އެފްއޭއެމް ވެޓްރަންސް ލީގުގައި މިއަދު ހަވީރު ހުޅުމާލެ ވެޓްރަންސް ކުލަބާއި ދިވެހި ސިފައިންގެ ކުލަބު ކުޅުނު މެޗު 1-1 އިން އެއްވަރުވެއްޖެ އެވެ.
ލީގު ބުރުގައި މި ދެ ޓީމުގެ ފަހު މެޗަށް ނުކުތްއިރު، ހުޅުމާލެ ވެޓްރަންސް އިން ވަނީ ފައިނަލުން ޖާގަ ހޯދާފަ އެވެ. އަނެއްކޮޅުން ސިފައިންނަށް މި މެޗަކީ މުބާރާތުގެ ފަހު މެޗެވެ. މި މެޗުން ލިބުނު ޕޮއިންޓާ އެކު ހުޅުމާޅެ އޮތީ ހަ މެޗުން 14 ޕޮއިންޓް ހޯދައިގެން ލީގުގެ އެންމެ ކުރީގަ އެވެ. ސިފައިން އޮތީ ކުޅުނު ހަ މެޗުގެ ތެރެއިން އެއް މެޗުން މޮޅުވެ ހަތަރު މެޗު އެއްވަރުކޮށް އެއް މެޗުން ބަލިވެގެން ހޯދި ހަތް ޕޮއިންޓާ އެކު ތާވަލްގެ ހަތަރު ވަނައިގަ އެވެ.
ޓާފް އެއް ނަމްބަރު ދަނޑުގައި މިއަދު ހަވީރު ކުޅުނު މެޗަށް ނުކުތް އިރު ފައިނަލުން ޖާގަ ޔަގީންވެފައިވާތީ ހުޅުމާލެ ވެޓްރަންސް ޓީމުން ވަނީ ގިނަ ބަދަލުތަކެއް ގެނެސްފަ އެވެ. ދެ ޓީމަށް ވެސް މެޗުގައި ގޯލު ޖަހަން ތަނަވަސްކުރެވުނީ ނިސްބަތުން މަދު ފުރުސަތު ތަކެކެވެ.
ފުރަތަމަ ހާފު ފަށައިގެން ހުޅުމާލެ ޓީމްގެ އަބްދުﷲ ސުޖާއު (ސުޖާ) އަށް ރަނގަޅު ދެ ފުރުސަތެއް ލިބުނެވެ. ފުރަތަމަ ބޯޅަ އޭނާ ފޮނުވާލުމުގެ ކުރިން ކީޕަރު އިބްރާހިމް ރަޝީދު ނިކުމެ ހޯދި އެވެ. އޭގެ ފަހުން ފޮނުވާލި ބޯޅަ ދިޔައީ ގޯލާ އަމާޒު ނުވެ އަރިމަތިން ބޭރަށެވެ.
ހުޅުމާލެ ވެޓެރަންސް ޓީމުގެ ޝާހިދު ބޯޅަ ހިފައިގެން.-- ފޮޓޯ: މުހައްމަދު ޝާބިން/ އަދަދު
ސިފައިން ޓީމުން ފުރަތަމަ ހާފުގައި އުފެއްދި އެންމެ ނުރައްކާތެރި ހަމަލާ ފޮނުވާލީ މެދުތެރެއަށް ކުޅުނު މުހައްމަދު ނިލާމް އޭރިއާ ބޭރުން ފޮނުވާލި ހަމަލާ ގޯލުގެ ކަނަށް ވަންނަށް ދަނިކޮށް ކީޕަރު މުހައްމަދު ސިނާން (ނާނި) ދިފާއުކުރި އެވެ.
މެޗުގެ 20 ވަނަ މިނެޓުގައި ހުޅުމާލޭގެ ސުޖާ އަށް ގޯލެއް ޖަހަން ރަނގަޅު ފުރުސަތެއް ލިބުނެވެ. އަހުމަދު ނާޒު (އާކޭ) ދިން ބޯޅައަށް ކުރިއަށް އަރައި ގޯލުގެ މަތީ ކަނަށް ފޮނުވާލަން މަސައްކަތްކުރި ބޯޅަ ދިޔައީ ހުރަސް ދަނޑިމަތިން ބޭރަށެވެ. ހުޅުމާލެއިން ލީޑުނެގީ 23 ވަނަ މިނެޓުގަ އެވެ. މި ގޯލު ޖަހައިދިނީ އަހުމަދު ޝާހިދު އެވެ. މިއީ އާކޭ ދިން ހިތްގައިމު ބޯޅައަކަށް އަރައި ކީޕަރު އިބްރާހިމް ބޯމަތިން ޝާހިދު ޖެހި ގޯލެކެވެ.
މި ހާފުގައި ސިފައިން ކުލަބުން ފޮނުވާލި އެންމެ ނުރައްކާތެރި ހަމަލާ އުފެއްދީ ފުރަތަމަ ހާފު ނިމެން މިނެޓެކަށް ވެފައި ވަނިކޮށެވެ. އެ ޓީމަށް ލިބުނު ކޯނަރަކުން އޭރިއާ ތެރެއަށް އައި ބޯޅަ ހުޅުމާލެ ޓީމަށް ދިފާއު ނުކުރެވިގެން އުޅެނިކޮށް ސިފައިން ޓީމުގެ އަފުރާހު އިބްރާހިމް ބާރު ހަމަލާއެއް ފޮނުވާލި އެވެ. އެ ބޯޅަ ކުޅުމުގެ ތެރެއަށް އައީ ގޯލުގެ މަތީ ދަނޑީގައި ޖެހިފަ އެވެ.
ދެ ވަނަ ހާފުގައި ދެ ޓީމުން ވެސް ފެނުނީ ނިސްބަތުން ދަށް ކުޅުމެކެވެ. ގިނަ މިސް ޕާސްތަކެއް ފެނުނުއިރު ނުރައްކާތެރި ހަމަލާތައް ވެސް ފެނުނީ މަދުންނެވެ. މި ހާފުގެ ކުރީކޮޅު ސިފައިން ޓީމަށް ނަތީޖާ ހަމަހަކަ ކޮށްދިނީ މުހައްމަދު އަމީން އެވެ. އަރިމަތިން މޫސާ މަޒުހަރުއްދީން ނަގައިިދިން ހުރަސް ފުރަތަމަ ބޮލުން ފޮނުވާލީ އަލީ ފާރޫގެވެ. އޭނާ ފޮނުވާލި ބޯޅަ ކީޕަރު ނާނީ އަތުގައި ޖެހިފައި ނުކުތް ވަގުތު އޭރިއާ ތެރޭގައި ހުރި އަމީން ވަނީ އެ ބޯޅަ ގޯލަށް ވައްދާލާފަ އެވެ.
ސިފައިން ޓީމަށް ލީޑު ނަގައިދޭން އަހުމަދު ފަޒާލް އަށް ރަނގަޅު ފުރުސަތެއް ލިބުނެވެ. ހުޅުމާލެ ޓީމްގެ ޑިފެންޑަރު އަލީ ރިޒާ އަށް ހެދުނު ގޯހެއްގެ ފައިދާ ނަގައި ބޯޅަ ހިފައިން އޭރިއާ ތެރެއަށް ވަދެ ފޮނުވާލި ހަމަލާ ދިޔައީ އަރިމަތީ ދަނޑި ކައިރިން ބޭރަށެވެ. އޭގެ ފަހުން އޭރިއާ ބޭރުން ސިފައިން ޓީމްގެ ފަޔާޒު ފޮނުވާލި ބޯޅަ ކީޕަރު ނާނި ދިފާއުކުރި އިރު، އަމީނަށް ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ ހުރަސް ދަނޑިމަތިން ބޭރަށެވެ.
މި މުބާރާތުގެ ލީގު ބުރުގައި ބާކީ އޮތީ ދެ މެޗެވެ. އެއީ މާދަމާ ހަވީރު ޕޮލިސް ކުލަބާއި ކުލަބު ގްރީން ސްޓްރީޓްސް ވާދަކުރާ މެޗާއި، ބުދަ ދުވަހުގެ ހަވީރު މޯލްޑިވްސް ސޮކަ މޭޓްސް އާއި ކްލަބް އީގަލްސް ވާދަކުރާ މެޗެވެ. ސޮކަ މޭޓްސް އާއި ހުޅުމާލެ ވެޓްރަންސް ވާދަކުރާ މުބާރާތުގެ ފައިނަލު މެޗު ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ހަވީރެވެ. ލީގު ބުރުގައި މި ދެ ޓީމުގެ ކުޅުނު މެޗު ވަނީ 1-1 އިން އެއްވަރުވެފަ އެވެ.
