މެޑްރިޑް (މެއި 9) - ސްޕެނިޝް ލީގުގައި ރޭ ކުޅުނު މެޗުގައި ރެއާލް މެޑްރިޑްގެ 1-0 އިން ބަލިކޮށް އެތުލެޓިކޯ މެޑްރިޑުން ޗެމްޕިއަންސް ލީގަށް ކޮލިފައިވުމުގެ ރޭހުގައި ބޮޑު ފިޔަވަޅެއް ކުރިއަށް އަޅައިފި އެވެ.
މިއީ އެތުލެޓިކޯ އިން ފާއިތުވި ހަ އަހަރު ތެރޭ ރެއާލް އަތުން މޮޅުވި ފުރަތަމަ މެޗެވެ. އެންމެ ފަހުން އެތުލެޓިކޯ އިން ރެއާލް ބަލިކުރީ 2016 ވަަނަ އަހަރުގެ ފެބްރުއަރީ މަހުގަ އެވެ. މިއީ އެތުލެޓިކޯގެ ސްޓޭޑިއަމް ވަންޑާ މެޓްރޮޕޮލިޓާނޯގައި ރެއާލްގެ މައްޗަށް ހޯދި ފުރަތަމަ މޮޅެވެ. އެ ދަނޑު ހުޅުވީ 2017 ވަނަ އަހަރުގެ ސެޕްޓެމްބަރު މަހުގަ އެވެ. އެތުލެޓިކޯ އިން އެންމެ ފަހުން އަމިއްލަ ދަނޑުގައި ރެއާލް ބަލިކުރީ 2015 ވަނަ އަހަރު އެވެ.
ލީގު ޗެމްޕިއަންކަން ކަށަަވަރުކޮށްފައިވާ ރެއާލް އެއް ވަނައިގައި އޮތީ 35 މެޗުން 81 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް ވަނީ 35 މެޗުން 69 ޕޮއިންޓް ލިބިފަ އެވެ. ތިން ވަނައިގައި އޮތް ސެވިއްޔާ ވަނީ ރޭ ވިޔަރެއާލް ދަނޑުގައި 1-1 އިން އެއްވަރުވެފަ އެވެ. ސެވިއްޔާ އަށް ވަނީ 35 މެޗުން 65 ޕޮއިންޓް ލިބިފަ އެވެ. އެތުލެޓިކޯ ހަތަރެއްގައި އޮތީ 35 މެޗުން 64 ޕޮއިންޓާ އެކު އެވެ.
ރެއާލުން ރޭ އެތުލެޓިކޯއާ ދެކޮޅަށް ނެރުނީ ގިނަ ބަަދަލުތަކެއް ގެނެސްފައި އޮތް ޓީމެކެވެ. ޓީމުގެ ކެޕްޓަން ކަރީމް ބެންޒެމާ އާއި ތަޖުރިބާކާރު މިޑްފީލްޑަރު ލޫކަ މޮޑްރިޗްގެ އިތުރުން އެއް ވަނަ ގޯލްކީޕަރު ތިބައު ކޯޓުއާ މި މެޗުގައި ނުކުޅެ އެވެ. އެތުލެޓިކޯ އިން ރޭގެ މެޗުގައި ޖެހި ހަމައެކަނި ގޯލު ޖެހީ މެޗުގެ 40 ވަނަ މިނިޓްގައި ޕެނަލްޓީ އަކުން ޔަނިކް ކަރާސްކޯ އެވެ. މިއީ އެތުލެޓިކޯގެ މަޓެއުޒް ކޫންޏާ އަށް ކުރި ފައުލަކަށް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ.
ދެ ވަނަ ހާފުގައި އެތުލެޓިކޯ އަށް ލީޑުފުޅާކޮށްދޭން ކަރާސްކޯ ޖެހި ޝޮޓެއް ވަނީ ގޯލުގެ ދަނޑިއަށް އަމާޒުވެފަ އެވެ. ދެން އެތުލެޓިކޯ އިން ފޮނުވާލި ހަމަލާތައް ރެއާލްގެ ގޯލު ބެލެހެއްޓި އަންޑްރީ ލުނިން ވަނީ މަތަކޮށްފަ އެވެ.
ރެއާލަށް މި މެޗުގައި ގޯލެއް ޖަހައިދޭން މާކޯ އަސެންސިއޯ ޖެހި ޝޮޓެއް ބްލޮކްވިއިރު، ފެޑެރީކޯ ވަލްވޭޑޭ ފޮނުވާލި ހަމަލާތައް އެތުލެޓިކޯ ކީޕަރު ޔެން އޮބްލަކް ވަނީ މަތަކޮށްފަ އެވެ.
އަމިއްލަ ދަނޑުގައި ކުޅުނު ވިޔަރެއާލަށް ރޭގެ މެޗުގެ 85 ވަނަ މިނިޓްގައި ލީޑުނަގައިދިނީ ޖިއޮވާނީ ލޮ ސެލްސޯ އެވެ. އިތުރު ވަގުތުގެ ފަސް ވަނަ މިނިޓްގައި ސެވިއްޔާ އަށް އެއްވަރުކޮށްދިނީ ޖޫލްސް ކޫންޑޭ އެވެ.
