ނިއުކާސަލް (މެއި 17) - އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑް އަތުން 2-0 އިން ބަލިވެ، އާސެނަލް ގަދަ ހަތަރެއްގެ ރޭހުގައި ޕްރެޝަރަށް ވެއްޓިއްޖެ އެވެ.
އާސެނަލް ރޭގެ މެޗަށް ނުކުތްއިރު، އެއް މެޗު އިތުރަށް ކުޅެގެން ޓޮޓެންހަމް ހޮޓްސްޕާސް އޮތީ ހަތަރު ވަނައިގަ އެވެ. އާސެނަލް މި މެޗުން ބަލިވުމުން އެ ޓީމަށް ގަދަ ހަތަރެއްގައި ނިންމުމުގެ އަމިއްލަ ބާރެއް ނެތެވެ. ޓޮޓެންހަމް ފަހު މެޗުގައި ނޮރިޗް ސިޓީ ދަނޑުގައި ޕޮއިންޓެއް ހޯދިޔަސް އެ ޓީމަށް ގަދަ ހަތަރެއް ޔަގީންވީ އެވެ. އެކަމަކު، ނޮރިޗް އަތުން ޓޮޓެންހަމް ބަލިވެ، އާސެނަލުން އަމިއްލަ ދަނޑުގައި އެވަޓަން ބަލިކޮށްފިނަމަ ގަދަ ހަތަރެއްގެ ފަހު ޖާގަ ލިބޭނީ އާސެނަލަށެވެ.
އާސެނަލް ބަލިވުމުން ޗެލްސީ އަށް ވަނީ ބާކީ ދެ މެޗު އޮއްވައި ގަދަ ހަތަރެއް ޔަގީންވެފަ އެވެ. ޗެލްސީ ތިން ވަނައިގައި އޮތީ 36 މެޗުން 70 ޕޮއިންޓް ހޯދައިގެންނެވެ. ޓޮޓެންހަމް ހަތަރެއްގައި އޮތީ 37 މެޗުން 68 ޕޮއިންޓާ އެކު އެވެ. ފަސް ވަނައިގައި އޮތް އާސެނަލަށް 37 މެޗުން ލިބުނީ 66 ޕޮއިންޓެވެ. އަންނަ އާދިއްތަ ދުވަހު ލީގުގެ ފަހު މެޗުތައް ކުޅޭއިރު، ޓޮޓެންހަމް ރަށުންބޭރުގައި ނޮރިޗް ސިޓީ ބަލިކޮށްފިނަމަ އެ ޓީމަށް ގަދަ ހަތަރެއް ޔަގީންވީ އެވެ.
ނިއުކާސަލް ދަނޑުގައި ރޭ ކުޅުނު މެޗު ފަށައިގެން ފުރަަތަމަ މިނިޓުން ފެށިގެން އެ ޓީމުން ދިޔައީ ކުރިއަށް ޖެހިގެން ގޯލެއް ޖެހޭތޯ މަސައްކަތް ކުރަމުންނެވެ. އެކަމަކު، ނިއުކާސަލްގެ ފޯވާޑް ކަލުމް ވިލްސަން އެރި ގިނަ ބޯޅަތައް ވަނީ އޮފްސައިޑްވެފަ އެވެ. އާސެނަލްގެ ބުކާޔޯ ސަކާ ޖެހި ބޯޅައެއް ވަނީ ބްލޮކްވެފަ އެވެ. ފުރަތަމަ ހާފުގެ ފަހު ކޮޅުގައި ނިއުކާސަލްގެ ސެއިން މެކްސިމައިން ޖެހި ޝޮޓް، އާސެނަލް ކީޕަރު އާރޮން ރަމްސްޑޭލް ވަނީ މަތަކޮށްފަ އެެވެ.
މެޗުގައި ނިއުކާސަލް ލީޑުނެގީ 55 ވަނަ މިނިޓްގަ އެވެ. ޖޮއެލިންޓަން ނެގި ހުރަހެއް ޑިފެންސް ކުރަން އުޅުމުގެ ތެރޭގައި ބެން ވައިޓް ޖައްސާލި ބޯޅަ ވަނީ ބައިކޮޅަށެވެ. މިއީ އަނިޔާއިން ރަނގަޅުވެގެން، އެނބުރި އައިސް ވައިޓް ކުޅުނު ފުރަތަމަ މެޗެވެ. މެޗުގެ 62 ވަނަ މިނިޓްގައި އޭރިއާތެރެއިން ވިލްސަން ޖެހި ބޯޅަ ދިޔައީ ހުރަސްދަނޑިމަތިންނެެވެ. އޭގެ ފަހުން ނިއުކާސަލްގެ މާފީ ޖެހި ޝޮޓެއް ކީޕަރު ރަމްސްޑޭލް ވަނީ ހުއްޓުވައިފަ އެވެ.
ނިއުކާސަލް އިން ދެ ވަނަ ގޯލެއް ޖަހަން ކުރި މަސައްކަތް ކާމިޔާބުވީ މެޗުގެ 85 ވަނަ މިނިޓްގަ އެވެ. ވިލްސަން ހިފައިގެން ދިޔަ ބޯޅައެއް ހުއްޓުވަން ކީޕަރު ރަމްސްޑޭލް އަތުން ޖައްސާލި ބޯޅަ އޭރިއާތެރެއިން ނިއުކާސަލްގެ ބްރޫނޯ ގިމާރޭސް އަށް ލިބުމުން އޭނާ ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
މިއީ ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ނިއުކާސަލް ގަތް ފަހުން ލީގުގެ ގަދަ ބާރެއް އަތުން ނިއުކާސަލަށް ލިބުނު ފުރަތަމަ ބޮޑު މޮޅެވެ.
