ލިވަޕޫލް (މެއި 10) - އިނގިރޭސި ޕްރިމިއާ ލީގުގެ ތަށްޓަށް ވާދަކުރަމުން އަންނަ ރޭހުގައި، އިނގިރޭސި އެންމެން ސަޕޯޓްކުރަނީ ލިވަޕޫލަށް ކަމަށް ލީގުގެ އެއް ވަަނައިގައި އޮތް މެންޗެސްޓާ ސިޓީގެ ކޯޗު ޕެޕް ގާޑިއޯލާ އަށް ބުނެވުނީ ޖަޒުބާތުގައި ޖެހިގެން ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.
ސިޓީން އެންމެ ފަހުން ނިއުކާސަލް ޔުނައިޓެޑް އަތުން 5-0 އިން މޮޅުވެ، ލީގުގެ އެއް ވަނައިގައި ތިން ޕޮއިންޓަށް ލީޑުފުޅާކުރި މެޗަށް ފަހު ގާޑިއޯލާ ބުނީ އިނގިރޭސި އެންމެންނާއި މީޑިއާ ވެސް އޮތީ ލިވަޕޫލާ އެކުގައި ކަމަށާއި އެއީ އެ ޓީމުގެ ކާމިޔާބު ތާރީހެއް އޮތުމުން ކަމަށެވެ. އަދި ލިވަޕޫލުގެ ކާމިޔާބީ ފަހަކަށް އައިސް ބޮޑަށް އޮތީ ޔޫރަޕްގައި ކަމަށާއި ޕްރިމިއާ ލީގުގެ ޗެމްޕިއަންކަން ލިވަޕޫލުން ހޯދީ 30 އަހަރުގެ ތެރޭ އެއް ފަހަރު ކަމަށް ގާޑިއޯލާ ވަނީ ބުނެފަ އެވެ.
އެ ވާހަކަތަކާ ގުޅޭގޮތުން ކްލޮޕާ ސުވާލުކުރުމުން ބުނީ އިނގިރޭސި އެންމެން ލިވަޕޫލަށް ސަޕޯޓްކުރާކަން ނޭނގޭ ކަމަށެވެ.
"އަހަރެން މި އުޅެނީ ލިވަޕޫލްގައި ޔަގީނުން ވެސް މި ތަނުގައި ގިނަ ބަޔަކު އެދޭ އަހަރެމެން ލީގު ހޯދަން. އެކަމަކު، މި ތަނުގައި ވެސް 50 ޕަސެންޓް މީހުން އެ ގޮތަށް ނޭދޭ. އެއީ ދެން އޮތް ކްލަބްގެ ސަޕޯޓަރުން،" ކްލޮޕް ބުންޏެވެ.
ކްލޮޕް ބުނީ ގާޑިއޯލާގެ ވާހަކަތަކަކީ މެޗުގެ އޮއެވަރުގައި ޖަޒުބާތުގައި ޖެހިގެން ދެއްކުނު ވާހަކަ ކަމަށް ވެދާނެ ކަމަށެވެ. އަދި ސިޓީ އަށް ޗެމްޕިއަންސް ލީގުގައި ދިމާވި ގޮތާއި ލިވަޕޫލް އެ މުބާރާތުގެ ފައިނަލަށް ދިއުމުން ގާޑިއޯލާ އަށް ބުނެވެން ނުޖެހޭ އެއްޗެއް ޖަޒުބާތުގައި ޖެހިގެން ބުނެވިފައި އޮތީ ކަމަށް ކްލޮޕް ދެކެ އެވެ.
"ކޯޗެއްގެ ގޮތުގައި އަހަންނަށް ވެސް ޖަޒުބާތުގައި ޖެހިގެން ބުނަން ނުޖެހޭ ވާހަކަ ދެއްކޭ. ދާދި ފަހުން ވެސް އެކަން ހިނގައިފި. މިސާލަކަށް ބަލަމާ ޓޮޓެންހަމް މެޗަށް. އަހަރެން ބުނިން ޓޮޓެންހަމް ކުޅޭނެއޭ އެ ގޮތަށް އެ މީހުން އެ އޮތީ ލީގުގެ ފަސް ވަނައިގައޭ. އެ ވަގުތު އެހެން ބުނަން އަހަންނަށް ރަނގަޅު، އެކަމަކު، ފަހުން އެނގޭ އެއީ ގޯހެއް ކަން،" ކްލޮޕް ބުންޏެވެ.
"ތި ބުނާ ވާހަކަ ދެއްކިއިރު، ޕެޕް (ގާޑިއޯލާ) ހުރީ ކޮން ވިސްނުމެއްގައި ކަމެއް އަހަންނަކަށް ނުބުނެވޭނެ. ޗެމްޕިއަންސް ލީގުން ކަޓައިގެން ދިއުމަކީ ބަލައިގަންނަން އުނދަގޫ ކަމަކަށް ވެދާނެ. ދެން ލިވަޕޫލް ފައިނަލަށް ދިޔައީމަ ބަޔަކު ދައްކަން ހުރި ވާހަކައެއް ދައްކާނެ،"
އިނގިރޭސި ޕްރިމިއާ ލީގުގައި މިރޭ ލިވަޕޫލުން ރަށުންބޭރުގައި އެސްޓަން ވިލާއާ ދެކޮޅަށް ކުޅޭނެ އެވެ. އެ މެޗުން މޮޅުވެގެން ސިޓީއާ ޕޮއިންޓުގެ ގޮތުން އެއްވަރުކުރުމުގެ ފުރުސަތު ލިވަޕޫލް އަށް އެބައޮތެވެ. ލީގުގެ އެއް ވަނަ އަށް އަރާނަމަ ލިވަޕޫލް ޖެހޭނީ ހަތަރު ގޯލުގެ ތަފާތުން މޮޅުވާށެވެ. އެސްޓަން ވިލާ ދަނޑުގައި ލިވަޕޫލާ ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
