ފައިނަލުގައި މިއަދު ހަވީރު މޯލްޑިވްސް ސޮކަ މޭޓްސް 1-0 އިން ބަލިކޮށް، ހުޅުމާލެ ވެޓްރަންސް ކުލަބުން މެޗަކުން ބަލިނުވެ އެފްއޭއެމް ވެޓްރަންސް ލީގުގެ ޗެމްޕިއަންކަން ހޯދައިފި އެވެ.
ތިން އަހަރުގެ މެދުކެނޑުމަކަށްފަހު ބޭއްވި ވެޓްރަންސް ލީގުގެ ޗެމްޕިއަންކަން ފުރަތަމަ ފަހަރަށް ހުޅުމާލެ ވެޓްރަންސް ހޯދީ މޮޅަށް ކުޅެގެންނެވެ. . ފައިނަލާ ހަމައަށް އެ ޓީމު ލީގު ބުރުގައި ކުޅުނު ހަތް މެޗުގެ ތެރެއިން ފަސް މެޗު ކާމިޔާބުކުރި އެވެ. ދެ މެޗުން ވީ އެއްވަރެވެ.
ވަރުގަދަ ސްކޮޑަކާ އެކު ނުކުތް ހުޅުމާލެ ވެޓެރަންސް އާއި ސޮކަ މޭޓްްސް ބައްދަލުކުރި ފައިނަލް މެޗު ފެށީވެސް ވަރަށް ފޯރިގަދަ ކޮށެވެ. މިގޮތުން ފުރަތަމަ ހާފުގައި ގިނަ ފައުލްތަކެއް ފެނިގެންދިޔައިރު، ގިނަ ކާޑުތަކެއް ވެސް ފެނުނެވެ. މިހާފުގައި ގޯލް ޖަހާނެ އެންމެ ރަނގަޅު ފުރުސަތުތައް ލިބުނީ ހުޅުމާލެ ވެޓެރަންސް އަށެވެ.
ފައިނަލް މެޗު ފެށުމުގެ ކުރިން ސޮކަ މޭޓްސްގެ ކެޕްޓަން އައްސަދު (ކ) ހުޅުމާލެ ވެޓެރަންސް ކުޅުންތެރިންނާ ސަލާމްކުރަނީ.-- ފޮޓޯ: އަބްދުﷲ އިޔާން/ އަދަދު
އެ ގޮތުން މެޗުގެ ފުރަތަމަ ފަސް މިނެޓުގެ ތެރޭގައި އަރިމަތިން ކުޅުނު މުހައްމަދު ޒިޔާދަށް ރަނގަޅު ފުރުސަތެއް ލިބުނެވެ. މެދުތެރެއަށް ފުރަތަމަ ހާފުގައި ކުޅުނު އިސްމާއިލް މުހައްމަދު (އިއްސެ) ދިން ޕާހަކުން ޒިޔާދު އޭރިއާ ތެރެއަށް ވަދެ ފޮނުވާލި ބޯޅަ ދިޔައީ ގޯލާ އަމާޒު ނުވެ އެވެ. އޭގެ ފަހުން ހަމަ އެ ހިސާބުން އަބްދުﷲ ސުޖާއު (ސުޖާ) އަށް ދިން ބޯޅައިގެ ބޭނުމެއްވެސް ސުޖާއު އަށް ނުކުރެވުނެވެ.
މުހިންމު ފޯވާޑް އަލީ ޝަމީމް (ކޮޔަރު އައްޔަ) އަނިޔާގައި ހުރުމުން ފައިނަލް މެޗަށް އެ ޓީމާއި ގުޅުނު ފޯވާޑް އަބްދުލްމަޖީދު އިބްރާހިމް (މަޖިއްޓެ) އަށް ވެސް މި ހާފުގައި ރަނގަޅު ފުރުސަތެއް ލިބުނެވެ. އަހުމަދު ނާޒް (އާކޭ) ދިން ޕާހަކުން މަޖިއްޓެ އޭރިއާ ތެރެއަށް ވަދެ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ.
ފުރަތަމަ ހާފުގައި ސޮކަ މޭޓްސް އަށް ގޯލެއް ޖަހަން ލިބުނު އެންމެ ރަނގަޅު ފުރުސަތު ލިބުނީ އަހުމަދު މަމްދޫހު (ފެނާންޑޯ) އަށެވެ. އަރިމައްޗަށް ކުޅުނު އަލީ ނާސިފް ނަގައިދިން ބޯޅަ އޭރިއާ ތެރޭގައި ހުސްކޮށް ހުރެ ކޮންޓްރޯލް ކުރުމަށްފަހު ފެނާންޑޯ ފޮނުވާލި ބާރު ހަމަލާ ދިޔައީ ކީޕަރު މުހައްމަދު ޝިނާން (ނާނި) އާ ދިމާލަށެވެ.
މި ހާފު ނިމުމުގެ ކުރިން ސުޖާއު އަށް ގޯލެއް ޖަހަން ރަނގަޅު ފުރުސަތެއް ލިބުނެވެ. މި ފަހަރު ފޮނުވާލި ބޯލަ ކީބަރު ހުސައިން ހަބީބު (ހަބީ) ދިފާއުކުރި އެވެ.
ފުރަތަމަ ހާފާއި ހިލާފަށް ދެ ވަނަ ހާފުގައި ދެ ޓީމުގެ ކުޅުންތެރިން ވެސް ފެނުނީ ވަރުބަލިކޮށެވެ. މި ހާފުގައި އުފެއްދި ހަމަލާތަކުގެ އަދަދު ވެސް މަދެވެ. ފުރަތަމަ ހާފެކޭ އެއް ގޮތަށް މިހާފުގައި ވެސް ރަނގަޅު ފުރުސަތުތައް ހޯދީ ހުޅުމާލެ ވެޓްރަންސް އިންނެވެ.
ސޮކަ މޭޓްސްގެ އައްލޯ (ވ) ހުޅުމާލެ ޓީމުގެ ޝާހިދު ކައިރިން ބޯޅަ ހިފައިގެންދަނީ.-- ފޮޓޯ: އަބްދުﷲ އިޔާން/ އަދަދު
އެ ގޮތުން ފޯވާޑަށް ކުޅުނު މަޖިއްޓެ އާއި ސުޖާ އަށް ރަނގަޅު ދެ ފުރުސަތެއް ލިބި ބޭކާރުވި އެވެ. އޭގެ ފަހުން އެ ޓީމަށް ލިބުނު ކޯނަރަކުން އޭރިއާ ތެރެއަށް ހުރަސްވި ބޯޅަ މުހައްމަދު ޖަމީލް (ޖަމްބެ) ފޮނުވާލުމުން ބޭރަށް ދިޔައީ ހުރަސް ދަނޑީގައި ޖެހިފަ އެވެ.
މެޗުން މޮޅުވި ގޯލު ހުޅުމާލެ އަށް މެޗުގެ 48 ވަނަ މިނެޓުގަ ޖަހައިދިނީ ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދި އިއްސޭ އެވެ. އަހުމަދު ޝާހިދު ނަގައިދިން ހުރަހުން ސުޖާއު ބޮލުން ޖައްސާލި ބޯޅަ އިިއްސޭ ގޯލަށް ވައްދާލީ ގޯލު ރޮނގުމަތީގައި ހުރެފަ އެވެ. މި ގޯލަށް ފަހު ސޮކަ މޭޓްސް އިން ކުރިއަށް ޖެހިލައިގެން ކުޅުނު ނަމަވެސް ގޯލެއް ޖެހޭ ވަރުގެ ހުސް ފުރުސަތެއް ތަނަވަސް ނުކުރެވުނެވެ.
މުބާރާތުގެ މޮޅު ކުޅުންތެރިޔާގެ މަގާމާއި އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ ހުޅުމާލެ ވެޓްރަންސް ކުލަބުގެ ކެޕްޓަން އިއްސޭ އެވެ. އޭނާ މުބާރާތުގައި އަށް ގޯލު ޖެހި އެވެ.
އެންމެ މޮޅު ގޯލު ކީޕަރަކަށް ހުޅުމާލެ ޓީމްގެ ކީޕަރު ނާނީ ހޮވުނުއިރު، އެންމެ މޮޅު ކޯޗަކީ އެ ޓީމުގެ ކޯޗު އަހުމަދު ނިޔާޒު (ނިޔާ) އެވެ. ނިޔާ ވަނީ މީގެ ކުރިން ނިއު ރޭޑިއަންޓް ކުޅުންތެރިއެއްގެ ގޮތުގައި ހުރެ، ދެ ފަހަރު މި މުބާރާތް ކާމިޔާބުކޮށްފަ އެވެ. ނާނީ އަކީ އެންމެ ފަހުން 2019 ވަނަ އަހަރު މާޒިޔާ ސްޕޯޓްސް އެންޑް ރެކްރިއޭޝަނުން މި މުބާރާތް ކާމިޔާބުކުރިއިރު، މުބާރާތުގެ މޮޅު ކުޅުންތެރިޔާ އެވެ.
މުބާރާތުގެ މޮޅު ކުޅުންތެރިޔާ އިއްސޭ (ވ) އަށް އޮލިމްޕިކް ކޮމިޓީގެ ރައީސް ސައްތާރު ޓްރޮފީ ހަވާލުކޮށްދެއްވަނީ.-- ފޮޓޯ: އަބްދުﷲ އިޔާން/ އަދަދު
މުބާރާތުގެ ފެއާ ޕްލޭ ޓީމަކީ ލީގު ބުރުން ތިންވަނަ ހޯދި ދަ ގްރާންޑޭ ސްޕޯޓްސް ކުލަބެވެ. ދަ ގްރާންޑޭ އިން ފުރަތަމަ ފަހަރަށް ވެޓެރަންސް މުބާރާތެއްގައި ކުޅުނުއިރު، އެ ޓީމުގައި ތިބީ މާފުށްޓަށް ނިސްބަތްވާ ކުޅުންތެރިންނެވެ. ދަ ގްރާންޑޭ އިން ރަށުގައި ތިބެފައި އަންނަނީ ސީދާ މެޗަށެވެ.
މި މުބާރާތުގެ އިނާމް ދިނުމުގެ ރަސްމިއްޔާތުގައި މެދުކެނޑުމަކަށްފަހު އަލުން މި މުބާރާތް ބާއްވުމުގައި ޕާޓްނަރުގެ ގޮތުގައި ބައިވެރިވި ހުރިހާ ފަަރާތްތަކަށްވަނީ ހަނދާނީ ފިލައެއް ދީފަ އެވެ. އެފްއޭއެމުން މި ފަހަރުގެ މުބާރާތް ކްލަބް އިވެންޓްސްއާ ގުޅިގެން ކުރިއަށްގެދިޔައިރު، މުބާރާތުގެ އެހެން ޕާޓްނަރުން ވެސް ހިމެނެ އެވެ. އެ ގޮތުން އެހެން ޕާޓްނަރުންގެ ގޮތުގައި ތިބީ ދިރާގު، އެއްކާފް، ސްޕޯޓްސް އަދި އަދަދު ނޫހެވެ.
ފައިނަލް މެޗުގެ ޝަރަފްވެރި މެހެމާނަކީ މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ރައީސް މުހައްމަދު އަބްދުއްސައްތާރު (ޗަމްޕީ) އެވެ. އަރިހުގައި އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ބައިވެރިވެވަޑައިގެންނެވި އެވެ.
