މިއުނިކް (މެއި 15) - ބަޔާން މިއުނިކް ޖާޒީގައި ދެން ނުފެނިދާނެ ކަމަށް އެ ޓީމުގެ ފޯވާޑް ރޮބަޓް ލެވަންޑޯސްކީ ބުނެފި އެވެ.
އަންނަ އަހަރު ޖޫން މަހުގެ ނިޔަލަށް ބަޔާންގެ ކޮންޓްރެކްޓްގައި ހުރި ލެވަންޑޯސްކީ، 33، މި ސީޒަނަށް ފަހު އެ ޓީމު ދޫކޮށްލާނެ ކަމަށް މީޑިއާގައި ވަނީ އަޑުފެތުރިފަ އެވެ. ރޭ ޖަރުމަނު ލީގުގެ މި ސީޒަނުގެ ފަހު މެޗުގައި ވުލްފްސްބާގާ ދެކޮޅަށް 2-2 އިން ބަޔާން އެއްވަރުވި މެޗަށް ފަހު ލެވަންޑޯސްކީ ވަނީ އަންނަ ސީޒަނުގައި އޭނާ ބަޔާނުން ނުފެނިދާނެ ކަމަށް ބުނެފަ އެވެ.
"މި ވެދާނެ އަހަރެން ބަޔާނަށް ކުޅެދިން އެންމެ ފަހު މެޗަށް. އެ ކަން 100 ޕަސެންޓް ޔަގީންކަމާ އެކު ނުބުނެވޭނެ، އަހަރެންގެ އުންމީދަކީ މީގެ ގޮތެއް ނިންމުން. އެއީ ކްލަބަށް ވެސް އަހަންނަށް ވެސް އެންމެ ރަނގަޅު ގޮތަށް ވާންޖެހޭ،" މި ފަހަރު ޖަރުމަނު ލީގުގައި 35 ގޯލު ޖަހައި، ސީޒަނުގައި ޖުމްލަ އެކު 50 ގޯލު ހަމަކުރި ލެވަންޑޯސްކީ ބުންޏެވެ.
ސްޕެއިނާއި ޕޮލެންޑްގެ މީޑިއާ ރިޕޯޓްތައް ބުނާގޮތުން ފާއިތުވި ދެ އަހަރު ފީފާގެ މޮޅު ކުޅުންތެރިޔާގެ މަގާމު ހޯދި ލެވަންޑޯސްކީ ދެން ފެންނާނީ ބާސެލޯނާ އިންނެވެ. ބާސެލޯނާ އިން ވަނީ ލެވަންޑޯސްކީ އަށް ތިން އަހަރުގެ ކޮންޓްރެކްޓެއް ހުށަހަޅާފައިވާ ކަމަށެވެ.
ބަޔާނުން ލެވަންޑޯސްކީ އަށް ދިން އާ ކޮންޓްރެކްޓްގައި ސޮއިނުކުރާނެކަން އޭނާ ވަނީ ކްލަބަށް އަންގައިފަ އެވެ. އެކަން ބަޔާންގެ ސްޕޯޓިން ޑިރެކްޓަރު ހަަސަން ސަލިހަމްދްޒިޗް ވަނީ މިރޭގެ މެޗުގެ ކުރިން މީޑިއާ އަށް ކަށަވަރުކޮށްދީފަ އެވެ. ސަލިހަމްދްޒިޗް ބުނީ ބަޔާނުން އަދިވެސް ނިންމައިގެން ހުރީ ލެވަންޑޯސްކީ ކޮންޓްރެކްޓް އާ ކުރުވުމަށް ކަމަށާއި އިތުރު މަޝްވަރާ ބައްދަލުވުންތަކެއް ކުރިއަށް އޮތް ދުވަސްތަކުގެ ތެރޭގައި ބާއްވާނެ ކަމަށެވެ.
ލެވަންޑޯސްކީ ވަނީ މިހާތަނަށް ބަޔާނަށް ކުޅެދިން 373 މެޗުން 343 ގޯލު ޖަހައިފަ އެވެ. ބަޔާނާ އެކު 19 ތަށި ހޯދިއިރު، އޭގެ ތެރޭގައި ޗެމްޕިއަންސް ލީގާއި ކްލަބް ވޯލްޑް ކަޕް އެއް ފަހަރު ޖަރުމަނު ލީގު އަށް ފަހަރު ހިމެނެ އެވެ.
ޕޮލެންޑްގެ ލެޗް ޕޮޒްނަން އަށް ކުރިން ކުޅުނު ލެވަންޑޯސްކީ ބޮޑަށް ފާހަގަވާން ފެށީ 2010 ވަނަ އަހަރު ޑޯޓްމަންޑަށް ބަދަލުވި ހިސާބުންނެވެ. ފަހުން 2014 ވަނަ އަހަރު ބަޔާން އަށް ބަދަލުވުމަށް ފަހު މިހާތަނަށް ވަނީ ލަނޑު ޖެހުމުގެ ގިނަ ރެކޯޑްތަކެއް މުގުރާލައިފަ އެވެ.
