އަންނަ މަހު ބާއްވަން ނިންމާފައިވާ ވީއޭއެމް އެސޯސިއޭޝަން ކަޕްގެ އަންހެން އަދި ފިރިހެން ޑިިވިޝަނުގައި ބައިވެރިވުމުގެ ފުރުސަތު ހުޅުވާލައިފި އެވެ.
ވީއޭއެމުން އިއްޔެ ގެޒެޓްގައި ހިމަނައި، އެ އެސޯސިއޭޝަންގެ ސޯޝަލް މީޑިއާ ޕްލެޓްފޯމްތަކުގައި އިއުލާނުކޮށްފައިވާ ގޮތުގައި އަންނަ މަހު 19-30 އަށް ޒުވާނުންގެ މަރުކަޒު އެތެރެ ކޯޓުގައި ކުޅޭ އެސޯސިއޭޝަން ކަޕްގައި ބައިވެރިވާން ފޯމު ހުށަހެޅުމުގެ މުއްދަތު އަންނަ މަހުގެ ނުވަ ވަނަ ދުވަހަށް ހަމަވާނެ އެވެ. އަދި 12 ވަނަ ދުވަހުގެ ކުރިން ޓީމު ލިސްޓު ހުށަހަޅަން ޖެހޭނެ އެވެ.
އެސޯސިއޭޝަން ކަޕް އެންމެ ފަހުން ބާއްވާފައިވަނީ މީގެ ތިން އަހަރު ކުރިންނެވެ. ވީއޭއެމް ހިންގުން ނޯމަލައިޒްވުމާއި ކޮވިޑް-19ގެ ބްރޭކުގެ ސަބަބުން ކުޅިވަރަށް އައި ހުއްޓުމުގެ ތެރޭގައި މިދިޔަ އަހަރުތަކުގައި ލޯކަލް ވޮލީބޯޅަ މުބާރާތްތައް އޮތީ ހުއްޓިފަ އެވެ.
ވީއޭއެމް އިން އެސޯސިއޭޝަން ކަޕް ރާވާފައިވަނީ ފުރަތަމަ ޕްރިލިމިނަރީ ބުރެއް ކުޅޭ ގޮތަށެވެ. އެ ގޮތުން އެ ބުރުގައި ގިނަ ޓީމުތަކެއް ވާދަކުރާއިރު، އެ ތަނުން ފައިނަލަށް ހޮވޭ ދެ ޓީމެއް ފައިނަލް ބުރަށް ކޮލިފައިވާނެ އެވެ. ފައިނަލް ބުުރުގައި ޖުމްލަ ހަ ޓީމެއް ކުޅޭއިރު، މި ވަގުތު ހަތަރު ޖާގަ އޮތީ ޔަގީންވެފަ އެވެ. އެއީ ދިވެހި ސިފައިންގެ ކްލަބް، ޕޮލިސް ކްލަބް، ގުޑީސް ސްޕޯޓްސް ކްލަބް އަދި ސްޕޯޓްސް ކްލަބް ސިޓީ އެވެ.
މެއި މަހު އެސޯސިއޭޝަން ކަޕް ބޭއްވުމަށް ފަހު ޖޫން މަހުގެ ތެރޭގައި ވީއޭއެމްގެ ގައުމީ ލީގާއި ގައުމީ މުބާރާތް ކުރިއަަށް ގެންދިއުމަށް ވަނީ ޝެޑިއުލްކޮށްފަ އެވެ.
އެހެން އަހަރުތަކާ ހިލާފަށް ވީއޭއެމުން މިފަހަރުގެ ވޮލީބޯޅަ ސީޒަން ޝައުގުވެރިކޮށް ގެންދިއުމަށް ވަނީ ގިނަ ކަންތައްތަކެއް ރާވައިފަ އެވެ. އެގޮތުން ސަޕޯޓަރުންނަށް ގިނަ ފުރުސަތުތައް ލިބޭ ގޮތަށް ވޮލީ ސީޒަން ގެންދަން ނިންމާފައިވާއިރު، މުބާރާތް އިސްތިހާރުކުރަން ބަލާއިރު، މުޅިން އާ ކަންތައްތަކެއް މި ފަހަރުގެ ވޮލީބޯޅަ ސީޒަނުގެ ތެރެއިން ފެނިގެންދާނެ ކަަމަށް ވީއޭއެމުން މައުލޫމާތު ދެ އެވެ.
