މިލާން (ޖޫން 3) - އިޓަލީ އަށް މި އަހަރު ފަހުކޮޅު ގަތަރުގައި ބާއްވާ ފީފާ ވޯލްޑް ކަޕްގެ އޮޓޮމެޓިކް ޖާގައެއް ދޭން ޖެހޭ ކަމަށް އިޓަލީ ގައުމީ ޓީމަށް ކުރިން ކުޅުނު ލެޖެންޑަރީ ފޯވާޑް، ރޮބާޓޯ ބާޖިއޯ ބުނެފި އެވެ.
ރަޝިއާގައި 2018 ވަނަ އަހަރުގައި ބޭއްވި ފީފާ ވޯލްޑް ކަޕުން އިޓަލީ އަށް ފުރުސަތު ނުލިބުނުއިރު، އޭގެ ފަހުން އިޓަލީން ވަނީ އަލުން އެ ގައުމުގެ ފުޓްބޯޅަ ކޮޅަށް ޖަހައި، މިދިޔަ އަހަރު ބޭއްވި ޔޫރޯ ފުޓްބޯޅަ މުބާރާތް ކާމިޔާބުކޮށްފަ އެވެ. އެކަމަކު، މި ފަހަރުގެ ވޯލްޑް ކަޕް ކޮލިފައިން ގްރޫޕްގައި ސްވިޒަލެންޑް ފަހަތުން ދެ ވަނައިގައި ނިންމުމުން، އިޓަލީ އަށް ޖެހުނީ ކޮލިފައިން ޕްލޭއޮފްގައި ކުޅޭށެވެ. ޕްލޭއޮފްގައި އިޓަލީ ބަލިވީ ނޯތު މެސެޑޯނިއާ އަތުންނެވެ. މިއީ އަނެއްކާ ވެސް އިޓަލީ ފުޓްބޯޅަ އަށް ކުރިމަތިވި ވެއްޓުމެކެވެ.
ނުވަދިހައިގެ އަހަރުތަކުގައި އިޓަލީ އަށް ތިން ވޯލްޑް ކަޕެއްގައި ކުޅެދިން ބާޖިއޯ ދާދި ފަހުން ދިން އިންޓަވިއުއެއްގައި ވަނީ ގަތަރު ވޯލްޑް ކަޕްގެ ޖާގައެއް އިޓަލީ އަށް ނުލިބުމަކީ "ޝޮކެއް" ކަމަށް ބުނެފަ އެވެ.
"އިޓަލީ އަކީ ޔޫރޯގެ ޗެމްޕިއަނުން. ލަދުގަންނަން ޖެހޭ ކަމެއް ޔޫރަޕްގެ އެންމެ ފަހުގެ ޗެމްޕިއަން ވޯލްޑް ކަޕްގައި ނެތުމަކީ. އަހަރެން ގަބޫލުކުރާ ގޮތުގައި އިޓަލީ އަށް ޔޫރަޕްގެ ޗެމްޕިއަނުންގެ ހައިސިއްޔަތުން ވޯލްޑް ކަޕްގެ އޮޓޮމެޓިކް ޖާގައެއް ދޭން ޖެހޭ،" އިޓަލީ މީޑިއާ އަށް ދިން އިންޓަވިއުއެއްގައި ބާޖިއޯ ބުންޏެވެ.
މިދިޔަ އަހަރުތަކުގައި ބައިނަލްއަގުވާމީ ލެވަލްގައި އިޓަލީ ބަލިވެފައިވަނީ މަދު މެޗަކުންނެވެ. ބާޖިއޯ ބުނީ ކިތަންމެ މޮޅު ފުޓްބޯޅަ ޓީމެއް ވިޔަސް ދަށްކޮށް ދާ ދުވަހެއްގައި ބަލިވެދާނެ ކަމަށެވެ. އެ ގޮތުން އިޓަލީ އަށް ވެސް ދަށް ދުވަސް ދިމާވީ އެންމެ މުހިންމު ދަނޑިވަޅުތަކުގައި ކަމަށާއި ވޯލްޑް ކަޕަށް ކޮލިފައިނުވީ އެެ ސަބަބާ ހުރެ ކަމަށް ބުނެވިދާނެ ކަމަށް ބާޖިއޯ ވަނީ ބުނެފަ އެވެ.
"އިޓަލީ ސްކޮޑުގައި އަހަރެން ހުރި ނަމަ ޔޫރޯގެ ޗެމްޕިއަންކަން ހޯދާފައި ވޯލްޑް ކަޕަށް ކޮލިފައިނުވުން ހަޖަމްކުރަން އުނދަގޫވާނެ،" ބާޖިއޯ ބުންޏެވެ.
ދާދި ފަހުން އިނގިރޭސި ވެމްބްލީ ސްޓޭޑިއަމްގައި ކުޅުނު ދެ ބައްރުގެ ޗެމްޕިއަނުންގެ މެދުގައި ކުޅޭ، "ފައިނަލިސިމާ" މެޗުން 3-0 އިން އިޓަލީ ބަލިކޮށް އާޖެންޓީނާ އިން ތަށި އުފުލާލައިފަ އެވެ. އެ މެޗުގައި އިޓަލީ ޓީމުގެ ފަރާތުން އެދެވޭ ކުޅުމެއް ނުފެނުނުއިރު، އެ މެޗަށް ފަހު އިޓަލީ ޓީމަށް ވަރަށް ބޮޑު ބަދަލެއް އަންނާނެ ކަމަށް އެ ޓީމުގެ ކޯޗު ރޮބާޓޯ މަންޗިނީ ވަނީ ބުނެފަ އެވެ.
ބާޖިއޯ ބުނީ މަންޗިނީއާ އެކު އިޓަލީ ކުރިއަށްދާން ޖެހޭ ކަމަށާއި އިޓާލިއަން ލީގުގައި ކުޅޭ ހުނަރުވެރި ޒުވާން ކުޅުންތެރިންނާ އެކު އިޓަލީ އަށް ވަރުގަދަ ޓީމެއް އެކުލަވާލެވޭނެ ކަމަށެވެ.
