މެންޗެސްޓާ (މެއި 22) - އިނގިރޭސި ޕްރިމިއާ ލީގުގައި މިރޭ ފަސް މިނިޓް ތެރޭ ތިން ގޯލު ޖަހައި، ފަހަތުން އަރައި އެސްޓަން ވިލާ 3-2 އިން ބަލިކޮށް މެންޗެސްޓާ ސިޓީން ލީގުގެ ޗެމްޕިއަންކަން ހޯދައިފި އެވެ.
ދެ ވަނައިގައި އޮތް ލިވަޕޫލުން ވެސް ފަހަތުން އަރައި 3-1 އިން ވުލްވްސް ބަލިކުރިއިރު، މިރޭ ސިޓީ އަށް މޮޅުނުވެވުނު ނަމަ ލިވަޕޫލަށް ލީގު ޗެމްޕިއަންކަން ލިބޭނެ އެވެ. އެކަމަކު، ސިޓީން މޮޅުވެ، އެއް ޕޮއިންޓުގެ ފަރަގުން ލީގު ކާމިޔާބުކުރިއިރު، މިއީ ފަސް އަހަރު ތެރޭ އެ ޓީމުން ލީގު ޗެމްޕިއަންކަން ހޯދި ހަތަރު ވަނަ ފަހަރެވެ. އަދި ޖުމްލަ އެކު ސިޓީން ވަނީ އަށް ފަހަރު ލީގު ޗެމްޕިއަންކަން ހޯދައިފަ އެވެ.
ސިޓީ އެއް ވަނައިގައި ނިންމާލީ 93 ޕޮއިންޓާ އެކު އެވެ. ލިވަޕޫލަށް ދެ ވަނަ ލިބުނީ 92 ޕޮއިންޓް ހޯދައިގެންނެވެ. ތިން ވަނައިގައި ނިންމީ 2-1 އިން ވަޓްފޯޑް ބަލިކުރި ޗެލްސީ އެވެ. ޗެލްސީ އަށް ލިބުނީ 74 ޕޮއިންޓެވެ. ޗެމްޕިއަންސް ލީގުގެ ފަހު ޖާގަ ކަށަވަރުކުރީ ޓޮޓެންހަމް ހޮޓްސްޕާސް އިންނެވެ. ޓޮޓެންހަމުން މިރޭ 5-0 އިން ނޮރިޗް ސިޓީ ބަލިކުރިއިރު، ޓޮޓެންހަމަށް ވަނީ 71 ޕޮއިންޓް ލިބިފަ އެވެ.
ފަސް ވަނައިގައި ނިންމި އާސެނަލާއި ހަ ވަނަ ހޯދި މެންޗެސްޓާ ޔުނައިޓެޑް އަންނަ ސީޒަނުގައި ކުޅޭނީ ޔޫރޮޕާ ލީގެވެ. އާސެނަލް އަށް ލިބުނީ 69 ޕޮއިންޓެވެ. އާސެނަލް ވަނީ މިރޭ ފަހަތުން އަރައި 5-1 އިން އެވަޓަން ބަލިކޮށްފަ އެވެ. ޔުނައިޓެޑް ވަނީ ކްރިސްޓަލް ޕެލަސް އަތުން 1-0 އިން ބަލިވެފަ އެވެ. ޔުނައިޓެޑަށް ލިބުނީ 58 ޕޮއިންޓެވެ.
ހަތް ވަނައިގައި ނިންމައި، ވެސްޓް ހޭމް ޔުނައިޓެޑް ވަނީ ޔުއެފާ ކޮންފަރެންސް ލީގަށް ކޮލިފައިވެފަ އެވެ. ވެސްޓް ހޭމް މޮޅުވިނަމަ، ޔުނައިޓެޑް ކޮންފަރެންސް ލީގަށް ވެއްޓޭނެ އެވެ. މިރޭ، ބްރައިޓަން ދަނޑުގައި ފުރަތަމަ ވެސްޓް ހޭމް އިން ލީޑުނެގި ނަމަވެސް 3-1 އިން ބަލިވީ އެވެ. މި ނަތީޖާއާ އެކު ވެސްޓް ހޭމް ހަތް ވަނައިގައި އޮތީ 56 ޕޮއިންޓް ހޯދައިގެންނެވެ.
ސިޓީ ދަނޑުގައި މިރޭ ފުރަތަމަ ހާފުގައި އެސްޓަން ވިލާ އިން ލީޑުނެގީ މެޓީ ކޭޝް ބޮލުން ޖެހި ގޯލުންނެވެ. ސިޓީން ލަނޑެއް ޖަހަން ކުރިއަށް ޖެހިގެން ކުޅެނިކޮށް، މެޗުގެ 75 ވަނަ މިނިޓްގައި ފިލިއްޕޭ ކުޓީނިއޯ އެސްޓަން ވިލާގެ ލީޑުފުޅާކޮށްދިނެވެ.
ސިޓީން ނަތީޖާ އަނބުރާލީ ޖެހިގެން އައި ފަސް މިނިޓް ތެރޭ ތިން ގޯލު ޖަހައިގެންނެވެ. ސިޓީގެ ފުރަތަމަ ގޯލު ޖެހީ ބަދަލަކަށް އެރި ދެ ކުޅުންތެރިން ގުޅިގެން ކުރި އެޓޭކެއްގަ އެވެ. ރަހީމް ސްޓާލިން ނެގި ހުރަހަކުން އިލްކާއި ގުންޑޮގާން ބޯޅަ ގޯލަށް ވައްދާލީ ބޮލުން ޖަހަ އެވެ. އޭރިއާބޭރުން ރޮޑްރީ ޖެހި ގޯލުން ސިޓީން ނަތީޖާ ހަމަހަަމަކުރިއިރު، ސިޓީ މޮޅުކޮށްދިން ގޯލު ގުންޑޮގާން ޖެހީ ކެވިން ޑި ބްރޭނާ ދިން ބޯޅައަކުންނެވެ.
ލިވަޕޫލްގެ އެންފީލްޑް ސްޓޭޑިއަމްގައި އެ ޓީމުން މެޗު ފަށައިގެން ހަމަޖެހިނުލެވެެނިސް ވުލްވްސްގެ ޕެޑްރޯ ނެޓޯ ގޯލެއް ޖަހައި އެ ޓީމަށް ލީޑުނަގައިދިނެވެ. އެކަމަކު، ފުރަތަމަ ހާފު ނިމުމުގެ ކުރިން ސަޑިއޯ މާނޭ ލިވަޕޫލަށް އެއްވަރުކޮށްދިނެވެ. ލިވަޕޫލަށް މެޗުގައި ފުރަތަމަ ފަަހަރަށް ލީޑުނަގައިދިނީ މުހައްމަދު ސަލާހު އެވެ. ލިވަޕޫލްގެ ފަހު ގޯލު ޖެހީ ރޮބާޓޯ ފިރްމީނޯ ދިން ބޯޅައަކުން އެންޑްރިއު ރޮބަޓްސަން އެވެ.
މި ފަހަރު ޕްރިމިއާ ލީގުން ރެލިގޭޓްވީ، އެންމެ ފުލަށް ދިޔަ ނޮރިޗް ސިޓީ އާއި ވަޓްފޯޑްގެ އިތުރުން މިރޭ އަމިއްލަ ދަނޑުގައި ނިއުކާސަލް ޔުނައިޓެޑް އަތުން 2-1 އިން ބަލިވި ބާންލީ އެވެ. ލީޑްސް ޔުނައިޓެޑް ސަލާމަތްވީ މިރޭ ރަށުންބޭރުގައި ބްރެންޓްފޯޑް އަތުން 2-1 އިން މޮޅުވެގެންނެވެ. ލީޑްސް މޮޅުވި ގޯލު ޖެހީ އިތުރު ވަގުތުގެ ހަތަރު ވަނަ މިނިޓްގަ އެވެ.
ޕްރިމިއާ ލީގުގެ އިންޑިވިޖުއަލް ޓްރޮފީ އަށް ބަލާއިރު، އެންމެ ގިނަ ގޯލު ޖެހި ރަން ބޫޓު ލިބުނީ 23 ގޯލު ޖެހި ސަލާހު އާއި ޓޮޓެންހަމް ހޮޓްސްޕާސްގެ ސޮން ހެއުން މިން އަށެވެ. އެންމެ މޮޅު ކީޕަރުގެ އެވޯޑް ދިނީ ލިވަޕޫލްގެ ކީޕަރު އެލިސަން ބެކާ އާއި ސިޓީގެ ކީޕަރު އެޑަސަން މޮރާއޭސް އަށެވެ. ދެ ކީޕަރުން ވެސް ވަނީ 20 މެޗު ގޯލެއް ނުވައްދައި ފުރިހަމަކޮށްފަ އެވެ.
