މުމްބާއީ، އިންޑިއާ (އޭޕްރީލް 26) - މިހާރު ކުރިއަށްދާ އިންޑިއަން ޕްރިމިއާ ލީގުގައި ޕަންޖާބު ކިންގްސް އަތުން ބަލިވެ، އެންމެ ފަހުގެ ޗެމްޕިއަން ޗެންނާއީ ސުޕަ ކިންގްސް ލީގު ބުރުން ކެޓުމުގެ ބިރާ ކުރިމަތިލާން ޖެހިއްޖެ އެވެ.
ދުނިޔޭގެ އެންމެ އަގު ބޮޑު ކްރިކެޓު ލީގުގެ އެންމެ ފަހުގެ ޗެމްޕިއަން ޗެންނާއީ މިހާތަނަށް ކުޅުނު އަށް މެޗުގެ ތެރެއިން މޮޅުވީ އެންމެ ދެ މެޗުންނެވެ. އެ ޓީމަށް ޕްލޭ އޮފް ބުރުން ފުރުސަތު އޮތީ ބާކީ ކުޅެން އޮތް ހަ މެޗުން މޮޅުވެގެންނެވެ. އެންމެ މެޗަކުން ދެން ބަލިވިޔަސް ޗެންނާއީ ލީގު ބުރުން ކަޓާނެކަން ޔަގީންވާނެ އެވެ. ޗެންނާއީ ކެޓުމާއި ގާތުގައި އޮތްއިރު، މުބާރާތުގެ އެންމެ ކާމިޔާބު ޓީމް މުމްބާއީ އިންޑިއަންސް ވަނީ މިހާތަނަށް ކުޅުނު އަށް މެޗުން ބަލިވެ ކަޓައިފަ އެވެ.
ޕަންޖާބު ކިންގްސް އަތުން ޗެންނާއީ ބަލިވީ 11 ލަނޑުންނެވެ. މެޗުގެ ޓޮސް ދިމާވުމުން ޗެންނާއީން ނިންމީ ފުރަތަމަ ޕަންޖާބަށް ބެޓްކުރަން ފުރުސަތު ދޭށެވެ.
ޕަންޖާބު ކުޅެން އަރައި 20 އޯވަރުގައި ހަތަރު ކުޅުންތެރިން ނުބައިވެގެން 187 ލަނޑު ހެދި އެވެ. މެޗުގެ މޮޅު ކުޅުންތެރިޔާގެ މަގާމް ހޯދި ޕަންޖާބުގެ ޝިކަރު ދަވަން ނުބައި ނުވެ 59 ބޯޅައިން 88 ލަނޑު ހެދިއިރު، ބަނުކާ ރާޖަޕަކްސަ 32 ބޯޅައިން 42 ލަނޑު ހެދި އެވެ.
ޖަވާބުގައި ޗެންނާާއީ ކުޅެން ނުކުމެ 20 އޯވަރުގައި ހަ ކުޅުންތެރިން ނުބައިވެގެން ހެދުނީ 176 ލަނޑެވެ. އެ ޓީމަށް ދިމާވި އެންމެ ބޮޑު މައްސަލައަކީ ހަތް އޯވަރު ނިމުނުއިރު މުހިންމު ތިން ބެޓްސްމަނުން ކަމަށްވާ ރޮބިން އުތައްޕާ، މިޝެލް ސެންޓްނާ އަދި ޝިވަން ދުބޭ ނުބައިވުމެވެ. އެންމެ ރަނގަޅަށް ކުޅުނީ 39 ބޯޅައިން 78 ލަނޑު ހެދި އަންބަތީ ރަޔޫޑޫ އެވެ. އެންމެ ފަހުން ކުޅުނު މެޗުގައި އެޓީމް މޮޅުކޮށްދިން ތަޖުރިބާކާރު ކުޅުންތެރިޔާ މަހިންދްރަ ސިންގް ދޯނީ އަށް ހެދުނީ އެންމެ 12 ލަނޑެވެ.
މި މެޗުން ހޯދި މޮޅާ އެކު ޕަންޖާބަށްވަނީ ޕްލޭ އޮފް ޖާގަ އެއް ހޯދުމުގެ އުއްމީދު އާވެފަ އެވެ. ބާކީ އޮތް ހަ މެޗުގެ ތެރެއިން އެ ޓީމް މޮޅުވާން ޖެހެނީ ހަތަރު މެޗުންނެވެ. އަދި މި މޮޅާ އެކު އެ ޓީމު ވަނީ ތާވަލްގެ ހަ ވަނައަށް ކުރިއަށް ޖެހިލާފަ އެވެ.
ޕްލޭ އޮފް ބުރަށް ކޮލިފައިވުމުގެ އެންމެ ފަހި ފުރުސަތެއް އޮތީ ގުޖުރާތު ޓައިޓަންސް އަށެވެ. ބާކީ އޮތް ހަތް މެޗުން އެ ޓީމަށް ބޭނުންވަނީ އެންމެ ދެ މޮޅެވެ. ސަންރައިޒާސް ހައިދްރާބާދު، ރާޖަސްތާން ރޯޔަލްސް، ލަކްނޯ ސުޕަ ޖަޔަންޓްސް އަދި ރޯޔަލް ޗެލެންޖާސް ބެންގަލޫރަށް ޕްލޭއޮފްގެ ޖާގަ އެއް ކަށަވަރު ކުރަން ބާކީ ހުރި މެޗުތަކުން ބޭނުންވަނީ ތިން މޮޅެވެ.
މުބާރާތުގައި މިރޭ ކުޅޭ މެޗުގައި ވާދަކުރާނީ ބެންގަލޫރާއި ރާޖަސްތާނެވެ. ރާއްޖެ ގަޑިން 18:30 ގައި ފަށާ މި މެޗަކީ ކުރިއަށް ހުރި މެޗުތަކުގެ ތެރެއިން އެންމެ ފޯރިގަދަ އެއް މެޗަށް ވާނެ އެވެ. ސަބަބަކީ ރާޖަސްތާން ރަނގަޅު ފޯމެއްގައި އޮތުމާއި، އެންމެ ފަހުން ކުޅުނު މެޗުގައި ބެންގަލޫރު ބޮޑު ތަފާތަކުން ބަލިވެފައި އޮތުމެވެ. މި ދެ ޓީމް ލީގު ބުރުގައި މީގެ ކުރިން ކުޅުނު މެޗު ފަސް ވިކެޓުން ކާމިޔާބުކުރީ ބެންގަލޫރެވެ.
