ރޯމް، އިޓަލީ (އޭޕްރީލް 24) - ފަހު ވަގުތު ޖެހި ގޯލުން ފަހަތުން އަރައި 2-1 އިން ލާޒިއޯ ބަލިކޮށް އޭސީ މިލާނުން މިރޭ އިޓާލިއަން ލީގުގެ އެއް ވަނަ އަށް ޖެހިލައިފި އެވެ.
ލީގުގައި ރޭ ރޯމާ އަތުން މޮޅުވެ، އެންމެ ފަހުގެ ޗެމްޕިއަން އިންޓަ މިލާނުން ވަނީ ލީގުގެ އެއް ވަނަ އަށް އަރައިފަ އެވެ. އެކަމަކު، މިރޭ މިލާނުން މޮޅުވުމުން އެ ޓީމަށް ވަނީ އަލުން އެއް ވަނަ ލިބިފަ އެވެ. މިލާން އެއް ވަނައިގައި އޮތީ 34 މެޗުން 74 ޕޮއިންޓް ހޯދައިގެންނެވެ. ދެ ވަނައިގައި އޮތް އިންޓަ އަށް 33 މެޗުން ލިބިފައިވަނީ 72 ޕޮއިންޓެވެ. މެޗު ހަމަކުރާއިރު، އެއް ވަނަ އަށް އެރުމުގެ ފުރުސަތު އިންޓަ އަށް އެބައޮތެވެ.
ރޯމްގެ މަޝްހޫރު އޮލިމްޕިކް ސްޓޭޑިއަމްގައި މިރޭ ކުޅުނު މެޗު ފަށައިގެން ހަތަރު ވަނަ މިނިޓްގައި ލާޒިއޯގެ ފޯވާޑް ޗީރޯ އިމޯބިލޭ ވަނީ ގޯލެއް ޖަހައި އެ ޓީމަށް ލީޑުނަގައިދީފަ އެވެ. މިއީ ސާގޭ މިލިންކޮވިޗް ސަވިޗް އަރިމަތިން ހުސްކޮށްލާފައި ނެގި ބޯޅައަކުން އޭރިއާތެރެއަށް ވަދެ، އިމޯބިލޭ ޖެހި ގޯލެކެވެ.
ލާޒިއޯގެ ގޯލަށް ފަހު މިލާނުން ކުރިއަށް ޖެހިގެން ކުޅެ، ނަތީޖާ ހަމަހަމަކުރެވޭތޯ ބެލި އެވެ. ފުރަތަމަ ހާފުގައި މިލާނުން ވަނީ ޕެނަލްޓީއެއް ހޯދަން ވެސް އެޕީލްކޮށްފަ އެވެ. އެއީ ލާޒިއޯގެ ލުއިސް އަލްބާޓޯ އަތުގައި ބޯޅަ ޖެހުނު ކަމަށް ބުނެ އެވެ.
ފުރަތަމަ ހާފު ނިމުނުއިރު، ލާޒިއޯ އެއް ގޯލުން ކުރީގައި އޮތުމުން މިލާނުން ދެ ވަނަ ހާފަށް ނުކުތީ އެޓޭކިން ޕްލޭނަކާ އެކު އެވެ. ދެ ވަނަ ހާފްގެ ކުޅުން ފެށިގެން ފަސް މިނިޓް ތެރޭ މިލާނަށް އެއްވަރުކޮށްދިނީ އޮލީވިއޭ ޖިރޫޑް އެވެ. މިއީ މެޗުގެ 50 ވަނަ މިނިޓްގައި ރަފައެލް ލެއާއޯ ގޯލު ކުރިމައްޗަށް ހުރަސްކޮށްލި ބޯޅައެއް ވެއްޓިގެންފައި ގޯލުގެ ކައިރީ ކަނަށް ފޮނުވާލައިގެން ޖިރޫޑް ޖެހި ގޯލެކެެވެ.
އޭރިއާތެރެއިން ލިބުނު ފުރުސަތުގައި ޓޮނާލީ ގޯލުގެ ތެރެއަށް ބޯޅަ ފޮނުވާލުމަށް ފަހު އުފާފާޅުކުރަނީ.
މިލާނުން ވަނީ ފަހު 20 މިނިޓަށް ތިން ބަދަލެއް ގެނެސްފަ އެވެ. ޒްލަޓާން އިބްރަހިމޮވިޗާއި އަންޓޭ ރެބިޗް އަދި ރާޑޭ ކްރުނިޗް ކުޅެން އެރުވި އެވެ.
މެޗުގެ 82 ވަނަ މިނިޓްގައި އިބްރަހިމޮވިޗް ޖެހި ބޯޅައެއް ލާޒިއޯ ކުޅުންތެރިއަކު ގައިގައި ޖެހިފައި ދިޔައީ ބޭރަށެވެ. މިލާން މޮޅުވި ގޯލު ޖެހީ އިތުރު ވަގުތުގެ ދެ ވަނަ މިނިޓްގަ އެެވެ. އޭރިއާތެރެއިން އިބްރަހިމޮވިޗް ބޮލުން ޖައްސާލި ބޯޅަ ކޮންޓްރޯލް ކޮށްލުމަށް ފަހު ސަންޑްރޯ ޓޮނާލީ ފޮނުވާލި ބޯޅަ ގޯލަށް ވަނީ ލާޒިއޯ ކީޕަރު ތޯމަސް ސްޓްރަކޯސާ އަތުގައި ޖެހިފަ އެވެ.
ލީގުގެ ތިން ވަަނައިގައި އޮތް ނަޕޯލީ ވަނީ މިރޭ އެމްޕޮލީ އަތުން 3-2 އިން ބަލިވެފަ އެވެ. ނަޕޯލީން ދެ ގޯލުގެ ލީޑެއް ނަގާފައިވަނިކޮށް އެމްޕޮލީން ނަތީޖާ އަނބުރާލީ މެޗުގެ ފަހު ކޮޅުގައި ހަތް މިނިޓް ތެރޭ ތިން ގޯލު ޖަހައިގެންނެވެ. މިއާ އެކު ލީގުގެ ރޭހުގައި ނަޕޯލީ އަށް ވަނީ ބޮޑު ވެއްޓުމެއް ކުރިމަތިވެފަ އެވެ.
ނަޕޯލީ ތިން ވަނައިގައި އޮތީ 34 މެޗުން 67 ޕޮއިންޓާ އެކު އެވެ. ހަތަރު ވަނައިގައި އޮތް ޔުވެންޓަސް އަށް ވަނީ 33 މެޗުން 63 ޕޮއިންޓް ލިބިފަ އެވެ. ފަސް ވަނައިގައި އޮތް ރޯމާ އަށް 34 މެޗުން 58 ޕޮއިންޓް ލިބިފައިވާއިރު، ހަ ވަނައިގައި އޮތް ފިއޮރެންޓީނާ އާއި ހަތް ވަނައިގައި އޮތް ލާޒިއޯ އަށް ލިބިފައިވަނީ 56 ޕޮއިންޓެވެ. ފިއޮރެންޓީނާ 33 މެޗު ކުޅުނުއިރު، ލާޒިއޯ ވަނީ 34 މެޗު ކުޅެފަ އެވެ.
