އެފްއޭއެމުން މިހާރު ކުރިއަށްގެންދާ 16 އަހަރުން ދަށުގެ ޔޫތު ޗެމްޕިއަންޝިޕްގައި މިއަދު ހަވީރު ކުޅުނު މެޗުން ކްލަބް އީގަލްސް 1-0 އިން ބަލިކޮށް ކްލަބް ވެލެންސިއާ މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.
ތިން ޓީމު ވާދަކުރާ ގްރޫޕް ބީގެ ފުރަތަމަ މެޗުން ވެލެންސިއާ ވަނީ 10-1 އިން ދަ ގްރާންޑޭ ބަލިކޮށްފަ އެވެ. އެ ގްރޫޕްގެ ދެ ވަނަ މެޗުގައި ވެލެންސިއާ މިއަދު މޮޅުވިއިރު، އެ ޓީމު ސެމީ އަށް ދާނީ މި ގްރޫޕްގެ އެއް ވަނަ ޓީމުގެ ގޮތުގަ އެވެ. މި ގްރޫޕްގެ ފަހު މެޗުގައި ދަ ގްރާންޑޭ އާއި އީގަލްސް ކުޅޭނީ އަންނަ ބުރާސްފަތި ދުވަހު ހަވީރު އެވެ. އެ މެޗުން މޮޅުވާ ޓީމަކަށް މި ގްރޫޕްގެ ދެ ވަނައިގެ ގޮތުގައި ސެމީގެ އަނެއް ޖާގަ ލިބޭނެ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފެށިގެން ވެލެންސިއާ އިން ދިޔައީ އީގަލްސް ފަހަތަށް ބާރުބޮޑުކުރަމުންނެވެ. އެ ގޮތުން ވެލެންސިއާ އިން ފޮނުވާލި ދެ ހަމަލާއެއް ވަނީ ގޯލުގެ ދަނޑިއަށް އަމާޒުވެފަ އެވެ. ވެލެންސިއާގެ ކެޕްޓަން، މުހައްމަދު ޖޫދު އަޝްފާގު ޖެހި ދެ ބޯޅައެއް އީގަލްސް ޑިފެންޑަރުން ވަނީ ބްލޮކްކޮށްފަ އެވެ. ފުރަަތަމަ ހާފުގައި ވެލެންސިއާގެ ތިން ކުޅުންތެރިން ކައިރިން ދެމިގަތުމަށް ފަހު އޭރިއާތެރެއަށް ވަދެ، އީގަލްސްގެ އަހުމަދު އަފްލާޒް ޖެހި ބޯޅަ ވެލެންސިއާގެ ކީޕަރު އަބްދުﷲ ރަޒީފް ވަނީ މަތަކޮށްފަ އެވެ.
ޔޫތު ޗެމްޕިއަންޝިޕްގައި މިއަދު ހަވީރު ވެލެންސިއާ އާއި ކްލަބް އީގަލްސް ކުޅުނު މެޗުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
ކުރީގެ މަޝްހޫރު ކުޅުންތެރިޔާ އާދަމް އަބްދުއްލަތީފް (ލައްޗޭ)ގެ ކޯޗުކަމުގައި ކުޅޭ ވެލެންސިއާ އިން މޮޅުވި ގޯލު ޖެހީ މެޗުގެ 64 ވަނަ މިނިޓްގަ އެވެ. އީގަލްސްގެ ހާފުގެ މެދެއްހާ ހިސާބުގައި ހުރެފައި، ވެލެންސިއާގެ މިޑްފީލްޑަރު، އަހުމަދު ހަމްދާން އަޒްލީން ޖެހި ބޯޅަ އަމާޒުވީ ގޯލުގެ މަތީ ކަނަށެވެ. އެ ބޯޅަ ހުއްޓުވަން، އީގަލްސްގެ ކީޕަރު، މުހައްމަދު ރައްޔާނަށް ކުރެވޭނެ ކަމެއް ނެތެވެ.
ލީޑުފުޅާކުރަން ވެލެންސިއާ އަށް ލިބުނު ފުރުސަތުގައި ގޯލެއް ޖެހޭގޮތެއްނުވި އެވެ.
ވެލެންސިއާގެ އިތުރުން ސެމީ ފައިނަލުގެ ޖާގަ ދެން ލިބިފައި އޮތީ ގްރޫޕް އޭގެ އެއް ވަނައިގައި އޮތް ޓީސީ ސްޕޯޓްސް ކްލަބް އަށެވެ. ޓީސީން ވަނީ މާޒިޔާ ސްޕޯޓްސް އެންޑް ރެކްރިއޭޝަނާއި ސުޕަ ޔުނައިޓެޑް ސްޕޯޓްސް (ސަސް) ބަލިކޮށް، ބާކީ އެއް މެޗު އޮއްވައި ސެމީން ފުރުސަތު ހޯދައިފަ އެވެ.
ޔޫތު ޗެމްޕިއަންޝިޕްގެ މެޗުތައް ދެން ކުޅޭނީ ބުދަ ދުވަހު އެވެ. އެ ދުވަހު ހަވީރު ޓީސީ ކުޅޭނީ ޔުނައިޓެޑް ވިކްޓްރީ (ޔޫވީ)އާ އެވެ. އެރޭ ކުޅޭ މެޗުގައި މާޒިޔާ ބައްދަލުކުރާނީ ސަސްއާ އެެވެ.
