ވޮލީބޯޅަ އެސޯސިއޭޝަން ކަޕުގެ އަންހެން ޑިވިޝަންގައި ފުރަތަމަ ކުޅުނު ދެ މެޗު ކްލަބް ވޮލީބޯލް އާއި ކުލަބު އީގަލްސް ކާމިޔާބުކޮށްފި އެވެ.
ވޮލީބޯޅަ ސީޒަންގެ އަންހަން ފުރަތަމަ މުބާރާތުގައި މި އަހަރު ވަނީ 10 ޓީމަކުން ބައިވެރިވެފަ އެވެ. އެ 10 ޓީމް ދެ ގްރޫޕަކަށް ބަހާލާފައިވާއިރު، ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން ކުލަބު ވެމްކޯ އާއި، ކުލަބު ވޮލީބޯލް، އަލްމާ ސްޕޯޓްސް ކުލަބު، ޔޫތު ނިއު ޖެނެރޭޝަންގެ އިތުރުން ހިންމަފުށި ވިކްޓޯރިއަސް ސްޕޯޓްސް ކުލަބެވެ. ގްރޫޕް ބީ ގައި ހިމެނެނީ ޕޮލިސް ކުލަބު، ވޮލީބޯލް ޔޫތު ނިއު ޖެނެރޭޝަން، ކުލަބު އީގަލްސް، ދިވެހި ސިފައިންގެ ކުލަބުގެ އިތުރުން ކުލަބު ހާފް ލިންކޭޖު އެވެ.
އެސޯސިއޭޝަންގެ ފުރަތަމަ މެޗުގައި ވާދަކުރީ އަލްމާ ސްޕޯޓްސް އާއި ކުލަބް ވޮލީބޯލް އެވެ. ފޯރިގަދަކޮށް ދިޔަ ވާދަވެރި މި މެޗު ކުލަބު ވޮލީބޯލް އިން ކާމިޔާބުކުރީ ފުރަތަމަ ސެޓު އަލްމާ ހޯދާފައިވަނިކޮށް ފަހަތުން 3-1 ސެޓުންނެވެ.
މެޗުގެ ފުރަތަމަ ސެޓު ލީޑުގައި އޮވެ، ކުޅުނީ ކުލަބު ވޮލީބޯލް އިންނެވެ. ސެޓު ފުރަތަމަ ނިންމާލަން ވެސް ފުރުސަތު އެ ޓީމަށް ލިބުނެވެ. އެކަމަކު، 24-20 ގައި އޮއްވާ އަލްމާ އިން ފަހަތުން އަރައި މި ސެޓު 24-26 އިން ކާމިޔާބު ކުރި އެވެ. މެޗުގެ ދެ ވަނަ ސެޓުގައި ވެސް ލީޑުގައި އޮވެ ކުޅެ، ކުލަބު ވޮލީބޯލް އިން މި ސެޓު ކާމިޔާބުކުރި އެވެ. ފަހު ވަގުތާއި ހަމައަށް ގޮސް މަދު ޕޮއިންޓްތަކެއް ގެއްލުނު ނަމަވެސް އެ ޓީމުން ފަހު ވަގުތު 25-22 އިން މި ސެޓު ކާމިޔާބު ކޮށްފަ އެވެ.
ތިން ވަނަ ސެޓުގެ މެދުތެރެއިން އަލްމާ އިން ލީޑު ނެގި އެވެ. ނަމަވެސް އަނެއްކާ ވެސް ސެޓުގެ ފަހު ވަގުތު ނަތީޖާ އަނބުރާލައި ކުލަބު ވޮލީބޯލް އިން މި ސެޓު 26-24 އިން ހޯދި އެވެ. މެޗުގެ ފަހު ސެޓުގައި ކުލަބު ވޮލީބޯލް އިން ފެނުނީ އިތުބާާރާ އެކު ކުޅުނު ތަނެވެ. އަލްމާ އިން ވާންކުރި ނަމަވެސް 25-21 އިން ސެޓު ހޯދައި އެ ޓީމުން މެޗު ކާމިޔާބު ކުރި އެވެ. މެޗުގެ މޮޅު ކުޅުންތެރިޔަކީ ކުލަބު ވޮލީބޯލްގެ ފާތިމަތު ނިޝާނާ އެވެ.
މި ފަހަރުގެ މުބާރާތަށް ވަރުގަދަ އަށް ތައްޔާރުވި އީގަލްސް ވަނީ އެ ޓީމް ކުޅުނު ފުރަތަމަ މެޗުގައި ވޮލީބޯލް ޔޫތު ނިއުޖެނެރޭޝަންއާ ވާދަކޮށް މޮޅުވެފަ އެވެ. ގައުމީ ވޮލީބޯޅަ ޓީމުގެ ތަޖުރިބާހުރި ގިނަ ކުޅުންތެރިންތަކެއް ހިމެނޭ އީގަލްސް އިން ނުކުމެ މެޗު ކާމިޔާބުކުރީ 3-1 ސެޓުންނެވެ. ވޮލީބޯލް ޔޫތު ނިއު ޖެނެރޭޝަންގައި ތިބީ ގައުމީ ޓީމުން ޖާގަ ހޯދަމުން އަންނަ ޒުވާން ކުޅުންތެރިންނެވެ.
ބިދޭސީ ކުޅުންތެރިއަކު ލައިގެން ދެ ޓީމު ވެސް ޓީމު ބަށްޓަންކޮށްފައިވާއިރު، މެޗުގެ މައިގަނޑު ތަފާތަކަށްވީ ވެސް މި ދެ ކުޅުންތެރިންގެ ހަމަލާތަކެވެ. އީގަލްސް މޮޅުވުމުގައި އެ ޓީމުގެ ތަޖުރިބާކާރު ސެޓަރު، ފާތިމަތު މަޒިއްޔާ އާއި އެޓޭކަރު، އައިޝަތު ޝައްފަގެ ކުޅުން ފާހަގަކޮށްލެވެ އެވެ.
މެޗުގެ ފުރަތަމަ ސެޓު 25-18 އިން އީގަލްސް އިން ކާމިޔާބުކުރި ނަމަވެސް ދެ ވަނަ ސެޓުގައި ހިތްވަރާ އެކު ކުޅެ ވޮލީބޯލް ޔޫތު ނިއުޖެނެރޭޝަނުން 25-22 އިން ސެޓު ކާމިޔާބު ކުރި އެވެ. އެ ޓީމުގައި ގައުމީ ޒުވާން ޓީމްގެ އުއްމީދީ ގިނަ ކުޅުންތެރިން ހިމެނެ އެވެ. ތިން ވަނަ ސެޓާއި ފަހު ސެޓުގައި މެޗުގެ މޮޅު ކުޅުންތެރިޔާގެ މަގާމް ހޯދި މަޒިއްޔާގެ ކުޅުން ވަރަށް ބޮޑަށް ފާހަގަ ކުރެވުނެވެ. ފަހު ދެ ސެޓު އީގަލްސް އިން ކާމިޔާބުކުރީ 25-21 އަދި 25-17 އިންނެވެ.
މުބާރާތުގައި މިރޭވެސް ދެ މެޗެއް ކުޅޭނެ އެވެ. މިރޭ 20:15 ގައި ފަށާ މެޗުގައި ވާދަކުރާނީ ޔޫތު ނިއުޖެނެރޭޝަން އާއި ހިންމަފުށި ވިކްޓްރެސް ސްޕޯޓްސް ކުލަބެވެ. މިރޭގެ ފަހު މެޗުގައި ދިވެހި ސިފައިންގެ ކުލަބު ނުކުންނާނީ ކުލަބު ހާފް ލިންކޭޖާއި ދެކޮޅަށެވެ.
