ސްޕްލިޓް، ކްރޮއޭޝިއާ (ޖޫން 6) - ޔުއެފާ ނޭޝަންސް ލީގުގެ އެންމެ ފަހުގެ ޗެމްޕިއަން ފްރާންސް މިރޭ ކުޅުނު މެޗުން ކްރޮއޭޝިއާއާ 1-1 އިން އެއްވަރުވެއްޖެ އެވެ.
މިދިޔަ އަހަރު ސްޕެއިން ބަލިކޮށް ނޭޝަންސް ލީގުގެ ޗެމްޕިއަންކަން ހޯދި ފްރާންސް މި ފަހަރުގެ މުބާރާތް ފަށަން ޖެހުނީ މިދިޔަ ހަފްތާގައި އަމިއްލަ ދަނޑުގައި ޑެންމާކް އަތުން 2-1 އިން ބަލިވެގެންނެވެ. ޑެންމާކާ ދެކޮޅަށް ފްރާންސް ފުރަތަމަ ގޯލު ޖެހި ނަމަވެސް ލީޑު ނުހިފެހެއްޓުނެވެ. އެކަން މިރޭގެ މެޗުގައި ވެސް ތަކުރާރުވި އެވެ. ފުރަތަމަ ގޯލު ޖަހައި، ފްރާންސް އިން ލީޑުނެގި ނަމަވެސް ހިފަހައްޓައިނުލެވުނީ އެވެ.
ފްރާްންސްގެ ކޯޗު ޑިޑިއޭ ޑެޝޯމްޕްސް މިރޭގެ މެޗު ކުޅުނީ ޓީމުގެ މުހިންމު ގިނަ ކުުޅުންތެރިން ނުލަ އެވެ. އެ ގޮތުން ޓީމުގެ ކެޕްޓަން، ގޯލްކީޕަރު، ހޫގޯ ލޮރީސް އާއި މުހިންމު ދެ ފޯވާޑުން ކަމަށްވާ ކީލިއަން އެމްބާޕޭ އާއި ކަރިމް ބެންޒެމާ ނުކުޅެ އެވެ.
މި މެޗުގައި ފްރާންސް އިން ލީޑުނެގީ 51 ވަނަ މިނިޓްގައި، އޭޑްރިއަން ރަބިއޯ ޖެހި ގޯލުންނެވެ. މި މެޗުގައި ފްރާންސްގެ ކުރިއަށް ކުޅުނު ވިސާމް ބެން ޔެޑާ ހުސްކޮށްލާފައި ދިން ބޯޅަ ހިފައިގެން އޭރިއާތެރެއަށް ވަދެ، ރަބިއޯ ވަނީ ގޯލުގެ ކައިރީ ކަނަށް ބޯޅަ ފޮނުވާލައިފަ އެވެ.
ކްރޮއޭޝިއާ އިން އެއްވަރުކުރީ މެޗު ނިމެން ހަތް މިނިޓަށް ވެފައި ވަނިކޮށް ލިބުނު ޕެނަލްޓީ އަކުން އަންޑްރެއި ކްރަމަރިޗް ޖެހި ގޯލެކެވެ. މި ޕެނަލްޓީ ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ. އެއީ އެޓޭކް ފެށިއިރު، ކްރޮއޭޝިއާގެ އެއްވެސް ކުޅުންތެރިއަކު އޮފްސައިޑްވެފައިވޭތޯ ކަށަވަރުކުރުމަށް ފަހު އެވެ.
މެޗުން މޮޅުވާން ވެސް ފުރުސަތު ތަނަވަސްކުރި ކްރޮއޭޝިއާ ޓީމުން އުފެއްދި ހަމަލާތަކުގެ ހުރަހަކަށްވީ ފްރާންސް ގޯލުގައި ހުރި ކީޕަރު މައިކް މައިގްނޯން އެވެ. އޭސީ މިލާނުގައި މި ސީޒަނުގައި މޮޅަށް ކުޅުނު މައިގްނޯން ވަނީ ކްރޮއޭޝިއާގެ ކުޅުންތެރިން ފޮނުވާލި ރަނގަޅު ހަމަލާތަކެއް ހުއްޓުވައިފަ އެވެ.
މިރޭގެ މެޗަކީ ކްރޮއޭޝިއާގެ ކެޕްޓަން ލޫކަ މޮޑްރިޗް، 36، އެ ޓީމަށް ކުޅެދިން 150 ވަނަ މެޗެވެ. މި ވަގުތު ކުޅެމުން އަންނަ ކުޅުންތެރިންގެ ތެރެއިން ގައުމީ ޓީމަށް އެންމެ ގިނަ މެޗު ކުޅުމުގެ ރެކޯޑް އޮތީ މޮޑްރިޗް އަތުގަ އެވެ.
ފްރާންސް ދެން ކުޅޭ މެޗުގައި ނުކުންނާނީ ތިން ދުވަސް ފަހުން ރަށުންބޭރުގައި އޮސްޓްރިއާއާ ދެކޮޅަށެވެ. އޮސްޓްރިއާ އިން ވަނީ ފުރަތަމަ މެޗުގައި 3-0 އިން ކްރޮއޭޝިއާ ދަނޑުގައި މޮޅުވެފަ އެވެ. މެންޗެސްޓާ ޔުނައިޓެޑްގެ ކޯޗުކަމާއި އެ ކްލަބްގެ ކޮންސަލްޓަންޓްގެ މަގާމު ދޫކޮށްލުމަށް ފަހު މި ވަގުތު އޮސްޓްރިއާއާ ހަވާލުވެގެން ހުރި ރަލަފް ރަންގްނިކް ކޯޗުކަމުގައި ކުޅުނު ދެ ވަނަ މެޗުން އެ ޓީމު ވަނީ ބަލިވެފަ އެވެ. އަމިއްލަ ދަނޑުގައި ޑެންމާކް އަތުން އޮސްޓްރިއާ ބަލިވީ 2-1 އިންނެވެ.
ނޭޝަންސް ލީގުގެ އެއް ވަނަ ޑިވިޝަނުގެ ގްރޫޕް އޭގައި ފުރަތަމަ ދެ މެޗުން މޮޅުވެ، ހަ ޕޮއިންޓާ އެކު ޑެންމާކް އޮތީ އެއް ވަނައިގަ އެވެ. ދެ ވަނައިގައި އޮތީ ދެ މެޗުން ތިން ޕޮއިންޓާ އެކު އޮސްޓްރިއާ އެެވެ. ތިން ވަނައިގައި އެއް ޕޮއިންޓާ އެކު ފްރާންސް އޮތްއިރު، ފުލުގައި އޮތް ކްރޮއޭޝިއާ އަށް ވެސް ލިބިފައިވަނީ ޕޮއިންޓެކެވެ.
