ލިވަޕޫލް (އޭޕްރީލް 28) - އިނގިރޭސި ގަދަބާރު ލިވަޕޫލްގެ ކޯޗުގެ މަގާމުގައި އިތުރު ހަތަރު އަހަރަށް މަޑުކުރަން ޖަރުމަނުގެ ކޯޗު ޔާގެން ކްލޮޕް ނިންމައިފި އެވެ.
ލިވަޕޫލާ އެކު ކްލޮޕް ކުރިން ހަދާފައިވާ އެއްބަސްވުން 2024 ވަނަ އަހަރުގެ ޖޫން މަހުގެ ނިޔަލަށް ހަމަވާނެ އެވެ. އެކަމަކު، މިއަދު މި ސޮއިކުރި ކޮންޓްރެކްޓްގައިވާ ގޮތުން 2026 ވަނަ އަހަރުގެ ޖޫން މަހުގެ ނިޔަލަށް ކްލޮޕް ލިވަޕޫލްގައި މަޑުކުރާނެ އެވެ. އަދި ކްލޮޕްގެ ކޯޗިން ޓީމުގެ ކޮންޓްރެކްޓް ވެސް ވަނީ އާ ކޮށްފަ އެވެ.
ކުރިން ބޮރޫޝިއާ ޑޯޓްމަންޑަށް ކޯޗުކޮށްދިން، ކްލޮޕް، 2015 ވަނަ އަހަރު އޮކްޓޫބަރު މަހު ލިވަޕޫލް ކޯޗުކަމާ ހަވާލުވިއިރު، އޭނާ އަކީ މި ވަގުތު އިނގިރޭސި ޕްރިމިއާ ލީގުގައި ވާދަކުރަމުން އަންނަ ކްލަބްތަކުގެ ތެރެއިން އެއް ޓީމެއްގައި އެންމެ ގިނަ ދުވަސްވީ ކޯޗެކެވެ.
ލިވަޕޫލް ހިންގަމުން އަންނަ އެެމެރިކާގެ ކުންފުނި، އެފްއެސްޖީން ކްލޮޕަށް އާ ކޮންޓްރެކްޓެއް ދޭން ނިންމީ އޭނާ އެ ކްލަބްގައި ކުރަމުން އަންނަ މަސައްކަތް ރަނގަޅުވުމުންނެވެ.
ކްލޮޕް ބުނީ ލިވަޕޫލުން ކޮންޓްރެކްޓް އާ ކުރަން ހުށަހެޅުން ވަގުތުން އެ ޕްރޮޕޯސަލް ބަލައިގަންނަން ނިންމީ ދެ ވަަނަ ވިސްނުމެއް ނެތި ކަމަށެވެ. އެއީ ލިވަޕޫލަކީ އޭނާ ހިތުގައި ހާއްސަ މަގާމެއް ދެވިފައި އޮތް ކްލަބަކަށްވާއިރު، އެ ޓީމާ އެކު އިތުރު ކާމިޔާބީތަކެއް ހޯދޭނެ ކަމުގެ ޔަގީންކަން އޮތުމުން ކަމަށް ކްލޮޕް ބުނެ އެެވެ.
ކްލޮޕްގެ ކޯޗުކަމުގައި ލިވަޕޫލުން ވަނީ ޔުއެފާ ޗެމްޕިއަންސް ލީގާއި އިނގިރޭސި ޕްރިމިއާ ލީގާއި އިނގިރޭސި ލީގު ކަޕް، ޔުއެފާ ސުޕަ ކަޕް އަދި ފީފާ ކްލަބް ވޯލްޑް ކަޕްގެ ޗެމްޕިއަންކަން ހޯދައިފަ އެވެ. މީގެ ތެރެއިން ޕްރިމިއާ ލީގުގެ ޗެމްޕިއަންކަން ލިވަޕޫލުން ހޯދީ 30 އަހަރު ފަހުންނެވެ. އަދި ކްލަބް ވޯލްޑް ކަޕް ތަށި އުފުލާލީ ލިވަޕޫލް ތާރީހުގައި ފުރަތަަމަ ފަހަރަށެވެ.
ކްލޮޕްގެ ކޯޗުކަމުގައި މި ސީޒަނުގައި ލިވަޕޫލުން ވަނީ ލީގު ކަޕް ޗެމްޕިއަންކަން ހޯދައިފަ އެވެ. އޭގެ އިތުރުން މި ސީޒަނުގައި ބާކީ އޮތް ތިން މުބާރާތުގެ ތަށްޓަށް ވެސް ލިވަޕޫލުން ވާދަކުރެ އެވެ.
އަންނަ މަހު 14 ވަނަ ދުވަހު އެފްއޭ ކަޕްގެ ފައިނަލުގައި ޗެލްސީއާ ކުޅޭނެ އެވެ. ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި ރޭ ވިޔަރެއާލް އަތުން ލިވަޕޫލް ވަނީ 2-0 އިން މޮޅުވެފަ އެވެ. ޕްރިމިއާ ލީގުގެ ފަހު މެޗުތަކަށް ނުކުންނައިރު، ލިވަޕޫލް ދެ ވަނައިގައި އޮތީ އެއް ވަނައިގައި އޮތް މެންޗެސްޓާ ސިޓީ އަށް ވުރެ ދެ ޕޮއިންޓް މަދުން ހޯދައިގެންނެވެ.
