މެޑްރިޑް (މެއި 27) - އޭޝިއާ ޓީމަކުން އަދި ނުފެންނާނެ ކަމަށާއި ދެން ވެސް ފެނުން ގާތީ ޔޫރަޕްގެ ވަރުގަދަ ލީގެއްގެ ޓީމަކުން ކަމަށް އެތުލެޓިކޯ މެޑްރިޑުން ދާދި ފަހުން ދޫކޮށްލި ތަޖުރިބާކާރު ފޯވާޑް ލުއިސް ސުއަރޭޒް ބުނެފި އެވެ.
ޔޫރަޕްގައި ފާއިތުވި 12 ވަރަކަށް އަހަރު ފެނުނު އެންމެ ހުނަރުވެރި އެއް ފޯވާޑް، ސުއަރޭޒް، 35، މިދިޔަ ސީޒަނުގައި އެތުލެޓިކޯ އަށް ބަދަލުވީ ދެ އަހަރުގެ ކޮންޓްރެކްޓެއްގަ އެވެ. ފުރަތަމަ ސީޒަނުގައި އެތުލެޓިކޯ އަށް ސްޕެނިޝް ލީގުގެ 32 މެޗުން 21 ގޯލު ޖަހައިދީ އެ ޓީމަށް ލީގު ޗެމްޕިއަންކަން ހޯދައިދޭން ސުއަރޭޒް އެހީތެރިިވި އެވެ.
އެކަމަކު، މި ސީޒަނުގައި ސުއަރޭޒްގެ ފޯމު ވަރަށް ބޮޑަށް ދަށްވި އެވެ. ލީގުގައި 35 މެޗު ކުޅުނުއިރު، ޖެހުނީ 11 ގޯލެވެ. އެހެންވެ، އެތުލެޓިކޯ އިން ނިންމީ ސުއަރޭޒަށް އިތުރު ކޮންޓްރެކްޓެއް ނުދޭށެވެ.
ސުއަރޭޒް މީޑިއާ އަށް ދިން އިންޓަވިއުއެއްގައި ވަނީ އާ ކޮންޓްރެކްޓެއް ނުދިނަސް އެތުލެޓިކޯގެ ވެރިން އޭނާ އަށް އެކަމާ ގުޅޭގޮތުން ފުރިހަމަ މައުލޫމާތު ދީފައިނުވާތީ ކަންބޮޑުވުން ފާޅުކޮށްފަ އެވެެ. ދުރާލާ ކްލަބުން އާ ކޮންޓްރެކްޓެއް ނުދޭކަން އެނގުނު ނަމަ އޭޖެންޓް، މެދުވެރިކޮށް އާ ޓީމެއް ހޯދުމުގެ ކަންކަން ކުރެވޭނެ ކަމަށް ސުއަރޭޒް ވަނީ ބުނެފަ އެވެ.
ގަތަރުގައި މި އަހަރު ފަހު ކޮޅު ބާއްވާ ފީފާ ވޯލްޑް ކަޕް ފުޓްބޯޅަ މުބާރާތަކީ ސުއަރޭޒް ގައުމީ ޓީމަށް ކުޅޭނެ ފަހު މުބާރާތެވެ. އެ މުބާރާތަށް ދާން ވާއިރަށް ރަނގަޅު ލެވަލެއްގައި ހުންނަން ވަރުގަދަ ލީގެއްގައި ކުޅުމަކީ މުހިންމު ކަމެއްގެ ގޮތުގައި ސުއަރޭޒް ދެކެ އެވެ.
"ޗައިނާ، ގަތަރު، ސައުދީ އަަރަބިއްޔާ، މި ގައުމުތަކުގެ ކްލަބްތަކެއް އަހަރެންގެ ސިކުނޑީގައި ނެތް އަދިއެއް. އަހަރެން މި ވަގުތު މި ވިސްނަނީ ގިނަ ފައިސާ ލިބޭނެ ހުށަހެޅުމަކަށް ނޫން. އަހަންނަށް ފޯނު ކޯލުތައް އެބައާދޭ ބްރެޒިލް، މެކްސިކޯ ދެން އާޖެންޓީނާ އިން ވެސް، އެކަމަކު، އެއީ ވެސް މި ވަގުތު ވިސްނުމެއް ނޫން،" ސުއަރޭޒް ބުންޏެވެ.
"އަހަރެން ފެންނާނީ ޔޫރަޕްގެ ވަރުގަދަ ލީގަކުން، އަހަންނަށް އެބައޮތް ސްޕެއިނުގެ ކްލަބްތަކަކުން ވެސް އޮފާ ލިބިފައި. އަހަންނެއް ނުބުނާނަން (ދެން ބަދަލުވާ ޓީމަކުން ޔަގީންކަމާ އެކު) އަހަރެން ކުޅުވަން ޖެހޭނެއޭ، ކްލަބްގައި އޮތް ޕްރޮޖެކްޓަކީ ޗެލެންޖެއް ވިއްޔާ އަހަރެން މި ހުރީ ތައްޔާރަށް،"
އުރުގުއޭގެ ނަސިއޮނާލް ކްލަބުން 2005 ވަނަ އަހަރު ސީނިއާ ފުޓްބޯޅަ ކެރިއަރު ފެށި ސުއަރޭޒް ޔޫރަޕްގައި ފުރަތަަމަ ކުޅުނީ ނެދަލެންޑްސްގެ ގްރޮނިންގެން އަށެވެ. އެއީ 2006-2007 އަށެވެ. އޭގެ ފަހުން އަޔަކްސް އަށް ބަދަލުވެ، އެ ޓީމުގައި ވިދާލުމުން، 2011 ވަނަ އަހަރު ލިވަޕޫލުން ސުއަރޭޒްގެ ސޮއި ހޯދި އެެވެ. އެ ޓީމާ އެކު ތަފާތު މޮޅު ކުޅުމެއް ދައްކައި، ސުއަރޭޒް، 2014 ވަަނަ އަހަރު ބާސެލޯނާ އަށް ބަދަލުވި އެވެ. އެ ޓީމަށް 2020 ވަނަ އަހަރާ ހަމައަށް ކުޅުމަށް ފަހު، ދެން މިދިޔަ ދެ އަަހަރު ފެނުނީ އެތުލެޓިކޯ ޓީމުންނެވެ.
ސުއަރޭޒް ހޯދަން ވިޔަރެއާލާއި ސެވިއްޔާ އަދި އިންގްލެންޑްގެ ވެސްޓް ހޭމް ޔުނައިޓެޑުން ވަނީ ހުށަހަޅައިފަ އެވެ.
