މެންޗެސްޓާ (އޭޕްރީލް 30) - އިނގިރޭސި ޕްރިމިއާ ލީގުގެ މެޗުތަކުގެ ޝެޑިއުލްގެ ޝަކުވާ ކުރުމުގެ ވިސްނުމެއް މިހާރު ނެތް ކަމަށާއި އެކަން ކުރުމަށް ވުރެ، ދިވެހި ރާއްޖޭގެ ލީގަށް ގޮސް ރުށްދަށުގައި އުޅެލަން އަރާމްވާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިިއޯލާ ބުނެފި އެވެ.
އިނގިރޭސި ޕްރިމިއާ ލީގުގެ ފަހު ހަފްތާގައި ލިވަޕޫލުން ދެ މެޗު ކުޅެން ޖެހޭތީ ސިޓީއާ އެކު ލީގަށް ވާދަކުރަމުން އަންނަ ލިވަޕޫލްގެ ކޯޗު ޔާގެން ކްލޮޕް ވަނީ ޝަކުވާކޮށްފަ އެވެ. ޕްރިމިއާ ލީގުގެ މެޗުތައް ހަމަޖައްސަނީ ޓީވީ ޝެޑިއުލަށް ފަސޭހަވާނެ ގޮތަށް، ކްލަބްތަކާ މާބޮޑު މަޝްވަރާއެއް ނުކޮށް ކަމަށް މީގެ ކުރިން ވެސް ގާޑިއޯލާ ވަނީ ބުނެފަ އެވެ.
ސިޓީ މި ވަގުތު ލީގުގެ އެއް ވަަނައިގައި އޮތީ ދެ ވަނައިގައި އޮތް ލިވަޕޫލަށް ވުރެ އެއް ޕޮއިންޓް އިތުރަށް ހޯދައިގެންނެވެ.
ގާޑިއޯލާ ބުނީ މީގެ ކުރިން ޕްރިމިއާ ލީގުގައި މަސައްކަތްކުރި ގިނަ ކޯޗުން ވަނީ ލީގުގެ ޝެޑިއުލަށް ގެންނަ ބަދަލުތަކާ ބެހޭގޮތުން އެކަށީގެންވާ ވަރަށް މަޝްވަރާނުކުރާތީ ކަންބޮޑުވުން ފާޅުކޮށްފައި ކަމަށެވެ. ގާޑިއޯލާ މި ފަހަރު އެ ވާހަކަ ދެއްކީ މަޖާޒީ ގޮތަކަށެވެ. އޭނާ މިސާލު ޖެހީ އަބަދުވެސް އެ ފަދަ ކަންކަމުގައި ބޭނުންކުރާ ރާއްޖޭގެ ވާހަކަ ހިމަނައިގެންނެވެ.
"އެ މީހުން (ލީގުން) ހޮނިހިރު ދުވަހު ކުޅެން ބުނެފިއްޔާ އެ ދުވަހު ކުޅޭނަން. އެ މީހުން (ލީގުން) އަންގާރަ ދުވަހު ކުޅެން ބުނެފިއްޔާ އަންގާރަ ދުވަހު ވެސް ކުޅޭނަން. ބުރާސްފަތި ދުވަހު ވެސް ކުޅެފާނަން. އަހަރެން އެކަމާ ނުރުހުނަސް މައްސަލައެއް ނޯންނާނެ. މާ ގޯސްވިއްޔާ އަހަރެން ސިޓީގެ ކޯޗަކަށް ނުހުންނާނެ. އަހަރެން ދާނަން ރާއްޖޭގެ ލީގަށް، އޭރުން ހަފްތާ އަކު އެއް މެޗު ކުޅެން ޖެހޭނީ،" ގާޑިއޯލާ ބުންޏެވެ.
"އަހަރެން ވަރަށް ގަޔޭވޭ (ރާއްޖޭގައި) ރުށްދަށުގައި އަރާމްކުރަން ހުންނަން. އެއީ އެންމެ ހިތްހަމަޖެހޭ އެއް ކަންތައް،"
ގާޑިއޯލާ ވަނީ މި އަހަރުގެ ޖެނުއަރީ މަހުގައި ނޫސްވެރިންގެ ބައްދަލުވުމެއްގެ ތެރެއިން ވެސް ރާއްޖޭގެ ވާހަކަ ދައްކައިފަ އެވެ. އެ ފަހަރު ގާޑިއޯލާ ބުނީ ލީގުގެ އެއް ވަނައިގައި ސިޓީން އޭރު 11 ޕޮއިންޓަށް ލީޑުފުޅާކުރުމުން އެ ޓީމަށް ލީގުގެ ޗެމްޕިއަންކަން ލިބުނީ ކަމަށް ޕްރިމިއާ ލީގުގެ ޓީމުތަކުން ނިންމައި ތަށި ހަވާލުކޮށްފިނަމަ ދިވެހި ރާއްޖެ އަށް ޗުއްޓީ އަކަށް ދާނެ ކަމަށެވެ.
އޭގެ ކުރިން، ނޫސްވެރިންގެ ބައްދަލުވުމެއްގައި ގާޑިއޯލާ ވަނީ މެންޗެސްޓާ ޔުނައިޓެޑަށް ކޯޗުކޮށްދިނުމަށް ވުރެ، ރާއްޖޭގެ ކްލަބަކާ ހަވާލުވާން ނޫނީ ގޮލްފް ކުޅެން މާ ޝައުގުވެރިވާނެ ކަމަށް ވެސް ބުނެފަ އެވެ. ޖަރުމަނުގެ ބަޔާން މިއުނިކްގެ ކޯޗަކަށް ހުރިއިރު، ނޫސްވެރިންގެ ބައްދަލުވުމެއްގެ ތެރެއިން ގާޑިއޯލާ ބުނީ ފުޓްބޯޅައިގެ މާހައުލުން ދުރުވެލަން އޭނާ އަށް އެންމެ ހިތްގައިމީ ރާއްޖެ ކަމަށެވެ.
