ޒިއުރިކް (މެއި 4) - މިދިޔަ ފެބްރުއަރީ މަހުން ފެށިގެން ޔޫކްރެއިން އަށް އަރައި ރަޝިއާ އިން ކުރަމުން އަންނަ ހަނގުރާމައިގެ ސަބަބުން ޔުއެފާ އިން އެންމެ ފަހުން ރަޝިއާއާ ދެކޮޅަށް އެޅި ފިޔަވަޅުތަކާ އެކު އެ ގައުމަށް ފުޓްބޯޅައިގައި ކުރިއަށްދިއުމަށް ކުރިމަތިވެފައިވާ ގޮންޖެހުންތައް ބޮޑުވެއްޖެ އެވެ.
މީގެ ކުރިން ވެސް ރަޝިއާއާ ދެކޮޅަށް ޔުއެފާ އާއި ފީފާ އިން ވަނީ ފިޔަވަޅުތަކެއް އަޅައިފަ އެވެ. އޭގެ ތެރޭގައި މި އަހަރު ފަހު ކޮޅު ގަތަރުގައި ބާއްވާ ފީފާ ވޯލްޑް ކަޕްގެ ޕްލޭއޮފުން ރަޝިއާ ބޭރުކޮށްލުމާއި ޗެމްޕިއަންސް ލީގުގެ ފައިނަލް ރަޝިއާގެ ޕީޓާސްބާގްގައި ކުޅެން އޮތްއޮތުން ފްރާންސްގެ ޕެރިހަށް ބަދަލުކުރުން ހިމެނެ އެވެ.
ރަޝިއާއާ ދެކޮޅަށް ޔުއެފާ އިން މީގެ ދުވަސް ކުރިން އެޅި އިތުރު ފިޔަވަޅުތަކަށް ބަލާއިރު، އަންނަ ސީޒަނުގައި ރަޝިއާގެ އެއްވެސް ކްލަބަކަށް ޔޫރަޕްގެ ކްލަބް ފުޓްބޯޅަ މުބާރާތެއްގައި ނުުކުޅެވޭނެ އެވެ. ރަޝިއާ އިން 2028 އާއި 2032 ވަނަ އަހަރުގެ ޔޫރޯ ހޯސްޓްކުރަން ކުރި ބިޑް ވަނީ އަނބުރާ ފޮނުވާލައިފަ އެވެ.
މީގެ އިތުރުން ޔުއެފާ އިން ވަނީ ކުރިއަށް އޮތް ނޭޝަންސް ލީގުގެ ފުޓްބޯޅަ މުބާރާތުގައި ރަޝިއާ ދަށް ޑިވިޝަނަށް ރެލިގޭޓްކޮށްލަން ނިންމައިފަ އެވެ. ރަޝިއާގެ އަންހެން ފުޓްބޯޅަ ޓީމަށް މި އަހަރުގެ ޔޫރޯ ފުޓްބޯޅަ މުބާރާތާއި އަންނަ އަހަރުގެ ވޯލްޑް ކަޕްގައި ވެސް ވާދަނުކުރެވޭނެ އެވެ. ރަޝިއާގެ ބަދަލުގައި އަންހެނުންގެ ޔޫރޯގައި ވާދަކުރާނީ އެ ޓީމު އަތުން ޕްލޭއޮފްގައި ބަލިވި ޕޯޗުގަލް އެވެ. އަދި ރަޝިއާ އަށް ޔުއެފާގެ އެއްވެސް ޔޫތު މުބާރާތެއްގައި އަދި ފުޓްސަލް މުބާރާތެއްގައި ވެސް ވާދަނުކުރެވޭ ގޮތް ވަނީ ހަދައިފަ އެވެ.
ރަޝިއާ އިން ވަނީ މީގެ ކުރިން ފީފާ އާއި ޔުއެފާ ގޮވައިގެން ކުޅިވަރުތަކުގެ މައްސަލަ ބަލާ ކޯޓު، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ގޮސްފަ އެވެ. އެކަމަކު، ކޯޓުގައި ރަޝިއާ އަށް އެ މައްްސަލަ ކާމިޔާބެއްނުވި އެވެ.
ޔޫކްރެއިނާ ދެކޮޅަށް ކުރަމުން އަންނަ ހަނގުރާމައިގެ ސަބަބުން ރަޝިއާ އަށް ފިޔަވަޅު އަޅާފައިވާ ކުޅިވަރަކީ ހަމައެކަނި ފުޓްބޯޅައެއް ނޫނެވެ. ޓެނިހުގެ ބައެއް މުބާރާތްތަކުގެ އިތުރުން އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ވެސް ވަނީ ރަޝިއާ އަށް ފިޔަވަޅު އަޅައިފަ އެވެ. ޔޫކްރެއިނާ ދެކޮޅަށް ރަޝިއާ އިން ކުރާ ހަނގުރާމަ އަށް ބެލަރޫސް އިން ތާއީދުކުރާތީ ބައެއް ކުޅިވަރުތަކުން ވަނީ ބެލަރޫސް އަށް ވެސް ފިޔަވަޅު އަޅައިފަ އެވެ.
