ލަންޑަން (އޭޕްރީލް 30) - އިނގިރޭސި ޕްރިމިއާ ލީގުގައި މިރޭ ލިވަޕޫލާއި މެންޗެސްޓާ ސިޓީ ކުޅުނު މެޗުތަކުން މޮޅުވެ، ލީގުގެ ރޭހުގައި ބަދަލެއް ނައިސް އިތުރު ހަފްތާއެއް ނިންމާލަން ޖެހިއްޖެ އެވެ.
އެންމެ ފުރަތަމަ ލިވަޕޫލުން 1-0 އިން ނިއުކާސަލް ޔުނައިޓެޑް ބަލިކޮށް ވަގުތީގޮތުން އެއް ވަަނަ އަށް އެރި އެވެ. އެކަަމަކު، އޭގެ ހަތަރު ވަރަކަށް ގަޑިއިރު ފަހުން، ލީޑްސް ޔުނައިޓެޑް ދަނޑުގައި 4-0 އިން މޮޅުވެ، މެންޗެސްޓާ ސިޓީން ވަނީ އަލުން އެއް ވަނަ އަށް ޖެހިލައިފަ އެވެ.
ސިޓީ އެއް ވަނައިގައި އޮތީ 34 މެޗުން 83 ޕޮއިންޓާ އެކު އެވެ. ލިވަޕޫލް ދެ ވަނައިގައި އޮތީ 34 މެޗުން 82 ޕޮއިންޓް ހޯދައިގެންނެވެ. ދެ ޓީމަށް ވެސް ބާކީ އޮތީ ހަތަރު މެޗެވެ. ސިޓީ ހަތަރު މެޗުން މޮޅުވެއްޖެނަމަ އެ ޓީމަށް ޗެމްޕިއަންކަން ލިބޭނެ އެވެ. ލިވަޕޫލަށް ތަށި ލިބެން އޮތީ ސިޓީ އަށް އެއް މެޗުން ނަމަވެސް ޕޮއިންޓު ގެއްލި، ލިވަޕޫލް ހުރިހާ މެޗަކުން މޮޅުވެގެންނެވެ.
ނިއުކާސަލް ދަނޑުގައި މިރޭ ކުޅުނު މެޗުގައި ލިވަޕޫލްގެ ހަމައެކަނި ގޯލު ޖެހީ ނަބީ ކެއިޓާ އެވެ. މެޗުގެ 19 ވަަނަ މިނިޓްގައި ކެއިޓާ މި ގޯލު ޖެހީ އޭރިއާތެރެއިން ޑިއޯގޯ ޖޮޓާ ދިން ބޯޅައަކުންނެވެ. ކެއިޓާ ގޯލު ޖެހީ ނިއުކާސަލްގެ ގޯލްކީޕަރު މާޓިން ޑުބްރާވްކާ ކައިރިން ނައްޓާފައި، ގޯލު ރޮނގުމަތީގައި ހުރި ދެ ޑިފެންޑަރުން މެދުތެރެއިން ބޯޅަ ގޯލަށް ވައްދާލައިގެންނެވެ.
ގޯލު ޖެހުމަށް ފަހު ލިވަޕޫލް ކުޅުންތެރިން އުފާފާޅުކުރަނީ.--- ފޮޓޯ: އޭއެފްޕީ
ލިވަޕޫލްގެ ލީޑުފުޅާކުރަން ސަޑިއޯ މޭނާ ޖެހި ބޯޅަ އަރިމަތިން ބޭރަށް ދިޔައިރު، ލުއިޒް ޑިއާޒް އާއި ޖޮޓާ ފޮނުވާލި ހަމަލާތައް ހުއްޓުވީ ކީޕަރު ޑުބްރާވްކާ އެވެ. ނިއުކާސަލް އަށް ލިވަޕޫލްގެ ކީޕަރު އެލިސަން ބެކާ ކައިރިން މާ ނުރައްކާތެރި ހަމަލާތަކެއް ފޮނުވާލެވޭ ގޮތެއްނުވި އެވެ.
މިއީ ލިވަޕޫލުން މި ސީޒަނުގެ ހުރިހާ މުބާރާތެއްގައި ޖުމްލަ އެއްކޮށް ބަލާއިރު، މޮޅުވި 42 ވަަނަ މެޗެވެ. މިއީ އެ ކްލަބްގެ ރެކޯޑެކެވެ.
ލީޑްސްގެ އެލަންޑް ރޯޑުގައި ކުޅުނު މެޗުގައި ސިޓީން ލީޑުނެގީ ފުރަތަމަ ހާފުގެ 13 ވަނަ މިނިޓްގައި ފިލް ފޯޑެން ހިލޭޖެހުމަކުން ނެގި ބޯޅައަކުން ރޮޑްރީ ބޮލުން ޖެހި ގޯލުންނެވެ. ސިޓީން އަނެއް ތިން ގޯލު ޖެހީ ދެ ވަނަ ހާފުގަ އެވެ. ދެ ވަނަ ހާފުގެ ކުރީކޮޅުގައި ރުބެން ޑިއާސް ދިން ބޯޅައަކުން ނޭތަން އަކޭ ސިޓީގެ ލީޑުފުޅާކޮށްދިނެވެ. މެޗުގެ 78 ވަނަ މިނިޓްގައި ގަބްރިއެލް ޖީސޫސް ސިޓީގެ ތިން ވަނަ ގޯލު ޖެހީ ފޯޑެން ދިން ބޯޅައަކުންނެވެ. އަދި އިތުރު ވަގުތުގައި ފެނާންޑީނިއޯ ވަނީ ސިޓީގެ ހަތަރު ވަނަ ގޯލު ޖަހައިފަ އެވެ.
ލީގުގައި މިރޭ އެސްޓަން ވިލާ އަތުން 2-0 އިން ބަލިވެ، ނޮރިޗް ސިޓީ ވަނީ ރެލިގޭޓްވެފަ އެވެ. ނޮރިޗް މި ވަނީ އެންމެ ފަހުން އެ ޓީމު ޕްރިމިއާ ލީގުގައި ކުޅުނު ހަތަރު ސީޒަނުގައި ވެސް ރެލިގޭޓްވެފަ އެވެ. ނޮރިޗަކީ ޕްރިމިއާ ލީގުގެ ތާރީހުގައި ޖެހިޖެހިގެން ހަތަރު ފަހަރު ލީގުގައި ވާދަކޮށް ރެލިގޭޝަނާ ކުރިމަތިލި ދެ ވަނަ ޓީމެވެ.
ރެލިގޭޝަން ޒޯނުން ސަލާމަތްވާން މަސައްކަތްކުރަމުން އަންނަ ބާންލީން ވަނީ ފަހަތުން އަރައި 2-1 އިން ވަޓްފޯޑް ދަނޑުގައި މޮޅުވެފަ އެވެ. ކްރިސްޓަލް ޕެލަސް އިން ވަނީ ފަހަތުން އަރައި 2-1 އިން ސައުތެމްޓަން ބަލިކޮށްފަ އެވެ. އަދި އަމިއްލަ ދަނޑުގައި ކުޅުނު ވުލްވްސް އަތުން ރަނގަޅު ފޯމެއްގައި އޮތް ބްރައިޓަން މޮޅުވީ 3-0 އިންނެވެ.
