނީ ކުޅުންތެރިން ކުޅުނުލެއް ވަރަށް ރަނގަޅޭ. އެކަމަކު، އޭތި ގިނަ ވަގުތު ހިފަހައްޓައިލެވުނު ނަމަ މި އަށް ވުރެ ރަނގަޅަށް ވެސް ކުޅެވުނިސް،" ނަދީމްބެ ބުންޏެވެ.
ރަނގަޅު ވާދަވެރި މެޗެއް ވެމްކޯއާ އެކު ނިންމާލެވުނުއިރު، ނަދީމްބެ ހުރީ ތިން ވަނަ ސެމީގައި އީގަލްސް އަތުން މޮޅުވެގެން ފައިނަލަށް ދިއުމުގެ އަޒުމުގަ އެވެ.
"އަޅުގަނޑުމެންގެ ކުޅުންތެރިންގެ އެބަހުރި އެ އަޒުމު. ކާމިޔާބަށް އެދި އެ މަސައްކަތް ކުރާ އެ އަޒުމު އެބަހުރި، މި ކުދިން ފަހަތަކަށް ނުޖެހޭނެ، ދެން އޮތް މެޗު ވެސް ކާމިޔާބުކޮށްގެން، އިންޝާﷲ ފައިނަލަށް ދިއުމުގެ އަޒުމުގައި ތިބީ އިރާދަކުރެއްވިއްޔާ،" ނަދީމްބެ ބުންޏެވެ.
އެންމެ ފަހުން އެސޯސިއޭޝަން ކަޕްގެ އަންހެން ޑިވިޝަން 2019 ވަނަ އަހަރު ބޭއްވިއިރު، ޕޮލިސް ބަލިކޮށް ތަށި އުފުލާލީ ވެމްކޯ އެވެ.
މި ފަހަރުގެ ފައިނަލް އަންނަ ބުރާސްފަތި ދުވަހުގެރޭ ކުޅޭއިރު، ވެމްކޯއާ ދެކޮޅަށް ފައިނަލުގައި ކުޅޭނެ ޓީމެއް އެނގޭނީ މިރޭ ކުޅޭ ތިން ވަނަ ސެމީ ފައިނަލް މެޗަށް ފަހު އެވެ. އީގަލްސް އާއި ޕޮލިސް ކުޅޭ ތިން ވަނަ ސެމީ ފައިނަލް މެޗު އޮތީ ޒުވާނުންގެ މަރުކަޒު އެތެރެ ކޯޓުގައި މިރޭ 20:15 ގަ އެވެ.
