ސޯލް، ދެކުނު ކޮރެއާ (ޖޫން 2) - ބައިނަލްއަގުވާމީ އެކުވެރިކަމުގެ މެޗެއްގައި ބްރެޒިލުން 5-1 އިން ދެކުނު ކޮރެއާ ބަލިކުރި މެޗުގައި، ބްރެޒިލްގެ ތަރި ނޭމާ ޖެހި ދެ ގޯލާ އެކު ލެެޖެންޑަރީ ފޯވާޑް ޕެލޭގެ ރެކޯޑާ ގާތަށް ޖެހިލައިިފި އެވެ.
ބްރެޒިލް ޓީމަށް އެންމެ ގިނަ ގޯލު ޖެހުމުގެ ރެކޯޑް ޕްލޭ އަތުގައި އޮތީ 77 ގޯލާ އެކު އެވެ. ނޭމާ ވަނީ ކޮރެއާ ކޮޅަށް ވައްދާލި ދެ ޕެނަލްޓީއާ އެކު ގައުމީ ޓީމަށް 73 ގޯލު ހަމަކޮށްފަ އެވެ.
ސޯލް ވޯލްޑް ކަޕް ސްޓޭޑިއަމްގައި މިއަދު ކުޅުނު މެޗު ފަށައިގެން މާގިނައިރެއްނުވެ، ބްރެޒިލްގެ ތިއާގޯ ސިލްވާ ބޮލުން ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. އެކަމަކު، މެޗުގެ ހަތް ވަނަ މިނިޓްގައި ބްރެޒިލުން ލީޑުނެގީ ރިޗާލިސަން ޖެހި ގޯލުންނެވެ. މިއީ ބްރެޒިލްގެ މިޑްފީލްޑަރު ފްރެޑަށް އެންމެ ރަނގަޅަށް ފޮނުވާނުލެވި، ރިޗާލިސަން އަށް ލިބުނު ފުރުސަތަކުން ޖެހި ގޯލެކެވެ.
މެޗުގެ 31 ވަނަ މިނިޓްގައި ދެކުނު ކޮރެއާ އިން ގޯލެއް ޖަހައި ނަތީޖާ ހަމަހަމަކުރި އެވެ. މި ގޯލު ޖެހީ ފްރާންސްގެ ބޯޑޯ އަށް ކުޅޭ ފޯވާޑް، ހުވާންގް އުއީ-ޖޯ އެވެ. ހްވާންގް ހީޗާން ދިން ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު އުއީ-ޖޯ ފޮނުވާލި ޝޮޓް އަމާޒުވީ ގޯލުގެ ދުރު ކަނަށެވެ.
ފުރަތަަމަ ހާފު ނިމުމުގެ ކުރިން ޕެނަލްޓީ އަކުން ނޭމާ ބްރެޒިލަށް އަލުން ލީޑުނަގައިދިނެވެ. މިއީ ބްރެޒިލްގެ އަލެކްސް ސަންޑްރޯ އަށް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ. ދެ ވަނަ ހާފްގެ ކުޅުން ފެށިގެން 12 މިނިޓް ތެރޭ ބްރެޒިލުން ތިން ވަަނަ ގޯލު ޖެހީ ވެސް ނޭމާގެ ޕެނަލްޓީ އަކުންނެވެ. މި ފަހަރު ވެސް ޕެނަލްޓީ ލިބުނީ އަލެކްސް ސަންޑްރޯ އަށް ކުރި ފައުލަކަށް ވީއޭއާރް ބަލައިގެންނެވެ.
އޭގެ ފަހުން ބްރެޒިލްގެ ރަފީނިއާ ޖެހި ޝޮޓެއް ގޯލުގެ ދަނޑީއަށް އަމާޒުވިއިރު، ބްރެޒިލްގެ ހަތަރު ވަނަ ގޯލު ޖެހީ ނޭމާގެ ބަދަލުގައި ކުޅެން އެރި ފިލިއްޕޭ ކުޓީނިއޯ އެވެ. ކުޅެން އެރިތާ ދެ މިނިޓް ތެރޭ، މެޗުގެ 79 ވަނަ މިނިޓްގައި އޭރިއާތެރެއިން ކުޓީނިއޯ އަށް ލިބުނު ފުރުސަތުން ޖެހި ބޯޅަ އަމާޒުވީ ގޯލުގެ މަތީ ކަަނަށެވެ.
އިތުރު ވަގުތުގެ ގޮތުގައި ދެއްކި ހަތަރު މިނިޓްގެ ތެރެއިން ދެ ވަނަ މިނިޓްގައި ބްރެޒިލުން މި މެޗުގައި ޖެހި ފަސް ވަނަ ގޯލު ކާމިޔާބުކޮށްދިނީ ގަބްރިއެލް ޖީސޫސް އެވެ. ބޯޅަ ހިފައިގެން އޭރިއާތެރެއަށް ވަދެ، ޖީސޫސް ޖެހި ޝޮޓް އަމާޒުވީ ގޯލުގެ ދުުރު ކަނަށެވެ.
ދުނިޔޭގެ ރޭންކިންގެ އެއް ވަނައިގައި އޮތް ބްރެޒިލް ދެން ކުޅޭ މެޗުގައި އަންނަ ހޯމަ ދުވަހު ބައްދަލުކުރާނީ ޖަޕާންއާ އެވެ.
