މުމްބާއީ (މެއި 8) - މިހާރު ކުރިއަށްދާ އިންޑިއަން ޕްރިމިއާ ލީގުގެ ޕްލޭ އޮފް ބުރުން ލަކްނޯ ސުޕަ ޖަޔަންޓްސް ޖާގަ ހޯދިއިރު، ރާޖަސްތާން ރޯޔަލް އަތުން ބަލިވެ، މުބާރާތުގެ ކާމިޔާބު ޓީމެއް ކަމަށްވާ ކޮލްކަތާ ނައިޓް ރައިޑާސް މުބާރާތުން ކަޓައިފި އެވެ.
ދުނިޔޭގެ އެންމެ އަގުބޮޑު ލީގުގެ ޕްލޭ އޮފް ބުރުން ޖާގަ ލިބެނީ ގަދަ ހަތަރު ޓީމަށެވެ. ދިހަ ޓީމު ވާދަކުރާ ލީގުގެ އެއް ވަނައިގައި މި ވަގުތު އޮތީ 16 ޕޮއިންޓް ހޯދައިގެން ލަކްނޯ އެވެ. ހަމަ އެ އަދަަދަށް ޕޮއިންޓް ހޯދައިން ނެޓް ރަން ރޭޓަށް ބަލާއިރު، ދެ ވަނައިގައި އޮތީ ގުޖުރާތު ޓައިޓަންސް އެވެ. މިހާތަނަށް ޕްލޭ އޮފްގެ ޖާގަ ޔަގީންވެފައިވަނީ މި ދެ ޓީމަށެވެ. ތިން ވަނައިގައި އޮތީ 14 ޕޮއިންޓާ އެކު ރާޖަސްތާނެވެ. އެ ޓީމަށް ބާކީ އޮތް ތިން މެޗުން ބޭނުންވަނީ އެއް މޮޅެވެ.
މުބާރާތުގެ އެންމެ ކާމިޔާބު ތިން ޓީމު ކަމަށްވާ މުމްބާއީ އިންޑިއަންސް، ޗެންނާއީ ސުޕަ ކިންގްސް އަދި ކޮލްކަތާ ނައިޓް ރައިޑާސް އޮތީ ތާވަލްގެ ފުލުގަ އެވެ. ތިން ޓީމު ވެސް ވަނީ މުބާރާތުން ކަޓައިފަ އެވެ.
ލީގު ބުރުގައި އެންމެ ފަހުން ކުޅުނު މެޗު ލަކްނޯ އިން ކާމިޔާބުކުރީ ކޮލްކަތާ އާއި ވާދަކޮށް 75 ލަނޑުންނެވެ. މެޗުގެ ފުރަތަމަ އިނިގްސްގައި ބެޓްކުރަން އަރައި ލަކްނޯ އިން ވަނީ 20 އޯވަރުގައި ހަތް ކުޅުންތެރިން ނުބައިވެގެން 176 ލަނޑު ހަދައިފަ އެވެ. އެ ޓީމުގެ އޯޕަނިން ބެޓްސްމަން ކުއެންޓިން ޑި ކޮކް 29 ބޯޅަ އިން 50 ލަނޑު ހެދި އިރު، ދީޕަކް ހޫޑާ ވަނީ 27 ބޯޅައިން 41 ލަނޑު ހަދައިފަ އެވެ.
ޖަވާބުގައި ކޮލްކަތާ ކުޅެން އަރައި 14.3 އޯވަރުގައި ހުރިހާ ކުޅުންތެރިން ނުބައިވެގެން ހެދުނީ 101 ލަނޑެވެ. އެ ޓީމަށް އެންމެ ގިނަ ލަނޑު ހަދައިދިން އަންދްރޭ ރަސެލް ވަނީ 19 ބޯޅައިން 45 ލަނޑު ހަދާފަ އެވެ. މި އިނިންގްސްގައި ލަކްނޯގެ އާވޭޝް ޚާން 3 އޯވަރުގައި 19 ލަނޑަށް ތިން ވިކެޓު ނެގިއިރު، ޖޭސަން ހޯލްޑަރު ވަނީ ތިން އޯވަރުގައި 31 ލަނޑަށް ތިން ވިކެޓު ނަގާފަ އެވެ.
މުބާރާތުގެ ޕްލޭއޮފް ބުރާ ގާތަށް ރާޖަސްތާން ޖެހިލީ ޕަންޖާބު ކިންގްސް އަތުން ހަ ވިކެޓުން މޮޅުވެގެންނެވެ. ވާދަވެރި މި މެޗު ރާޖަސްތާނުން ކާމިޔާބުކުރީ ފަހު އޯވަރުތަކުގައި ދެއްކި މޮޅު ކުޅުމާ އެކުގަ އެވެ.
ފުރަތަމަ ކުޅެން އަރައި ޕަންޖާބުން 20 އޯވަރުގައި ފަސް ކުޅުންތެރިން ނުބައިވެގެން 189 ލަނޑު ހެދި އެވެ. އެ ޓީމުގެ ޖޮނީ ބެއާސްޓްރޯ 40 ބޯޅަ އިން 56 ލަނޑު ހެދިއިރު، ޖަތިން ޝަރުމާ ވަނީ 18 ބޯޅައިން 38 ލަނޑު ހަދައިފަ އެވެ. މި އިނިންގްސްގައި ރާޖަސްތާންގެ ޔުޒްވެންދްރަ ޗަހާލް ހަތަރު އޯވަރުގައި 28 ލަނޑަށް 3 ވިކެޓު ނެގި އެވެ.
ރާޖަސްތާނުން ކުޅެން އަރައި ބާކީ ދެ ބޯޅަ އުކަން އޮއްވައި ހަތަރު ކުޅުންތެރިން ނުބައިވެގެން 190 ލަނޑު ހަދާ މެޗު ކާމިޔާބުކުރި އެވެ. އެންމެ ރަނގަޅަށް ކުޅުނީ 41 ބޯޅައިން 68 ލަނޑު ހެދި ޔަޝަސްވީ ޖެއިސްވާލް އާއި ފަހު ވަގުތު ކުޅެން އަރައި 16 ބޯޅަ އިން 31 ލަނޑު ހެދި ޝިމްރޮން ހެތުމަޔަރު އެވެ.
މުބާރާތުގައި މިއަދު ވެސް ދެ މެޗެއް ކުޅޭނެ އެވެ. މެންދުރު ފަހު ކުޅޭ މެޗުގައި ސަންރައިޒާސް ހައިދަރުއާބާދު ނުކުންނާނީ ރޯޔަލް ޗެލެންޖާސް ބެންގަލޫރާ ދެކޮޅަށެވެ. އަދި މިރޭ ކުޅޭ މެޗުގައި ޗެންނާއީ ސުޕަ ކިންގްސް ނުކުންނާނީ ޑެލީ ކެޕިޓަލްސް އާ ދެކޮޅަށެވެ.
