މުމްބާއީ، އިންޑިއާ (2 މެއި) - މިހާރު ކުރިއަށްދާ އިންޑިއަން ޕްރިމިއާ ލީގު (އައިޕީއެލް)ގައި އެންމެ ފަހުން ކުޅުނު މެޗު ކާމިޔާބުކޮށް ލަކްނޯ ސުޕަ ޖަޔަންޓްސް މުބާރާތުގެ ޕްލޭ އޮފް ބުރުން ޖާގަ ހޯދުމަށް ފިޔަވަޅަކާ ކައިރިއަށް ޖެހިލިއިރު، އެންމެ ފަހުގެ ޗެމްޕިއަން، ޗެންނާއީ ސުޕަ ކިންގްސް އިން ލީގު ބުރުގެ ތިން ވަނަ މޮޅު ހޯދައިފި އެވެ.
ދުނިޔޭގެ އެންމެ އަގުބޮޑު ލީގުގެ އެއްވަނައިގައި މިވަގުތު އޮތީ 16 ޕޮއިންޓާ އެކު ގުޖުރާތެވެ. އެ ޓީމުން މިހާތަނަށް ކުޅުނު ނުވަ މެޗުގެ ތެރެއިން އަށް މެޗު ކާމިޔާބުކޮށް ޕްލޭއޮފް ބުރުން ޖާގަ ޔަގީންކޮށްފައިވާއިރު، ލަކްނޯ ދެވަނައިގައި އޮތީ ހަތް މޮޅާ އެކުގަ އެވެ. އެ ޓީމަށް ބާކީ އޮތް ހަތަރު މެޗުން ޕްލޭ އޮފްގެ ޖާގަ އެއް ހޯދަން ބޭނުންވަނީ އެންމެ މޮޅެކެވެ. އަނެއް ކޮޅުން ހައިދަރުއާބާދު އަތުން މޮޅުވެ ޗެންނާއީ ވަނީ މުބާރާތުގައި ދެމި އޮތުމުގެ އުއްމީދު ދަމަހައްޓައިފަ އެވެ.
ފޯރިގަދަ ކުރިމަތިލުންތަކެއް ފެންނަމުން އަންނަ އައިޕީއެލްގެ މިއަހަރުގެ މުބާރާތުގައި އަލަށް ވާދަކުރަމުން އަންނަ ލަކްނޯ އެންމެ ފަހުން ކުޅުނު މެޗު ކާމިޔާބުކުރީ ޑެލީ ކެޕިޓަލްސް އާ ވާދަކޮށް އެންމެ ހަ ލަނޑުންނެވެ.
މެޗުގައި ލަކްނޯ އިން ފުރަތަަމަ ކުޅެން އަރައި 20 އޯވަރުގައި ތިން ކުޅުންތެރިން ނުބައިވެގެން 195 ލަނޑު ހެދި އެވެ. ކެޕްޓަން ކޭއެލް ރާހުލް 51 ބޯޅައިން 77 ލަނޑު ހެދިއިރު، ދީޕަކް ހޫޑާ 34 ބޯޅައިން 52 ލަނޑު ހެދި އެވެ. މި އިނިންގްސްގައި ލަކްނޯގެ ތިން ކުޅުންތެރިން ވެސް ނުބައިކުރީ ޝާދުލް ޓާކުރެވެ.
ޑެލީ ކެޕިޓަލްސް ކުޅެންއަރާ 20 އޯވަރުގައި ހަތް ކުޅުންތެރިން ނުބައިވެގެން ހެދުނީ 189 ލަނޑެވެ. ފެށުން ގޯސްކޮށް ދިޔުމުގެ ސަބަބުން ޑެލީގެ މުހިންމު ކުޅުންތެރިންނަށް މާ އެދެވޭ ކުޅުމެއް ނުދެއްކުނު މި އިނިންގްސްގައި އެންމެ ގިނަ ލަނޑު ހެދި ކެޕްޓަން ރިޝަބް ޕަންޓް އަށް ހެދުނީ 44 ލަނޑެވެ. އަކްސަރު ޕަޓޭލް ފަހު ވަގުތު ކުޅެން ނުކުމެ 24 ބޯޅައިން 42 ލަނޑު ހެދި އެވެ.
ލަކްނޯ މެޗުން މޮޅުކޮށްދިނުމުގައި މުހިންމު ދައުރެއް އަދާކުރީ މެޗުގެ މޮޅު ކުޅުންތެރިޔާގެ މަގާމް ހޯދި ބޯލަރު މުހްސިން ހާން އެވެ. އޭނާވަނީ ހަތަރު އޯވަރުގައި 16 ލަނޑަށް ހަތަރު ވިކެޓު ނަގައިފަ އެވެ.
މުބާރާތުގެ އެންމެ ފަހުގެ ޗެމްޕިއަން ޗެންނާއީ ވަނީ ހައިދަރުއާބާދު އަތުން މުހިންމު މޮޅެއް ހޯދާފަ އެވެ. މޮޅުވާން މަޖުބޫރުވެފައި އޮތް މެޗުން ޗެންނާއީ މޮޅުވީ 13 ލަނޑުންނެވެ.
ސީޒަން ފެށިއިރު ކެޕްޓަންކަން ހަވާލުކުރި ރަވިންދްރަ ޖަދޭޖާގެ ބަދަލުގައި ބާކީ ހުރި މެޗުތަކަށް ކުރީގެ ކެޕްޓަން މަހިންދުރަ ސިންގް ދޯނީ ހަމަޖައްސައި ކުޅުނު ފުރަތަމަ މެޗުގައި އެ ޓީމުން ކުޅެން އަރައި ކުޅުންތެރިން ނުބައިވެގެން 202 ލަނޑު ހެދި އެވެ. މެޗުގެ މޮޅު ކުޅުންތެރިޔާގެ މަގާމް ހޯދި ރުތުރާޖު ގައިކްވާޑް 57 ބޯޅައިން 99 ލަނޑު ހެދިއިރު، ޑެވޮން ކޮންވޭ ވަނީ ނުބައިނުވެ 55 ބޯޅައިން 85 ލަނޑު ހަދާފަ އެވެ.
ޖަވާބުގައި ހައިދަރުއާބާދުން ކުޅެން ނުކުމެ 20 އޯވަރުގައި ހަ ކުޅުންތެރިން ނުބައިވެގެން ހެދުނީ 189 ލަނޑެވެ. އެ ޓީމުގެ ކެޕްޓަން ކޭން ވިލިއަމްސަން 37 ބޯޅައިން 47 ލަނޑު ހެދިއިރު، ނިކޮލަސް ޕޫރަން ވަނީ ނުބައިނުވެ 33 ބޯޅައިން 64 ލަނޑު ހަދާފަ އެވެ. މި އިނިންގްސްގައި ޗެންނާއީގެ ފާސްޓް ބޯލަރު ހަތަރު އޯވަރުގައި 46 ލަނޑަށް ހަތަރު ވިކެޓު ނެގި އެވެ.
މުބާރާތުގެ ފަހު މެޗުތަކާއި ހަމައަށް ގޮސްފައިވާއިރު، ޕްލޭއޮފްގެ ޖާގަ އެއް ހޯދުމުގެ ފޯރި މިވަނީ ގަދަވެފަ އެވެ. މުމްބާއީ އިންޑިއަން ފިޔަވައި ހުރިހާ ޓީމަކަށް އަމިއްލަ ބާރު އޮތްއިރު، ޕްލޭއޮފުން ފުރުސަތު ދެން ލިބޭނީ ބާކީ އޮތް އަށް ޓީމުގެ ތެރެއިން ތިން ޓީމަކަށެވެ. ސަބަބަކީ ގުޖުރާތު ޕްލޭއޮފް ބުރުން ޖާގަ ޔަގީންކޮށްފައި އޮތުމެވެ.
މުބާރާތުގައި މިއަދު ކުޅޭ މެޗުގައި ވާދަކުރާނީ ރާޖަސްތާން ރޯޔަލްސް އާއި ކޮލްކަތާ ނައިޓްރައިޑާސް އެވެ.
