މިލާން (އޭޕްރީލް 26) - އިޓާލިއަން ލީގުގައި ރޭ ފަހު ވަގުުތު ގޯލު ޖަހައި 2-1 އިން ސަސުއޯލޯ ބަލިކޮށް ޔުވެންޓަސް އިން ގަދަ ހަތަރެއްގެ ފުރުސަތު ބޮޑުކޮށްފި އެވެ.
ރޭގެ މޮޅާ އެކު ޔުވެންޓަސް އިން ވަނީ ހަތަރު ވަނައިގައި އަށް ޕޮއިންޓުގެ ލީޑެއް ނަގައިފަ އެވެ. ހަތަރެއްގައި އޮތް ޔުވެންޓަސް އަށް 34 މެޗުން ވަނީ 66 ޕޮއިންޓް ލިބިފަ އެވެ. ފަސް ވަނައިގައި އޮތް ރޯމާ އަށް 34 މެޗުން ވަނީ 58 ޕޮއިންޓް ލިބިފަ އެވެ. ޔުވެންޓަސް ވަނީ ލީގުގެ ތިން ވަނައިގައި އޮތް ނަޕޯލީއާ ޕޮއިންޓަކަށް ގާތަށް ޖެހިލައިފަ އެވެ. ނަޕޯލީ އަށް 34 މެޗުން ލިބިފައިވަނީ 67 ޕޮއިންޓެވެ.
އަމިއްލަ ދަނޑުގައި ކުޅެމުންދިޔަ ސަަސުއޯލޯ އިން މެޗު ފަށައިގެން ދިޔައީ ޔުވެންޓަސް ފަަހަތަށް ބާރު ބޮޑުކުރަމުންނެވެ. އެ ގޮތުން ސަސުއޯލޯގެ ކެޕްޓަން ޑޮމެނިކޯ ބެރާޑީ އޭރިއާބޭރުން ޖެހި ބޯޅަ ޔުވެންޓަސް ކީޕަރު ވޮޒްޝިއޭ ޝެޒްނީ ވަނީ މަތަކޮށްފަ އެވެ. އަދި ސަސުއޯލޯ ފޯވާޑް، ޖިއަކޯމޯ ރަސްޕަޑޯރީ ޖެހި ބޯޅަ އެއް ވެސް ހުއްޓުވީ ޝެޒްނީ އެވެ.
ރަނގަޅު އެޓޭކްތަކެއް ކުރަމުންދިޔަ، ސަސުއޯލޯ އިން ލީޑުނެގީ މެޗުގެ 38 ވަަނަ މިނިޓްގަ އެވެ. އޭރިއާތެރެއިން ބެރާޑީ ހުސްކޮށްލާފައި ރަސްޕަޑޯރީ އަށް ދިން .ބޯޅަ އޭނާ ވަނީ ގޯލުގެ ކައިރީ ކަަނަށް އަމާޒުކޮށްލައިފަ އެވެ.
ފުރަތަމަ ހާފު ނިމުމުގެ ކުރިން ޔުވެންޓަސް އަށް އެއްވަރުކޮށްދިނީ ޕައޮލޯ ޑިބާލާ އެވެ. މިއީ އޭރިއާތެރެއިން ޑެނިސް ޒަކަރިއާ ދިން ބޯޅައަކުން ޑިބާލާ ގޯލުގެ މަތީ ދާގަނޑަށް ބޯޅަ ފޮނުވާލައިގެން ޖެހި ގޯލެކެވެ.
ޔުވެންޓަސް އިން ފުރަތަމަ ހާފު ނިމުމުގެ ކުރިން އެއްވަރުކުރި ނަމަވެސް މޮޅުވި ގޯލު ޖަހަން ދިގު އިންތިޒާރެއް ކުރަން ޖެހުނެވެ. އެ ގޮތުން ޔުވެންޓަސް މޮޅުވީ މެޗުގެ 88 ވަނަ މިނިޓްގައި ގޯލު ޖަހައިގެންނެވެ. އަލެކްސް ސަންޑްރޯ ދިން ބޯޅައެއް ކޮންޓްރޯލްކޮށްލުމަށް މޮއިސް ކީން ވަނީ އޭރިއާތެރެއިން ޖާގައެއް ހޯދައި، ގޯލުގެ ތެރެއަށް ބޯޅަ ފޮނުވާލައިފަ އެވެ. ކީން ޖެހި ބޯޅަ ގޯލަށް ވަނީ ސަސުއޯލޯ ކީޕަރު އަންދްރެއާ ކިންސީލީ ފައިގައި ޖެހިފަ އެވެ.
