މެޑްރިޑް (މެއި 4) - ޗެމްޕިއަންސް ލީގުގެ ފައިނަލުގައި ކުޅެން ބޭނުންވަނީ ރެއާލް މެޑްރިޑާ ދެކޮޅަށް ކަމަށް ލިވަޕޫލްގެ މިސްރު ފޯވާޑް މުހައްމަދު ސަލާހު ބުނެފި އެވެ.
ލިވަޕޫލުން ވަނީ ރޭ ވިޔަރެއާލް ދަނޑުގައި ފަހަތުންއަރައި 3-2 އިން މޮޅުވެ، މި ފަހަރުގެ ޗެމްޕިއަންސް ލީގުގެ ފައިނަލުގެ ފުރަތަމަ ޖާގަ ޔަގީންކޮށްފަ އެވެ. ދެ ލެގަށް ބަލާއިރު ލިވަޕޫލަށް ކުރި ލިބުނީ 5-2 ގެ އެގްރިގޭޓުންނެވެ. ލިވަޕޫލުން ޗެމްޕިއަންސް ލީގުގެ ފައިނަލުގައި 10 ވަނަ ފަަހަރަށް (ފަސް އަހަރު ތެރޭ ތިން ވަނަ ފަހަރަށް) ކުޅެން ތައްޔާރުވަމުން އަންނަައިރު، އެ ޓީމާ ދެކޮޅަށް ނުކުންނާނެ ޓީމެއް އެނގޭނީ މިރޭ ރެއާލާއި މެންޗެސްޓާ ސިޓީ ކުޅޭ ދެ ވަނަ ސެމީ ފައިނަލަށް ފަހު އެވެ.
ރޭ ވިޔަރެއާލް މެޗަށް ފަހު ސަލާހު ބުނީ އޭނާ ބޭނުންވަނީ ރެއާލާ ދެކޮޅަށް ކުޅުމަށް ކަމަށެވެ.
"އަހަރެން ބޭނުމީ މެޑްރިޑާ ކުޅެން. ސިޓީ އަކީ ވެސް ވަރުގަދަ ޓީމެއް އެ މީހުންނާ ދެކޮޅަށް މި ސީޒަނުގައި ދެތިން ފަހަރަކު ކުޅެފިން . އަހަރެންގެ އަމިއްލަ ވިސްނުމުގައި ކޮން ޓީމެއް ތޯ އަހައިފިއްޔާ ބުނެވޭނީ މެޑްރިޑޭ،" ބީޓީ ސްޕޯޓްސް އަށް ދިން އިންޓަވިއުއެއްގައި ސަލާހު ބުންޏެވެ.
ރެއާލާއި ލިވަޕޫލް ވަނީ 2018 ވަނަ އަހަރު ޔޫކްރެއިންގެ ކިއޭވްގައި ހޯސްޓްކުރި ޗެމްޕިއަންސް ލީގުގެ ފައިނަލުގައި ބައްދަލުކޮށްފަ އެވެ. އެ ފަހަރު ލިވަޕޫލް ވަނީ 3-1 އިން ބަލިވެފަ އެވެ. އެ މެޗުގައި ސަލާހުގެ އެންމެ ބޮޑު އުސްއައްޔަކީ ރެއާލްގެ އޭރުގެ ޑިފެންޑަރު ސާޖިއޯ ރާމޯސް އާއި ސަލާހު ބޯޅަ ހޯދަން އުޅުމުގެ ތެރޭގައި ހިނގި ހާދިސާ އެވެ. ސަލާހުގެ އަތްމައްޗަށް ރާމޯސް ވެއްޓުނުއިރު، އެ އަނިޔާ އަށް ފަހު ސަލާހަށް ނުކުޅެވިގެން ފަހުން ޖެހުނީ ބަދަލުކުރާށެވެ.
2018 ވަނަ އަހަރުގެ ފައިނަލުގައި ސަލާހު (ކ) އަތުން ބޯޅަ ހޯދަން ރާމޮސް މަސައްކަތްކުރަނީ.
ސަލާހުގެ ވިސްނުމަކީ އޭގެ ބަދަލުހިފުންތޯ ސުވާލުކުރުމުން އޭނާ ބުނީ ވިސްނުން ހުރީ ރެއާލް އަތުން މޮޅެއް ހޯދުމަށް ކަމަށެވެ.
"ހަގީގަތުގައި އެ މީހުން އަތުން ފައިނަލުގައި ބަލިވެފައި އޮތީމަ، އަހަރެން ބޭނުމީ އެ މީހުން (ރެއާލް) ބަލިކޮށްފައި ވެސް ކާމިޔާބެއް ހޯދަން،" ސަލާހު، 29، ބުންޏެވެ.
މި ސީޒަނުގައި ސަލާހު ވަނީ ޖުމްލަ 30 ގޯލު ޖަހައި 15 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ސިޓީން ވަނީ މިދިޔަ ހަފްތާގައި އެ ޓީމު ދަނޑުގައި ކުޅުނު ފުރަތަމަ ލެގުން 4-3 އިން ރެއާލް ބަލިކޮށްފަ އެވެ. ރެއާލުން މިރޭ އަމިއްލަ ދަނޑުގައި ކުޅޭ ދެ ވަނަ ލެގުން ސިޓީގެ މައްޗަށް ދެ ގޯލުން ކުރި ހޯދައިގެން ނޫން ގޮތަކަށް ފައިނަލުން ޖާގަ ނުލިބޭނެ އެވެ. ރެއާލް އެއް ގޯލުގެ ފަރަގުން މޮޅުވެއްޖެނަމަ މެޗު އިތުރު ވަގުތު ކުޅެންޖެހި، ނަތީޖާއެއް ނުނެރެވިއްޖެނަމަ ޕެނަލްޓީ ޖަހަން ޖެހޭނެ އެވެ.
