ނިއު ދިއްލީ، އިންޑިއާ (މެއި 18) - އިންޑިއާގެ ސުޕްރީމް ކޯޓުން އެ ގައުމުގެ ފުޓްބޯޅަ ފެޑެރޭޝަން، ހިންގުން ތިން މެމްބަރުންގެ ކޮމިޓީއަކާ ހަވާލުކުރަން މިއަދު އަންގައިފި އެވެ.
އިންޑިއާ ފުޓްބޯޅަ ފެޑެރޭޝަން (އައިއެފްއެފް)ގެ ރައީސްގެ މަގާމުގައި ހުންނެވި، ޕްރަފުލް ޕަޓޭލް އަށް ގާނޫނީ ގޮތުން އެ މަގާމުގައި ދެން ނުހުރެވޭނެ ކަމަށް އިންޑިއާގެ ކުޅިވަރާބެހޭ ވުޒާރާއިން ވަނީ ދާދި ފަހުން ކަނޑައަޅައިފަ އެވެ.
އިންޑިއާ ފުޓްބޯޅައިގެ ރައީސްކަން ތިން ދައުރުކުރެއްވި، ޕްރަފުލްގެ އެންމެ ފަހުގެ ދައުރުގެ މުއްދަތު 2020 ޑިސެމްބަރަށް ހަމަވާނެ އެވެ. އިންޑިއާގެ ކުޅިވަރާ ބެހޭ މިނިސްޓްރީން ސުޕްރީމް ކޯޓަށް ފޮނުވި ސިޓީގައި ބުނެފައިވަނީ އިތުރަށް ފަސް ނުކޮށް އިންޑިއާ ފުޓްބޯޅައިގެ އިންތިހާބުވީ އެންމެ އަވަހަކަށް ބާއްވަން ޖެހޭނެ ކަމަށާއި މި ވަގުތު އިންޑިއާ ފުޓްބޯޅައިގެ އިސް ވެެރިންގެ ގޮތުގައި ޕްރަފުލްގެ ލީޑަޝިޕްގެ މެމްބަރުން ތިބީ ގާނޫނީ ހައިސިއްޔަތަކުން ނޫން ކަމަށެވެ.
އިންޑިއާ ފުޓްބޯޅަ ފެޑެރޭޝަނުގެ އަސާސީ ގަވާއިދު އިސްލާހު ކުރަން ޖެހޭ މައްސަލައެއް 2017 ވަަނަ އަހަރުން ފެށިގެން އިންޑިއާ ސުޕްރީމް ކޯޓުގައި އެބައޮތެވެ. އިންތިހާބެއް ނުބާއްވައި، ޕްރަފުލް ފާއިތުވި ދެ އަހަރު އިންޑިއާ ފުޓްބޯޅައިގެ އިސް ވެރިއެއްގެ ގޮތުގައި ހުންނެވީ، އިންޑިއާގެ ކުޅިވަރު ކޯޑުގައިވާ ގިނަ މާއްދާތަކާ ވެސް ހިލާފަށް ކަމަށް އިންޑިއާގެ ކުޅިވަރު ކޮމިއުނިޓީގެ އެކި ފަރާތްތަކުން އަންނަނީ ބުނަމުންނެވެ.
އަދި އެ މައްސަލަ ސުޕްރީމް ކޯޓުގައި ވީ އެންމެ އަވަހަކަށް ކުރިއަށް ގެންދަން އިންޑިއާގެ ސަރުކާރުން އައީ ބާރުއަޅަމުންނެވެ. ސަރުކާރުން އެދޭ ގޮތަށް، އިންޑިއާ ސުޕްރީމް ކޯޓުން މިއަދު ވަނީ ތިން މެމްބަރުންގެ ނޯމަލައިޒް ކޮމިޓީއެއްގެ ދަށަށް އެ ފެޑެރޭޝަން ހިންގުން ބަދަލުކުރަން އަންގައިފަ އެވެ.
ސުޕްރީމް ކޯޓުން ކަނޑައެޅި ތިން މެމްބަރުންގެ ކޮމިޓީގައި ހިމެނެނީ ރިޓަޔަކޮށްފައިވާ ޖަޖް، އަނިލް އާރް ދޭވް، ކުރީގެ ޗީފް އިލެކްޝަން ކޮމިޝަނަރު އެސްވައި ކުރޭޝީ އަދި އިންޑިއާ ގައުމީ ފުޓްބޯޅަ ޓީމުގެ ކުރީގެ ކެޕްޓަން ބާސްކަރު ގަންގޫލީ އެވެ. ސުޕްރީމް ކޯޓުން އަމުރުކޮށްފައިވަނީ، ޕްރަފުލް ޕަޓޭލްގެ ލީޑަޝިޕް އަތުން ބާރުތައް ނަގައި، މި ތިން މެމްބަރުންގެ ކޮމީޓީއާ ހަވާލުކުރުމަށެވެ. އަދި ވީ އެންމެ އަވަހަށް އިންޑިއާ ގާނޫނުގައިވާ ގޮތުގެ މަތިން، ފުޓްބޯޅަ ފެޑެރޭޝަނުގެ އިންތިހާބު ބޭއްވުމަށް ވެސް ވަނީ އަންގައިފަ އެވެ.
