އަންނަ އަހަރު ޗައިނާގައި ބޭއްވުމަށް ހަމަޖެހިފައިވާ އޭޝިއަން ކަޕް ކޮވިޑްގެ ސަބަބުން އެ ގައުމުގައި ހޯސްޓް ކުރެވެންނެތް ކަމަށް ނިންމައި އެކަން އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އަށް އަންގައިފި އެވެ.
"އޭޝިއަން ކަޕް 2023" ޗައިނާގެ 10 ސިޓީއެއްގައި ބާއްވަން ނިންމާފައި އޮތީ އަންނަ އަހަރުގެ ޖޫން 16 އިން ޖުލައި 16 އަށެވެ. ޗައިނާ އަށް މުބާރާތް ބޭއްވުމުގެ ފުރުސަތު ދިނީ 2019 ގެ ޖޫން މަހު އޮތް އޭއެފްސީގެ އެކްސްޓްރާ އޯޑިނަރީ ކޮންގްރެސްގަ އެވެ.
ޗައިނާގައި ކޮވިޑުގެ ހާލަތު މި ވަގުތު އޮތް ގޮތަށް ބަލާއިރު އެ ގައުމުގައި އަންނަ އަހަރު މި މުބާރާތް ފުރިހަމައަށް ބޭއްވޭނެ ގޮތެއް ނެތްކަމަށް މިހާރު އެ ގައުމުގެ ފުޓްބޯޅަ އިދާރާ އިން ވަނީ އޭއެފްސީ އަށް އަންގައިފަ އެވެ.
ކޮވިޑްގެ ސަބަބުން މި އަހަރު ޗައިނާގައި ބާއްވަން އޮތް އޭޝިއަން ގޭމްސް ފަސްކޮށްފައިވާއިރު، އަހަރުގެ ފަހުކޮޅު ބާއްވަން އޮތް އޭޝިއަން ޔޫތު ގޭމްސް ވަނީ ކެންސަލްކޮށްފަ އެވެ.
އަންނަ އަހަރުގެ އޭޝިއަން ކަޕް ޗައިނާގައި ނުބާއްވާނެކަން މިހާރު ޔަގީންވެފައިވާއިރު، މިހާތަނަށް 13 ޓީމެއްވަނީ މުބާރާތަށް ކޮލިފައިވެފަ އެވެ. ބާކީ 11 ޓީމު ހޮވުމަށް ކުޅޭ ކޮލިފައިން ފަހު ބުރުގެ މެޗުތައް ކުޅުމަށް ހަމަޖެހިފައިވަނީ އަންނަ ޖޫން މަހުގެ ތެރޭގަ އެވެ. އެއީ ސެންޓްރަލައިޒްކޮށް ވަކި ގްރޫޕްތައް އެކި ގައުމުތަކުގައި ހޯސްޓްކުރާ ގޮތަށެވެ.
ޗައިނާގައި މުބާރާތް ނުބޭއްވޭނެކަން އޭއެފްސީ އަށް އަންގާފައިވާއިރު، އޭއެފްސީ އިންވަނީ އެކަން ބަލައިގަނެފަ އެވެ. އަދި މުބާރާތް ބާއްވާނެ ގައުމަކާއި ގުޅޭ މައުލޫމާތު ކުރިއަށް އޮތް ދުވަސްތަކުގައި ހާމަކުރަމުން ގެންދާނެ ކަމަށް ބުނެފަ އެވެ.
މި މުބާރާތަށް ޗައިނާއިން ބޮޑު ހަރަދެއްކޮށް ގިނަ ތައްޔާރީތަކެއްވިކަން ފާހަގަކޮށްލަން ޖެހެ އެވެ. އޭގެ ތެރޭގައި މުބާރާތުގެ ލޯގޯ ލޯންޗުކޮށް މުބާރާތަށް ހާއްސަކޮށް ތައްޔާރުކުރި އާ ސްޓޭޑިއަމެއް ވެސް ވަނީ މިދިޔަ އަހަރު ހުޅުވައިފަ އެވެ.
އޭއެފްސީ އިން އޭޝިއަން ކަޕް ބާއްވާނެ ގައުމު ކަނޑައެޅުމުގައި 2027ގެ މުބާރާތް ބާއްވަން ޝައުގުވެރިކަން ފާޅުކޮށްފައިވާ ގައުމުތަކަށް އިސްކަންދޭނެ އެވެ. މި ވަގުތަށް ބަލާއިރު، 2027ގެ އޭޝިއަން ކަޕް ބާއްވަން ބިޑުކޮށްފައިވާ ފަސް ގައުމަކީ އިންޑިއާ، އިރާން، ސައުދީ އަރަބިއްޔާ، ގަތަރު އަދި އުޒްބަކިސްތާނެވެ.
