އަހުމަދުއާބާދު، އިންޑިއާ (މެއި 27) - ޖޯޝް ބަޓްލާ ތަފާތު ދައްކައި، ހަތް ވިކެޓުން ރޯޔަލް ޗެލެންޖާސް ބެންގަލޫރު ބަލިިކޮށް، ރާޖަސްތާން ރޯޔަލްސް އިންޑިއަން ޕްރިމިއާ ލީގުގެ ފައިނަލަށް ގެންގޮސްދީފި އެވެ.
އަންނަ އާދިއްތަ ދުވަހުގެރޭ ކުޅޭ ފައިނަލުގައި ރާޖަސްތާން ކުޅޭނީ ފުރަތަމަ މުބާރާތުގައި ވެސް ފައިނަލަށް ދަތުރުކޮށްފައިވާ ގުޖުރާތު ޓައިޓަންސާ އެވެ. ގުޖުރާތުން ފައިނަލުގެ ޖާގަ ހޯދީ ފުރަތަމަ ޕްލޭއޮފްގައި ހަތް ވިކެޓުން ރާޖަސްތާން ބަލިކޮށްފަ އެވެ.
ދުނިޔޭގެ އެންމެ ބޮޑު ކްރިކެޓް ސްޓޭޑިއަމް، ނަރެންދުރަ މޯދީ ސްޓޭޑިއަމްގައި މިރޭ ކުޅުނު މެޗުގައި ރާޖަސްތާނަށް ޓޮސް ދިމާވުމުން އެ ޓީމުން ނިންމީ ފީލްޑިން އަށް ދިއުމަށެވެ. އެއީ، ބަޓްލާ ފަދަ ހުނަރުވެރި ކުޅުންތެރިންގެ ބެޓިން އިން ފަހުން އަރައި ތަފާތު ދެއްކޭނެ ކަމުގެ ޔަގިންކަން އޮތުމުންނެވެ.
ބެންގަލޫރުން މިރޭ ކުޅެން އަރައި، ޕްރެޝަރަށް ދިޔައީ އެ ޓީމުގެ ކެޕްޓަން، ފަފް ޑޫ ޕްލެސިސް އާއި ޓީމުގެ ތަރި، ވިރާތު ކޯލީ އަށް މާ ބޮޑު ސްކޯއެއް ނުހެދުމުންނެވެ. ކޯލީ ވަނީ ހަތް ލަނޑުން ނުބައިވެފަ އެވެ. އަދި ޕްލެސިސް އަށް އެއް ކުރެވުނީ 25 ލަނޑެވެ. އެންމެ ފަހުން ޕްލޭއޮފްގައި ބެންގަލޫރު މޮޅުވީ، ރަޖަތު ޕަތީދާރު ހެދި ސެންޗަރީގެ އެހީގަ އެވެ. އެކަމަކު، އެ ވަރުގެ ކުޅުމެއް މިރޭ ރަޖަތު އަށް ވެސް ނުދެއްކުނެވެ. ރަޖަތު ވަނީ 42 ބޯޅައިން 58 ލަނޑަށް ނުބައިވެފަ އެވެ.
ބެންގަލޫރުގެ 20 އޯވަރު ހަމަވިއިރު، އަށް ކުޅުންތެރިން ނުބައިވެގެން ހެދުނީ 157 ލަނޑެވެ. މިއީ، ޖަވާބުގައި ކުޅެން އަރައި، ނަތީޖާ އަނބުރާލަން ރާޖަސްތާނަށް އުނދަގޫ ސްކޯއެއް ނޫނެވެ. އެކަން ސާބިތުކޮށްދިނީ މި ފަަހަރުގެ މުބާރާތުގައި ތަފާތު ފޯމެއްގައި ކުޅެމުން އަންނަ ބަޓްލާ އެވެ.
ބަޓްލާ ވަނީ މިރޭގެ ނުބައިނުވެ 60 ބޯޅައިން 106 ލަނޑު ހަދައިފަ އެވެ، މިއީ މި ފަހަރުގެ އައިޕިއެލް ސީޒަނުގައި ބަޓްލާގެ ހަަަތަރު ވަނަ ސެންޗަރީ އެވެ. މީގެ ކުރިން އައިޕީއެލްގެ އެއް ސީޒަނެއްގައި ހަތަރު ސެންޗަރީ ހެދުމުގެ ރެކޯޑް އޮތީ ކޯލީ އަތުގަ އެވެ.
ރާޖަސްތާނަށް ދެން އެންމެ ރަނގަޅު ކުޅުމެއް ދެއްކީ، އޯޕަނިން ބެޓްސްމަނެއްގެ ގޮތުގައި ބަޓްލާއާ އެކު ކުޅުނު، ޔަޝަޝްވީ ޖޭސްވާލް އެވެ. އޭނާ ވަނީ 13 ބޯޅައިން 21 ލަނޑު އެއްކޮށްފަ އެވެ. ރާޖަސްތާން މޮޅުވީ 18.1 އޯވަރުގެ ތެރޭގައި ތިން ކުޅުންތެރިން ނުބައިވެެގެން 161 ލަނޑު ހަމަކޮށް، ހަތް ވިިކެޓުންނެވެ.
ފައިނަލަށް ނުކުންނައިރު، ރާޖަސްތާނުން ވަނީ 2008 ވަނަ އަހަރުގެ އައިޕީއެލް ކާމިޔާބުކޮށްފަ އެވެ. މުޅިން އަލަށް އައިޕީއެލްގައި ވާދަކޮށް ފައިނަލަށް ނުކުންނަން ތައްޔާރުވަމުން އަންނަ، ގުޖުރާތުން ވަނީ މި ފަހަރުގެ މުބާރާތުގައި މިހާތަނަށް ދެ ފަހަރެއްގެ މަތިން ރާޖަސްތާން ބަލިކޮށްފަ އެވެ. އެއީ ލީގު ބުރުގައި 37 ލަނޑުންނާއި ފުރަތަމަ ޕްލޭއޮފްގައި ހަތް ވިކެޓުންނެވެ.
