ލަންޑަން (އޭޕްރީލް 26) - ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި މިރޭ، ސްޕެއިނުގެ ރެއާލް މެޑްރިޑާ ކުޅޭ މެޗަކީ މެންޗެސްޓާ ސިޓީ އަށް ވަރުގަދަ އިމްތިހާނެއް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
ރެއާލާއި ސިޓީ ކުރިމަތިލާއިރު، ޗެމްޕިއަންސް ލީގުގެ ދެ ޓީމުގެ ތާރީހު ވަރަށް ތަފާތެވެ. ތޭރަ ފަހަރު މުބާރާތް ކާމިޔާބުކޮށް، ރެއާލް އަކީ ޗެމްޕިއަންސް ލީގުގެ ތާރީހުގައި އެންމެ ކާމިޔާބު ކްލަބެވެ. އަނެއްކޮޅުން، ސިޓީ އަށް އަދި މިހާތަނަށް ޗެމްޕިއަންސް ލީގުގެ ކާމިޔާބު ކުރެވޭ ގޮތެއް ނުވެ އެވެ. ޗެމްޕިއަންސް ލީގުގެ ފައިނަލްގައި މިދިޔަ ސީޒަންގައި ސިޓީ ކުޅުނު ނަަމަވެސް، ފައިނަލްގައި ޗެލްސީ އަތުން ވަނީ ބަލިވެފަ އެވެ.
މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ގާޑިއޯލާ ބުނީ މި މެޗަކީ ސިޓީ އަށް ވަރަށް ބޮޑު އިމްތިހާނެއް ކަމަށެވެ. އަދި ތާރީހަށް ބަލާއިރު، ސިޓީ އަށް ރެއާލްއާ ވާދަނުކުރެވޭނެ ކަމަށާއި އެކަމަކު، ރެއާލްއާ ރަނގަޅު ވާދައެއް ކުރެވޭނެ ފެންވަރު ސިޓީގައި އެބަހުރި ކަމަށް ގާޑިއޯލާ ގަބޫލުކުރެ އެވެ.
"ތާރީހަށް ބަލާއިރު، އަހަރަމެންނަށް ސިޓީއާ ވާދައެއް ނުކުރެވޭނެ. ރެއާލްއާ ދެކޮޅަށް ކުޅުމަކީ އަހަރަމެންނަށް ވަރަށް ބޮޑު އިމްތިހާނެއް. އަހަރަމެންނަށް ރެއާލްއާ ވާދަކުރެވޭނެ. އަހަރަމެން ޖެހޭނީ އެޓޭކްކޮށް، ބޯޅަ ހިފަހައްޓަން މަސައްކަތްކޮށް އަހަރަމެންގެ ގޭމް ކުޅެވޭތޯ ބަލަން،" ގާޑިއޯލާ ބުންޏެވެ.
ކުރިން ބާސެލޯނާއާ އެކު ޗެމްޕިއަންސް ލީގު ކާމިޔާބުކުރި ގާޑިއޯލާ ބުނީ ރެއާލްގައި ތިބި ކުޅުންތެރިން ޗެމްޕިއަންސް ލީގުގައި ހޯދާފައިވާ ތަޖުރިބާގެ ސަބަބުން، އެ ކްލަބަށް ފައިދާކުރާނެ ކަމަށެވެ.
"އެކަމަކު ދަނޑު މަތީގައި އަހަރެމެންގެ 11 ކުޅުންތެރިން މި ނުކުންނަނީ 11 ކުޅުންތެރިންނާ ދެކޮޅަށް. އެހެންވީމަ، ރަނގަޅަށް މަސައްކަތްކުރަންޖެހޭ،" ގާޑިއޯލާ ބުންޏެވެ.
ސިޓީ އާއި ރެއާލް ވަނީ 2016 ވަނަ އަހަރުގެ ޗެމްޕިއަންސް ލީގުގެ ސެމީ ފައިނަލްގައި ބައްދަލުކޮށްފަ އެެވެ. ސިޓީ ބަލިކޮށް، އެ ފަހަރު ފައިނަލަށް ދިޔައީ ރެއާލެވެ. އެކަމަކު، ސިޓީން އޭގެ ބަދަލު ހިފީ 2020 ވަނަ އަހަރު ޗެމްޕިއަންސް ލީގުގެ ގަދަ 16 ގައި ރެއާލް ކަޓުވާލައިގެނެވެ.
މި މެޗަށް ނުކުންނައިރު ސިޓީގެ ޔާއޯ ކަންސެލޯ ވަނީ މި މެޗަށް ސަސްޕެންޑްވެފަ އެވެ. އަދި ކައިލް ވޯކާ އާއި ޖޯން ސްޓޯންސް މެޗަށް ފިޓުވާނެ ކަމާމެދު ވަނީ ސުވާލު އުފެދިފަ އެވެ. -- އޭއެފްޕީ
