ލަންޑަން (މެއި 1) - އިނގިރޭސި ޕްރިމިއާ ލީގުގައި މިރޭ އާސެނަލުން 2-1 އިން ވެސްޓް ހޭމް ޔުނައިޓެޑް ދަނޑުގައި މޮޅުވެ، ގަދަ ހަތަރެއްގައި ކޮންޓްރޯލް ދަމަހައްޓައިފި އެވެ.
އާސެނަލުން މިރޭގެ މެޗަށް ނުކުތްއިރު، ޓޮޓެންހަމް އޮތީ ހަތަރު ވަނައިގަ އެވެ. އެއީ ލެސްޓާ ސިޓީ އަތުން 3-1 އިން މޮޅުވެގެންނެވެ. އާސެނަލް ހޯދި މޮޅާ އެކު އަލުން ހަތަރު ވަނައިގައި އޮތީ 34 މެޗުން 63 ޕޮއިންޓާ އެކު އެވެ. ފަސް ވަނައިގައި އޮތް ޓޮޓެންހަމް ހޮޓްސްޕާސް އަށް ވަނީ 34 މެޗުން 61 ޕޮއިންޓް ލިބިފަ އެވެ. މިރޭ، އެވަޓަން އަތުން ބަލިވި ޗެލްސީ ތިން ވަނައިގައި އޮތީ 34 މެޗުން 66 ޕޮއިންޓާ އެކު އެވެ.
ލަންޑަން އޮލިމްޕިކް ސްޓޭޑިއަމްގައި މިރޭ ކުޅުނު މެޗުގައި އާސެނަލުން ލީޑުނެގީ 38 ވަނަ މިނިޓްގަ އެވެ. މިއީ ބުކާޔޯ ސަކާ ނެގި ކޯނަރަކުން ރޮބް ހޯލްޑިން ބޮލުން ޖެހި ގޯލެކެވެ. މިއީ ޕްރިމިއާ ލީގުގައި ކުޅުނު 81 މެޗުގެ ތެެރެއިން ހޯލްޑިން ޖެހި ފުރަތަމަ ގޯލެވެ.
އެކަމަކު، ފުރަތަމަ ހާފު ނިމެންދެން އާސެނަލަށް ލީޑު ނުހިފެހެއްޓުނެވެ. އެއީ މެޗުގެ 45 ވަނަ މިނިޓްގައި ވެސްޓް ހޭމްގެ ތަރި ޖެރޮޑް ބޮވެން އެ ޓީމަށް ނަތީޖާ ހަމަހަމަ ކޮށްދިނުމުންނެވެ. ވެސްޓް ހޭމްގެ ވްލަޑިމިއާ ސޯފާލް ނެގި ހުރަހެއް ކޮންޓްރޯލް ކުރުމަށް ފަހު ބޮވެން ވަނީ ގޯލުގެ ތިރީ ކަނަށް ބޯޅަ ފޮނުވާލައިފަ އެވެ.
ދެ ވަނަ ހާފްގައި އާސެނަލަށް އަލުން ލީޑުނަގައިދިން ގޯލު ޖެހީ ގަބްރިއެލް މަގަޅައެސް އެވެ. މިއީ، މެޗުގެ 54 ވަނަ މިނިޓްގައި ކޯނަރަކުން އޭރިއާ ތެރެއަށް އައި ބޯޅައެއްގައި އާސެނަލްގެ ގަބްރިއެލް މާޓިނެލީ ނެގި ހުރަހަކުން ގަބްރިއެލް ބޮލުން ޖެހި ގޯލެކެވެ.
މެޗުގައި އާސެނަލަށް އިތުރު ގޯލެއް ޖަހައިދޭން އެންމެ ރަނގަޅު ފުރުސަތުތައް ލިބުނީ ކުރިއަށް ކުޅުނު ޒުވާން ފޯވާޑް އެޑީ އެންކެޓިއޭ އަށެވެ. އޭނާ ޖެހި އެއް ބޯޅަ އަރިމަތިން ބޭރަށް ދިޔައިރު، އަނެއް ހަމަލާ ވެސްޓް ހޭމްގެ ކީޕަރު ލޫކަސް ފަބިއާންސްކީ ވަނީ މަތަކޮށްފަ އެވެ.
މި ނަތީޖާއާ އެކު އާސެނަލް ވަނީ ޕްރިމިއާ ލީގުގެ ތާރީހުގައި 617 މޮޅު ހަމަކޮށް ދެ ވަނަ އަށް އެންމެ ގިނަ މެޗުން މޮޅުވި ޓީމުގެ ޝަރަފް ހޯދައިފަ އެވެ. އެއް ވަނައިގައި އޮތީ 702 މެޗުން މޮޅުވި، މެންޗެސްޓާ ޔުނައިޓެޑް އެވެ. ތިން ވަނައިގައި އޮތީ 616 މޮޅާ އެކު ޗެލްސީ އެވެ.
ޓޮޓެންހަމުން މިރޭ ލެސްޓާ ކޮޅަށް ޖެހި ތިން ގޯލުގެ ތެރެއިން ދެ ގޯލު ޖެހީ ދެކުނު ކޮރެއާގެ ފޯވާޑް ސޮން ހެއުން މިން އެވެ. ސީޒަނުގައި ޖުމްލަ އެކު ސޮން މި ވަނީ 19 ގޯލު ޖަހައިފަ އެވެ. މިއީ ކެރިއަރުގައި ސޮން އެންމެ ގިނަ ލީގު ގޯލު ޖެހި ސީޒަނެވެ. ޓޮޓެންހަމްގެ އަނެއް ގޯލު ޖެހީ ހެރީ ކޭން އެވެ. ލެސްޓާގެ ގޯލު ޖެހީ އޭރިއާބޭރުން ފޮނުވާލި ބޯޅައަކުން ނައިޖީރިއާގެ ފޯވާޑް، ކެލެޗީ އިހެނާޗޯ އެވެ.
ޓޮޓެންހަމްގެ މި މެޗަކީ އެ ޓީމުގެ ކޯޗު އެންޓޯނިއޯ ކޮންޓޭ ޕްރިމިއާ ލީގުގައި އިރުޝާދުދިން 100 ވަނަ މެޗެވެ. ޗެލްސީ އާއި ޓޮޓެންހަމަށް ޕްރިމިއާ ލީގުގައި ކޯޗުކޮށްދިން ކޮންޓޭ ވަނީ 65 މެޗުން މޮޅުވެފަ އެވެ. އެއީ ސިޓީ އަށް ކުރިން ކޯޗުކޮށްދިން މެނުއަލް ޕެލެގްރީނީ ވެސް މޮޅުވި މެޗުގެ އަދަދެވެ. ފުރަތަމަ 100 މެޗުގެ ތެރެއިން އެންމެ ގިނަ މޮޅު ހޯދީ ސިޓިގެ މިހާރު ކޯޗު ޕެޕް ގާޑިއޯލާ އެވެ. އޭނާ ވަނީ 73 މެޗުން މޮޅުވެފަ އެވެ.
