މެންޗެސްޓާ (އޭޕްރީލް 26) - ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި މިރޭ ރެއާލް މެޑްރިޑާއި މެންޗެސްޓާ ސިޓީ ކުރިމަތިލާއިރު، ޗެމްޕިއަންސް ލީގުގައި ރެއާލް އިން ހޯދާފައިވާ މުއްސަނދި ތާރީހަކީ ފައިދާއެއް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ތޭރަ ފަހަރު މުބާރާތް ކާމިޔާބުކޮށް، ރެއާލް އަކީ ޗެމްޕިއަންސް ލީގުގެ ތާރީހުގައި އެންމެ ކާމިޔާބު ކްލަބެވެ. އަނެއްކޮޅުން، ސިޓީ އަށް އަދި މިހާތަނަށް ޗެމްޕިއަންސް ލީގުގެ ކާމިޔާބު ކުރެވޭ ގޮތެއް ނުވެ އެވެ. ޗެމްޕިއަންސް ލީގުގެ ފައިނަލްގައި މިދިޔަ ސީޒަންގައި ސިޓީ ކުޅުނު ނަަމަވެސް، ފައިނަލްގައި ޗެލްސީ އަތުން ވަނީ ބަލިވެފަ އެވެ.
"މި މުބާރާތުގައި ރެއާލް އިން ހޯދާފައިވާ ކާމިޔާބީތަކުގެ މުހިންމުކަން މި ކްލަބަށް ވަރަށް ބޮޑަށް އިހުސާސްވޭ. މާޒީގައި ހޯދާފައިވާ ކާމިޔާބީތަކުގެ ސަބަބުން، މި ކްލަބުގެ ހައިބަތު އިހުސާސްކުރެވޭ. ރެއާލްގެ ޖޯޒީގައި ކުޅޭއިރު، ކުޅުންތެރިންގެ ކޮނޑުމަތީ އެޅިފައިވާ ބޮޑު ޒިންމާ އިހުސާސްކުރެވޭނެ. އެކަމަކު އެއީ ޕޮޒިޓިވް ގޮތެއްގައި،" އަންޗެލޮޓީ ބުންޏެވެ.
ސިޓީ އާއި ރެއާލް ވަނީ 2016 ވަނަ އަހަރުގެ ޗެމްޕިއަންސް ލީގުގެ ސެމީ ފައިނަލްގައި ބައްދަލުކޮށްފަ އެެވެ. ސިޓީ ބަލިކޮށް، އެ ފަހަރު ފައިނަލަށް ދިޔައީ ރެއާލެވެ. އެކަމަކު، ސިޓީން އޭގެ ބަދަލު ހިފީ 2020 ވަނަ އަހަރު ޗެމްޕިއަންސް ލީގުގެ ގަދަ 16 ގައި ރެއާލް ކަޓުވާލައިގެނެވެ.
ސިޓީގެ ދަނޑުގައި މިރޭ ކުޅޭ މެޗުގައި ރެއާލްގެ ބްރެޒިލް މިޑްފީލްޑަރު ކަސިމޭރޯ އަށް ކުޅެވޭނެކަމުގެ އުންމީދު ކުޑަ ކަމަށް އަންޗެލޮޓީ ބުންޏެވެ. ޑޭވިޑް އަލަބާ ވެސް ފިޓުވާނެކަމުގެ ޔަގީންކަމެއް ނެތެވެ. އެކަމަކު، ފްރާންސްގެ ޑިފެންޑަރު ފެރްލާންޑް މެންޑީ މާދަމާގެ ރޭގެ މެޗަށް ފިޓެވެ.
އަންޗެލޮޓީ އަށް އޮތް އެންމެ ބޮޑު ހިތްހަމަޖެހުމަކީ ޓީމުގެ ތަރި ކަރިމް ބެންޒެމާ ރަނގަޅު ފޯމެއްގައި ހުރުމެވެ. އެ ގޮތުން ގަދަ 16 ބުރުގައި ޕީއެސްޖީ އަތުންނާއި ކުއާޓާ ފައިނަލުގައި ޗެލްސީ އަތުން ރެއާލް މޮޅުވުމުގައި ބެންޒެމާ އިސް ރޯލެއް ކުޅުނެވެ. އަންޗެލޮޓީ ބުނީ ބެންޒެމާގެ ގޯލުތަކަށް ބަރޯސާވުން އެއީ މި ވަގުތަށް ރަނގަޅު ކަމެއް ކަމަށް ރެއާލްގެ މެޗުތަކުގެ ނަތީޖާ އިން ފެންނަން ހުރި ކަމަށެވެ.
