އައްޑޫ ސިޓީގައި ސަރުކާރުގެ އޮފީސްތަކާއި އަމިއްލަ ކުންފުނިތަކުގެ އޮފީސްތަކަށް ހާއްސަ ފުޓްސަލް މުބާރާތް، "ދި ފޭދޫ ސްޕޯޓްސް ފުޓްސަލް ކަޕް 2022" އިއުލާނުކޮށްފި އެވެ.
ދި ފޭދޫ ސްޕޯޓްސްގެ ފަރާތުން އިންތިޒާމްކުރާ މި މުބާރާތް ކުރިއަށްދާނީ އައްޑޫ ސިޓީ ފޭދޫ ދަނޑުގަ އެވެ. މުބާރާތް ފަށަން ނިންމާފައިވަނީ އަންނަ ޖޫން މަހުގެ 10 ވަނަ ދުވަހު އެވެ.
ފޭދޫ ސްޕޯޓްސްގެ ފަރާތުން ބުނީ މުބާރާތް އެހާ ދުރާލާ އިއުލާނުކޮށްފައި މިވަނީ ބައިވެރިވާން އެދޭ ޓީމުތަކުން މައުލޫމާތު އޮޅުންފިލުވައި، މުބާރާތަށް ތައްޔާރުވާން އެކަށީގެންވާ ވަގުތު ދިނުމުގެ ގޮތުން ކަމަށެވެ.
މުބާރާތުގައި ބައިވެރިވުމުގެ ކަންކަން ދި ފޭދޫ ސްޕޯޓްސްގެ ފޭސްބުކް ޕޭޖާ ގުޅިގެން ކުރިއަށް ގެންދެވޭނެ އެވެ.
ލިންކް: ދި ފޭދޫ ސްޕޯޓްސް/ ފޭސްބުކް
ރާއްޖޭގެ އެކި ސަރަހައްދުތަކުގައި އޮފީސްތަކަށް ހުޅުވާލައިގެން މުބާރާތް ބޭއްވެއިރު، އެ ކަމަށް ލިބޭ ތަރުހީބު ވެސް ބޮޑެެވެ. އަދި ރާއްޖޭގެ މަޝްހޫރު ކުންފުނިތަކުގެ ޓީމުތައް މުބާރާތުގައި ބައިވެރިވެ އެވެ. އެ ގޮތުން ދި ފޭދޫ ސްޕޯޓްސް އިން ބާއްވާ މުބާރާތުގައި، ވެސް ސަރުކާރު ހިއްސާވާ ކުންފުނިތަކުގެ ޓީމުތައް ބައިވެރިވާނެ ކަމަށް ބެލެވެ އެވެ.
ފުޓްބޯޅައިގެ މަޝްހޫރު ސަރަހައްދެއް ކަމަށްވާ އައްޑޫ ސިޓީ އަކީ އަހަރެއްގެ މައްޗަށް ގިނަ މުބާރާތްތަކެއް ކުރިއަށްދާ ސަރަހައްދެކެވެ. އޭގެ ތެރެއިން ގިނައީ ފުޓްސަލް މުބާރާތްތަކެވެ.
އެ ގޮތުން ފާއިތުވި 10 ވަރަކަށް އަހަރު ފޭދޫ ސްޕޯޓްސް އިން ކުރިއަށް ގެންގޮސްފައިވާ ސްޓްރީޓްސް ސޮކާ މުބާރާތަކީ ޒުވާނުންގެ މެދުގައި މަގުބޫލު މުބާރާތެކެވެ. ކޮންމެ އަހަރެއްގައި ފޯރިގަދަކޮށް ކުރިއަށްދާ މި މުބާރާތަށް ބޮޑު ތަރުހީބެއް ލިބެ އެވެ.
އައްޑޫގައި ސަރުކާރު އޮފީސްތަކާއި އަމިއްލަ ކުންފުނިތަކުގެ އޮފީސްތަކަށް ހުޅުވާލައިގެން މި ބާއްވާ ފުޓްސަލް މުބާރާތުގެ ފޯރިގަދަ ކުރުމުގެ ގޮތުން ދި ފޭދޫ ސްޕޯޓްސް ކްލަބުން އަންނަނީ ގިނަ ކަންތައްތަކެއް ރާވަމުންނެވެ.
