މެންޗެސްޓާ (މެއި 7) - މެންޗެސްޓާ ސިޓީން ހަރަދުކުރަނީ ހަމައެކަނި ޗެމްޕިއަންސް ލީގު ހޯދާކަށް ނޫން ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
މި ހަފްތާގައި ޗެމްޕިއަންސް ލީގުގެ ސެމީ ފައިނަލުން ހިތްދަތި ގޮތަކަށް ރެއާލް މެޑްރިޑް އަތުން ކެޓުމުން ސިޓީ އަށް އަންނަނީ ގިނަ ފާޑުކިޔުންތަކެއް އަމާޒުވަމުންނެވެ. ހާއްސަކޮށް، ސިޓީން ފުޓްބޯޅައިގައި ކުރިއަށްދާން ކުރާ ބޮޑު ހަރަދުތަކާ އެއްވަރުގެ ކާމިޔާބީއެއް ނުލިބޭ ކަމަށް ބުނެ މީޑިއާގައި ވާހަކަދެކެވެ އެވެ.
އިނގިރޭސި ޕްރިމިއާ ލީގުގައި މި ހަފްތާގެ މެޗުތަކުގެ ކުރިން އޮތް ނޫސްވެރިންގެ ބައްދަލުވުމުގައި ގާޑިއޯލާއާ ބޮޑަށް އަމާޒުވީ ޗެމްޕިއަންސް ލީގާ ގުޅޭ ސުވާލުތަކެެވެ. ސިޓީގައި މި ވަގުތު އޮތް ޓީމަށް ޗެމްޕިއަންސް ލީގު ހޯދިދާނެތޯ އެހުމުން ގާޑިއޯލާ ބުނީ އެއީ "ޔަގީންކަމާ އެކު ޖަވާބު ދެވޭނެ" ކަމެއް ނޫން ކަމަށެވެ.
"މި ކްލަބް ގަތް މީހުން މި ހުރިހާ ހަރަދެއް ނޫނީ ހުރިހާ ކަމެއް މި ކުރަނީ ހަމައެކަނި ޗެމްޕިއަންސް ލީގު ހޯދާކަށް ނޫން. އެ މީހުން އެކަން ކުރަނީ ވާދަކުރެވެން އޮތް ހުރިހާ މުބާރާތެއްގައި ވާދަކޮށް، ކާމިޔާބު ހޯދަން،" ގާޑިއޯލާ ބުންޏެވެ. "ތެދެއް، އަހަރެން ބޭނުން ޗެމްޕިއަންސް ލީގު ހޯދަން. ފަހަރެއްގައި ވެދާނެ އަހަރެންގެ ކިބައިގައި އެ މީހުންނަށް ޗެމްޕިއަންސް ލީގު ހޯދައިދެވޭނެ ފެންވަރު ނެތީ ކަމަށް. އެއްވެސް މީހަކަށް ނޭނގޭނެ އެހެން ކޯޗަކު ހުރެގެން ނޫނީ އެހެން ކުޅުންތެރިންތަކެއް ތިބެގެން މި ޓީމު ވާނެ ގޮތެއް ބުނަން،"
ޔޫއޭއީގެ މަހުޖަނު ޝެއިހް މަންސޫރު، ސިޓީ ގަތީ 2008 ވަނަ އަހަރު އެވެ. އޭގެ ފަހުން އެ ޓީމަށް ނުލިބޭ ބޮޑު ކާމިޔާބަކީ ޗެމްޕިއަންސް ލީގެވެ. ގާޑިއޯލާ ބުނީ ސިޓީ އަށް ޗެމްޕިއަންސް ލީގު ނުލިބުމަކީ ފެއިލްވުމެއް ނޫން ކަމަށެވެ.
އެންމެ ފަހުން ގާޑިއޯލާ ޗެމްޕިއަންސް ލީގު ހޯދީ 2011 ވަނަ އަހަރު ބާސެލޯނާއާ އެކު އެވެ. އޭގެ ފަހުން ބަޔާން މިއުނިކާއި ސިޓީގައި އެކަން ހާސިލެއްނުވެ އެވެ. މިދިޔަ އަހަރުގެ ޗެމްޕިއަންސް ލީގު ފައިނަލުން ސިޓީ ވަނީ ޗެލްސީ އަތުން ބަލިވެފަ އެވެެ.
ގާޑިއޯލާ ބުނީ ކްލަބެއްގެ ގޮތުގައި ސިޓީން ކުރިއަށްދާނަމަ ކުރަން ޖެހޭނެ އެއް ކަމަކީ ރެއާލް ދަނޑުގައި ނަތީޖާ އެނބުރުނު ގޮތުން ފިލާވަޅު ނަގައި ކުރިއަށް ދިއުން ކަމަށެވެ.
ސިޓީން މި ސީޒަނުގައި ދެން އަމާޒުހިފާފައިވަނީ އިނގިރޭސި ޕްރިމިއާ ލީގުގެ ޗެމްޕިއަންކަން ހޯދައި، ތަށްޓަކާ އެކު ސީޒަން ނިންމާލުމަށެވެ. ސިޓީ, މި ވަގުތު ލީގުގެ އެއް ވަނައިގައި އޮތީ ދެ ވަނައިގައި އޮތް ލިވަޕޫލަށް ވުރެ އެއް ޕޮއިންޓް އިތުރަށް ހޯދައިގެންނެވެ. ބާކީ އޮތް ހަތަރު މެޗުން މޮޅުވެއްޖެނަމަ ސިޓީ އަށް ލީގު ޗެމްޕިއަންކަން ލިބޭނެ އެވެ.
