އެފްއޭއެމް 16 އަހަރުން ދަށުގެ ޔޫތު ޗެމްޕިއަންޝިޕްގައި މިއަދު ހަވީރު ކުޅުނު ސެމީ ފައިނަލް ފުރަތަމަ މެޗުން ފަަސޭހަކަމާ އެކު 4-0 އިން ކްލަބް އީގަލްސް ބަލިކޮށް ޔުނައިޓެޑް ވިކްޓަރީ (ޔޫވީ) މުބާރާތުގެ ފައިނަލުން ފުރުސަތު ހޯދައިފި އެވެ.
ގްރޫޕް ސްޓޭޖު ނިމުނުތާ ދެ ހަފްތާއެއްހާ ދުވަސް ފަހުން ސެމީ ފައިނަލް މެޗުތައް ކުޅޭއިރު، އަންނަ އާދިއްތަ ދުވަހުގެރޭ ކުޅޭ ފައިނަލުގައި ޔުނައިޓެޑް ވިކްޓަރީ ކުޅެން ޖެހޭނީ ދެ ވަނަ ސެމީ ފައިނަލުގައި މިރޭ ކްލަބް ވެލެންސިއާ އާއި ޓީސީ ސްޕޯޓްސް ކްލަބް ކުޅޭ މެޗުން މޮޅުވާ ޓީމަކާ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ފުރަތަމަ 13 މިނިޓް ތެރޭ ޔުނައިޓެޑް ވިކްޓަރީން ވަނީ އީގަލްސް ކޮޅަށް ތިން ގޯލު ޖަހައިފަ އެވެ. މި ތިން ގޯލުގައި ވެސް ޔުނައިޓެޑް ވިކްޓަރީން ފައިދާނަގާފައިވަނީ އީގަލްސްގެ ފަހަތުން ލިބޭ ހުސް ޖާގަތަކުގެ އެވެ. ރަނގަޅު ތަނުގައި ހުރެެ، ގޯލުގެ ހުސްތަނަށް ބޯޅަ ފޮނުވާލަނީ އެވެ.
މެޗުގެ ދެ ވަނަ މިނިޓްގައި އީގަލްސްގެ އޭރިއާތެރެއަށް ހުރަސްކޮށްލި ބޯޅަ ޔުނައިޓެޑް ވިކްޓަރީގެ އަހުމަދު އަލްތަފް އަޒީމް ވަނީ ހަމަޖެހިލާފައި ގޯލަށް ބޯޅަ ފޮނުވާލައިފަ އެވެ. ފުލުފުލުގައި ރަނގަޅު އެޓޭކްތަކެއް ކުރަމުންދިޔަ ޔުނައިޓެޑް ވިކްޓަރީގެ ދެ ވަނަ ގޯލު ޖެހީ، މެޗުގެ 10 ވަނަ މިނިޓްގައި މުހައްމަދު އަރުޝަދު ސަލީމް އެވެ. އީގަލްސް ޑިފެންސް ފަހަތުން ލިބުނު ބޯޅަ އަރުޝަދު ވަނީ އީގަލްސްގެ ކީޕަރު މުހައްމަދު ރައްޔާން ބޯމަތިން ގޯލަށް ވައްދާލައިފަ އެވެ. އޭގެ ތިން މިނިޓް ފަހުން ޔުނައިޓެޑް ވިކްޓްރީގެ ކުރިއަށް ކުޅޭ އަހުމަދު އަޒުލާން އަލީ ހުސްކޮށް ބޯޅަ ހިފައިގެން އޭރިއާ ތެރެއަށް ވަދެ ގޯލަށް ބޯޅަ ފޮނުވާލީ ތިިރިތިރިންނެވެ.
އީގަލްސް އާއި ޔުނައިޓެޑް ވިކްޓަރީ ކުޅުނު ސެމީ ފައިނަލް މެޗުގެ ތެރެއިން.--- ފޮޓޯ: އިމޭޖަސް.އެމްވީ
އީގަލްސް އިން މެޗު ފަށައި ރަނގަޅަށް ހަމަޖެހިނުލެވެނިސް ތިން ގޯލު ބައިކޮޅަށް ވަނުމުން މެޗުގެ ތެރެއަށް ވަންނަން އުނދަގޫވި ނަމަވެސް ގޯލު ޖަހާނެ ފުރުސަތައް ތަނަވަސްކުރި އެވެ. އެކަަމަކު، އެ ފުރުސަތުތަކުގެ ބޭނުންހިފައި ގޯލެއް ޖެހޭ ގޮތެއްނުވި އެވެ.
އީގަލްސް އިން ފުރަތަމަ ހާފުގައި ގޯލެއް ޖެހި ނަމަވެސް އެ ޓީމުގެ އަޝްހަމް އިބްރާހިމް މުހައްމަދު ޖެހި ގޯލު ވަނީ އޮފްސައިޑް ކަމަށް ނިންމައިފަ އެވެ. އަޝްހަމް ފުރަތަމަ ހާފުގައި ފޮނުވާލި ހަމަލާއެއް ގޯލުގެ ދަނޑިއަށް ވެސް އަމާޒުވި އެވެ. ޔުނައިޓެޑް ވިކްޓަރީ އޭރިއާބޭރުން ލިބުނު ދެ ހިލޭ ޖެހުމުން އީގަލްސްގެ އަހުމަދު އަފްލާޒް ޖެހި ބޯޅަ ދިޔައީ ގޯލާ ސީދާނުވެ ބޭރުންނެވެ.
މި މެޗުގައި ޔުނައިޓެޑް ވިކްޓަރީން ފަހު ގޯލު ޖެހީ މެޗުގެ ފަހުކޮޅުގަ އެވެ. އީގަލްސްގެ ޑިފެންސް ފަހަތަށް މަތިން ވެއްޓުނު ބޯޅަ ހިފައިގެން އޭރިއާތެރެއަަށް ވަދެ، އަޒުލާން ފޮނުވާލި ބޯޅަ ކީޕަރު ރައްޔާން އަތްކައިރިން ވަނީ ގޯލުގެ ކައިރީ ކަނަށެވެ. މެޗުގެ މޮޅު ކުޅުންތެރިޔާގެ މަގާމު ހޯދީ ވެސް އަޒުލާން އެވެ.
ސޯޅަ އަހަރުން ދަށަށް ހާއްސަކޮށް އެފްއޭއެމުން ޔޫތު މުބާރާތެއް ބޭއްވުމުގެ އެންމެ ބޮޑު އެއް މަގުސަދަކީ މި އަހަރު އޮކްޓޫބަރު މަހު އޮތް 17 އަހަރުން ދަށުގެ އޭޝިއަން ކަޕް ކޮލިފައިން އަށް ސްކޮޑެއް އެކުލަވާލުމެވެ. އެ ގޮތުން 17 އަހަރުން ދަށުގެ އޭޝިއަން ކަޕް ކޮލިފައިން ސައުދީ އަރަބިއްޔާގައި ކުރިއަށްދާއިރު، އެ ޓީމާއި ރާއްޖޭގެ އިތުރުން ދެން އެ ގްރޫޕްގައި އޮތީ އިންޑިއާ، މިޔަންމާ އަދި ކުވޭތެވެ.
