މިއުނިކް (މެއި 13) - ޕޮލެންޑް ގައުމީ ޓީމުގެ ފޯވާޑް ރޮބަޓް ލެވަންޑޯސްކީ، ބަޔާން މިއުނިކާ އެކު ހަދާފައިވާ ކޮންޓްރެކްޓް އާ ނުކުރާނެކަން އެ ކްލަބްގެ މެނޭޖްމަންޓަށް އަންގާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ފާއިތުވި ދެ އަހަރު ފީފާ އިން ހޮވާ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ހޯދި، ލެވަންޑޯސްކީ، 33، ބަޔާންގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. މި ފަހަރު ލެވަންޑޯސްކީ ކޮންޓްރެކްޓް އާ ނުކޮށްފިނަަމަ، އަންނަ އަހަރު އެއްވެސް އަގަކާ ނުލައި، ހިލޭ ޓްރާންސްފާއެއްގައި ޓީމު ދޫކޮށްލުމުގެ ފުރުސަތު ލެވަންޑޯސްކީ އަށް އޮންނާނެ އެވެ.
ބާސެލޯނާ އިން ލެވަންޑޯސްކީ ހޯދުމުގެ މަސައްކަތް ކުރަމުން އަންނައިރު، ބަޔާނުން އަންނަނީ ލެވަންޑޯސްކީ މަޑުކުރުވަން އެކި ގޮތްގޮތުން މަސައްކަތް ކުރަމުންނެވެ. ދާދި ފަހުން ޖަރުމަނުގެ މީޑިއާ އަކަށް ބަޔާންގެ ސީއީއޯ، ކުރީގެ ގޯލްކީޕަރު އޮލިވާ ހާން ބުނީ ލެވަންޑޯސްކީ ޔަގީނުން ވެސް އިތުރު އެއް އަހަރަށް އެ ކްލަބްގައި މަޑުކުރާނެ ކަމަށެވެ. އަދި އުންމީދަކީ ބަޔާން ޖޯޒީގައި ލެވަންޑޯސްކީ ކުޅޭ މުއްދަތް އެ އަށް ވުރެ ވެސް ދިގުވުން ކަމަށެވެ.
ޕޮލެންޑްގެ މީޑިއާ އަކުން ދާދި ފަހުން ރިޕޯޓްކޮށްފައިވާ ގޮތުގައި ލެވަންޑޯސްކީ ވަނީ ބާސެލޯނާއާ އެކު ތިން އަހަރުގެ ކޮންޓްރެކްޓެއް ހެދުމަށް އަނގަބަހުން އެއްބަސްވެފަ އެވެ. އެކަމަކު، ލެވަންޑޯސްކީ ބުނީ ބަޔާންގެ ކޮންޓްރެކްޓްގައި ހުރެ، އެހެން ކްލަބަކާ އެކު ސީދާ އެއްބަސްވުމަކަށް ނުދާ ކަަމަށެވެ. އެހެން ނަމަވެސް މުސްތަގުބަލާ ގުޅޭ މަޝްވަރާ އަބަދުވެސް އޭޖެންޓްގެ ޒަރިއްޔާ އިން ކުރިއަށްދާނެ ކަމަށް ލެވަންޑޯސްކީ ބުނެފައިވެ އެވެ.
ޕޮލެންޑްގެ ލެޗް ޕޮޒްނަން އަށް ކުރިން ކުޅުނު ލެވަންޑޯސްކީ ބޮޑަށް ފާހަގަވާން ފެށީ 2010 ވަނަ އަހަރު ޑޯޓްމަންޑަށް ބަދަލުވި ހިސާބުންނެވެ. ފަހުން 2014 ވަނަ އަހަރު ބަޔާން އަށް ބަދަލުވުމަށް ފަހު މިހާތަނަށް ވަނީ ލަނޑު ޖެހުމުގެ ގިނަ ރެކޯޑްތަކެއް މުގުރާލައިފަ އެވެ. މިދިޔަ އަހަރުތަކުގައި ބަޔާނުން ޖެހިޖެހިގެން ޖަރުމަނު ލީގު ދިފާއުކުރުމުގައި ލެވަންޑޯސްކީގެ ގޯލުތައް މުހިންމު ރޯލެއް ކުޅުނެވެ.
ލެވަންޑޯސްކީ ވަނީ މިހާތަނަށް ބަޔާނަށް ކުޅެދިން 373 މެޗުން 343 ގޯލު ޖަހައިފަ އެވެ. ބަޔާނާ އެކު 19 ތަށި ހޯދިއިރު، އޭގެ ތެރޭގައި ޗެމްޕިއަންސް ލީގާއި ކްލަބް ވޯލްޑް ކަޕް އެއް ފަހަރު ޖަރުމަނު ލީގު އަށް ފަހަރު ހިމެނެ އެވެ.
