އިންޑިއާގެ އޮޑިޝާގައި މި މަހުގެ 1-5 އަށް ބާއްވާ ފީބާ އޭޝިއަން ޗެމްޕިއަންޝިޕްގެ ސާބާ ކޮލިފައިންގެ ކުރިން އިންޑީއާގެ ކޮލްކަތާގައި އެކުވެރިކަމުގެ ދެ މެޗެއް ކުޅެ ރާއްޖޭގެ ޒުވާން ބާސްކެޓްބޯޅަ ޓީމުން ރަނގަޅު ތަޖުރިބާތަކެއް ހޯދައިފި އެވެ.
ރާއްޖޭގެ 18 އަހަރުން ދަށުގެ ފިރިހެން ބާސްކެޓްބޯޅަ ޓީމް ވާދަކުރާ ސަރަހައްދީ ކޮލިފައިންގައި ދެން ވާދަކުރާނީ އިންޑިއާ އަދި ބަންގްލަދޭޝް އެވެ. ނޭޕާލް ކުރިން ވާދަކުރާ ގޮތަށް އޮތް ނަމަވެސް ފަހު ވަގުތު އެ ގައުމުން ވާދަ ނުކުރަން ނިންމީ އެވެ.
އިންޑިއާގެ އޮޑިސާ އަށް ދިޔުމުގެ ކުރިން ރާއްޖޭގެ ޓީމު ވަނީ ކޮލްކަތާގައި ހަތަރު ދުވަހު މަޑުކޮށް އެކުވެރިކަމުގެ ދެ މެޗެއް ކުޅެފަ އެވެ. އެކުވެރިކަމުގެ ފުރަތަމަ މެޗުގައި ރާއްޖެއިން ކުޅުނީ ވެސްޓް ބެންގާލް ޚަލްސާ ބްލޫސް އާ ދެކޮޅަށެވެ. ކަލްކަތާގެ ޔުނިވާސީޓީގެ 18 އަހަރުން ދަށުގެ ޓީމާ ވާދަކޮށް ރާއްޖެ ބަލިވީ 56-66 ޕޮއިންޓުންނެވެ.
މި މެޗުގެ ފުރަތަމަ ކުއާޓާގައި ދިވެހި ޓީމްގެ ކުޅުން ފެނުނީ ދަށްކޮށެވެ. މިގޮތުން ފުރަތަމަ ކުއާޓާ 4-15 ރާއްޖެ ފަހަތުގައި އޮވެ ނިމުނު ނަމަވެސް ފަހު ތިން ކުއާޓާގައި ދިވެހި ޓީމުން ވަރުގަދަ ފައިޓެއް ދިނެވެ. ދެ ވަނަ ކުއާޓާގެ ސްކޯއިން 17-22 އިން ޚަލްސާ ބްލޫސް ކުރީގައި އޮތް ނަމަވެސް ތިން ވަނަ ކުއާޓާގެ ސްކޯއަށް ބަލާއިރު ދިވެހި ޓީމުން 21-15 އިން ކުރި ހޯދި އެވެ. ފަހު ކުއާޓާގައި ދެ ޓީމަށްވެސް ސްކޯ ކުރެވުނީ 14 ޕޮއިންޓެވެ.
މި މެޗަށް ފަހު ޚަލްސާ ބްލޫސްގެ ކޯޗު ބުނީ ދިވެހި ޓީމުގެ ސްޕީޑު ވަރަށް ރަނގަޅު ކަމަށާއި، ހުނަރަށް ބަލާއިރުވެސް ދިވެހި ކުޅުންތެރިން ވަރަށް މޮޅުކަމަށެވެ. ދިވެހި ޓީމުން ރަނގަޅު ކުރަން ޖެހޭ ކަމެއްގެ ގޮތުގައި އޭނާ ފާހަގަކުރީ ބޮކްސް ތެރޭގައި ލިބޭ ފުރުސަތުތަކުގައި ތެޅިނުފޮޅި ހަމަޖެހިލައިގެން ކުޅެ ސްކޯ ކުރުމެވެ.
ކަލްކަތާގައި ޒުވާން ޓީމުން ކުޅުނު ދެ ވަނަ މެޗުގައި ނުކުތީ ވެސްޓް ބެންގާލް ލީގުގައި ކުޅޭ ޗަތުރަ ސެމިޓީގެ ސީނިއާ ޓީމާ ދެކޮޅަށެވެ. ވެސްޓްބެންގާލް ލީގުގެ ހަތަރު ވަނަ އެންމެ ފަހުން ހޯދި ޓީމް އަތުން ރާއްޖޭގެ ޒުވާން ޓީމް ބަލިވީ 20-91 ޕޮއިންޓުންނެވެ.
މި މެޗުގެ ފުރަތަމަ ދެ ކުއާޓާ ނިމުނު އިރު ދިވެހި ޓީމް އޮތީ ކުރީގަ އެވެ. ފުރަތަމަ ކުއާޓާގައި 19-14 އިން ރާއްޖެ ކުރީގައި އޮތްއިރު، ދެ ވަނަ ކުއާާޓާ ނިންމާލީ 41 ޕޮއިންޓް 31 ޕޮއިންޓުން ކުރީގައި އޮވެ އެވެ. ޗަތުރަ ސެމިޓީގެ ޓީމުން ތަޖުރިބާގެ ބޭނުންކޮށް ފަހު ދެ ކުއާޓާގައި ތަފާތު މޮޅު ކުޅުމެއް ދައްކައި މެޗު އަނބުރާލި އެވެ.
މި މެޗަށް ފަހު ޗަތުރަ ސެމިޓީގެ ކޯޗު ވަނީ ދިވެހި ކުޅުންތެރިން ފިޓްނަސް އާއި މަސައްކަތު ރޭޓަށް ތައުރީފުކޮށްފަ އެވެ. އަދި މީގެ އިތުރުން ކޮންމެ ކުޅުންތެރިއަކުވެސް އެއް ސްޕީޑެއްގައި ކުޅެ ވަރަށް ރަނގަޅަށް ކުޅުނުކަން ކޯޗު ފާހަގަކުރި އެވެ.
ސާބާ ކޮލިފައިންގެ މެޗުތަކަށް ދިވެހި ރާއްޖޭގެ ޓީމް މިހާރު ތިބީ އޮޑިސާގަ އެވެ. ކޮލިފައިންގެ ފުރަތަމަ މެޗުގައި މާދަމާ ރާއްޖެ ކުޅޭނީ ބަންގްލަދޭޝްއާ ދެކޮޅަށެވެ. އަދި ފަހު މެޗުގައި އެއް ދުވަސް ފަހުން އިންޑިއާއާ ވާދަކުރާނެ އެވެ.
