ރޯމް (މެއި 6) - ޔުއެފާ ކޮންފަރެންސް ލީގުގެ ސެމީ ފައިނަލުގައި ރޭ ލެސްޓާ ސިޓީ އަތުން މޮޅުވެ، ރޯމާ އިން މުބާރާތުގެ ފައިނަލަށް ދަތުކުރުމާ އެކު އެ ޓީމުގެ ކޯޗު ހޯސޭ މޮރީނިއޯ އަށް ވަނީ ޔޫރަޕްގެ ކްލަބް ފުޓްބޯޅައިގެ މުބާރާތްތަކުގައި ހާއްސަ ރެކޯޑެއް ގާއިމްކުރެވިފަ އެވެ. އެ ރެކޯޑަށް ވުރެ، ރޭ މޮރީނިއޯ އަށް ހާއްސަ އެހެން ސަބަބެއް އޮތުމުން މެޗަށް ފަހު އޭނާ އަށް ރޮވުނެވެ.
މޮރީނިއޯ އަކީ ޔުއެފާ ކަޕް (ޔޫރޮޕާ ލީގު)، ޗެމްޕިއަންސް ލީގު އަދި ކޮންފަރެންސް ލީގުގެ ފައިނަލަށް ދަތުރުކުރި ފުރަތަމަ ކޯޗެވެ. އަދި މޮރީނިއޯ އަކީ އަކީ ތަފާތު ހަތަރު ކްލަބެއް ޔޫރަޕްގެ ފައިނަލަށް ގެންގޮސްދިން ފުރަތަމަ ކޯޗެވެ. މޮރީނިއޯ ވަނީ މީގެ ކުރިން ޔޫރޮޕާ ލީގާއި ޗެމްޕިއަންސް ލީގު ކާމިޔާބުކޮށްފަ އެވެ.
ކޮންފަރެންސް ލީގަކީ ޔުއެފާ އިން މި ސީޒަނުގައި މުޅިން އަލަށް ފެށި ކްލަބް ފުޓްބޯޅަ މުބާރާތެކެވެ. އެއީ ޔޫރަޕްގެ ކްލަބްތަކުގެ މެދުގައި ކުޅެވޭ ތިން ވަނަ ފަންތީގެ މުބާރާތެވެ.
ނެދަލެންޑްސްގެ ފެޔަނޫޑާއި ރޯމާ ކުޅޭ ކޮންފަރެންސް ލީގު ފައިނަލް އޮންނާނީ މި މަހު 25 ވަނަ ދުވަހު އަލްބޭނިއާގެ ޓިރާނާގަ އެވެ. މިއީ 1991 ވަނަ އަހަރުގެ ފަހުން ރޯމާ ކުޅޭ ފުރަތަމަ ޔޫރަޕްގެ ފައިނަލެވެ. އެ ފަހަރު ރޯމާ ކުޅުނީ ޔުއެފާ ކަޕްގެ ފައިނަލުގަ އެވެ. އިންޓަ މިލާން އަތުން ރޯމާ ބަލިވީ 2-1 އިންނެވެ.
ރޭ ލެސްޓާ އަތުން 1-0 އިން ރޯމާ މޮޅުވި މެޗަށް ފަހު އޮތް ނޫސްވެރިންގެ ބައްދަލުވުމުގައި މޮރީނިއޯ ބުނީ މެޗުގެ ފަހު ކަށިގަނޑަށް ފަހު އޭނާ އަށް ރޮވުނީ އެއީ ވަރަށް ޖަޒުބާތީ ވަގުތުކޮޅެއްގެ ގޮތުގައި އިހުސާސްވުމުން ކަމަށެވެ.
އަދި ކޮންފަރެންސް ލީގަކީ މި ވަގުތު ރޯމާ އަށް "ޗެމްޕިއަންސް ލީގު" ކަމަށް މޮރީނިއޯ ބުންޏެވެ.
"ރޯމާގެ ކޯޗުކަމާ ހަވާލުވެފައި އަހަންނަށް އިހުސާސް ކުރެވުނު މި ސިޓީގެ ހާއްސަކަން. އެކަމަކު، މިއީ މާ ބައިވަރު ޔޫރަޕްގެ ފައިނަލުތަކެއް ކާމިޔާބީތަކެއް ހޯދާފައިވާ ކްލަބެއް ނޫން ވީމަ ހާއްސަ ކަމެއް ކޮށްދެން އަހަރެން ބޭނުންވި. މިއީ އެ ފަދަ ކަމެއް ކުރެވުނު ވަގުތު," ރޮވުނު ސަބަބަށް އިޝާރާތްކޮށް މޮރީނިއޯ ބުންޏެވެ.
ރޭގެ މެޗަށް ފަހު މޮރީނިއޯ.
"ތެދެއް، އަހަރެންގެ ކެރިއަރުގައި މި އަށް ވުރެ ހާއްސަ ކާމިޔާބީ ހޯދިފައިވާނެ. އެކަމަކު، މީހުންގެ ހިތްހަމަޖެހުމަށް ބަލާއިރު، މިއީ އަހަންނަށް ކޮށްދެވުނު ބޮޑު ކަމެއްގެ ގޮތުގައި ދެކެނީ، މިއީ ރޯމްގެ މީހުން އުފާކުރާނެ ކަމެއް،"
އެންމެ ފަހުން މޮރީނިއޯ ކޯޗުކޮށްދިން ޓޮޓެންހަމް ހޮޓްސްޕާސްގެ ކޯޗުކަމުން އޭނާ ވަކިކުރީ އިނގިރޭސި ލީގު ކަޕް ބޯމަތިވެފައި އޮއްވަ އެވެ. މޮރީނިއޯ ބުނީ ފައިނަލެއްގެ ކުރިން ވަޒީފާ ގެއްލުމުގެ ހަނދާން އަބަދުވެސް ހުންނާނެ ކަމަށާއި ވިސްނުމަކީ ރޯމާ ގޮވައިގެން ކޮންފަރެންސް ލީގު ފައިނަލުގައި ސަޕޯޓަރުން ގަޔާވާނެ ކުޅުމެއް ދެއްކުން ކަމަށެވެ.
މޮރީނިއޯ ވަނީ ޕޯޓޯ އަށް ޔުއެފާ ކަޕާއި ޗެމްޕިއަންސް ލީގު، އިންޓަ މިލާނަށް ޗެމްޕިއަންސް ލީގު އަދި މެންޗެސްޓާ ޔުނައިޓެޑަށް ޔޫރޮޕާ ލީގުގެ ޗެމްޕިއަންކަން ހޯދައިދީފަ އެވެ. ރޯމާގެ ކޯޗުކަމާ މޮރީނިއޯ ހަވާލުވީ މިދިޔަ އަހަރުގެ މެއި މަހު ތިން އަހަރުގެ ކޮންޓްރެކްޓެއްގަ އެވެ.
