އުރީދޫ ދިވެހި ޕްރިމިއާ ލީގުގައި މިރޭ ސުޕަ ޔުނައިޓެޑް ސްޕޯޓްސް (ސަސް) 2-1 އިން ބަލިކޮށް، ކްލަބް އީގަލްސް އިން ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާ ދެމެދު ޕޮއިންޓުގެ ފަރަގުކުޑަކޮށްފި އެވެ.
މިރޭގެ މެޗަށް ފަހު ލީގު 10 ދުވަހުގެ ބްރޭކެއް ނަގާއިރު، މާޒިޔާ އެއް ވަނައިގައި އޮތީ 10 މެޗުން 27 ޕޮއިންޓާ އެކު އެވެ. ދެ ވަނައިގައި އޮތް އީގަލްސް އަށް 10 މެޗުން 25 ޕޮއިންޓް ލިބިފައިވާއިރު، ޔުނައިޓެޑް ވިކްޓްރީ (ޔޫވީ) ތިން ވަނައިގައި އޮތީ 10 މެޗުން 14 ޕޮއިންޓް ހޯދައިގެންނެވެ. ހަތަރު ވަނައިގައި އޮތް ކްލަބް ވެލެންސިއާ އަށް 10 މެޗުން ވަނީ 13 ޕޮއިންޓް ލިބިފަ އެވެ.
ފަސް ވަނައިގައި އޮތް ސަސް އާއި ހަ ވަނައިގައި އޮތް ޓީސީ ސްޕޯޓްސް ކްލަބް އަދި ހަތް ވަނައިގައި އޮތް ކްލަބް ގްރީން ސްޓްރީޓްސް އަށް ވަނީ 10 މެޗުން 11 ޕޮއިންޓް ލިބިފަ އެވެ. އެންމެ ފުލުގައި އޮތީ ލީގުގައި މޮޅެއް ނުލިބި އޮތް ހަމައެކަނި ޓީމު ދަ ގްރާންޑޭ އެވެ. ދަ ގްރާންޑޭ އަށް ވަނީ 10 މެޗުން ޕޮއިންޓެއް ލިބިފަ އެވެ.
މެޗު ފަށައިގެން ފަސް ވަނަ މިނިޓްގައި އީގަލްސްގެ މިޑްފީލްޑަރު އަބްދުﷲ ސަމީހު މޫސާ (ސަމިއްޓެ) އޭރިއާބޭރުން ޖެހި ބޯޅަ ސަސްގެ ކީޕަރު މުހައްމަދު ޝަފީއު (ޗެކް) ވަނީ މަތަކޮށްފަ އެވެ. އޭގެ ތިން މިނިޓް ފަހުން ސަސްގެ ފުރަތަމަ ހަމަލާ ފޮނުވާލީ އަލީ ނަސޫހު ރަޝީދު (ޕިލާ) އެވެ. އޭނާ ޖެހި ބޯޅަ ގޯލަށް ސީދާނުވެ، އަމާޒުވީ އަރިމަތީ ދާގަނޑަށެވެ.
އީގަލްސް އިން ފުލުފުލުގައި ކުރަމުންދިޔަ އެޓޭކްތަކުގައި ނަތީޖާ އެއް ނުކުތީ މެޗުގެ 20 ވަނަ މިނިޓްގަ އެވެ. އީގަލްސްގެ ޒައިން ޒަފަރު އަރިމަތިން ބޯޅަ ހިފައިގެން ވަދެ، އޭރިއާތެރެއިން އެ ޓީމުގެ އަހުމަދު ހަސަން (އައްމަޑޭ) އަށް ދިން ބޯޅަ އޭނާ ވަނީ ގޯލުގެ މަތީ ކަނަށް ފޮނުވާލައި، އެ ޓީމަށް ލީޑުނަގައިދީފަ އެވެ.
މެޗުގެ 24 މިނިޓްގައި އީގަލްސްގެ އިމްރާން ނަޝީދު (އިންމަ) ގޯލެއް ޖެހި ނަމަވެސް ވަނީ އޮފްސައިޑް ކަމަށް ނިންމައިފަ އެވެ. އޭގެ ފަހުން ވެސް ލީޑުފުޅާކުރަން އީގަލްސް އިން ރަނގަޅު ދެ ފުރުސަތު ނަގާލި އެވެ. އެ ގޮތުން ޒައިން އަރިމަތިން ނެގި ހުރަހެއް ދިފާއުކުރަން އެރި ކީޕަރު ޝަފީއު އަތުގައި ޖެހިފައި ބޯޅަ ލިބުނީ އީގަލްސްގެ ހަސަން ރާއިފް އަހުމަދު (ހަންނަ) އަށެވެ. އޭނާ ގޯލަށް ފޮނުވާލުން ލަސްކޮށްލުމުން ފުރުސަތު ގެއްލުނީ އެވެ. އަދި އޭރިއާތެރެއިން ސަމިއްޓެ ގޯލުގެ ދުރު ކަނަށް ފޮނުވާލަން ޖެހި ބޯޅަ ކީޕަރު ޝަފީއު ވަނީ ފައިން މަތަކޮށްފަ އެވެ.
އީގަލްސް އިން ފަހަތަށް ނުވިސްނައި ހުރި ވަގުތު ބަލާފައި، ސަސް އިން ކުރި އެޓޭކްގެ ބޭނުންހިފި އެވެ. ފުރަތަމަ ހާފުގެ އިތުރު ވަގުތުގައި ސަސް އަށް އެއްވަރުކޮށްދިން ގޯލު ޖެހީ ޕިލާ އެވެ. ޕިލާ ހުސްކޮށް ބޯޅަ ހިފައިގެން އޭރިއާތެެރެއަށް ވަދެ، އީގަލްސްގެ ކީޕަރު ހަސަން އަލީފް އިބްރާހިމް ކައިިރިން ގޯލުގެ ތެރެއަށް ބޯޅަ ފޮނުވާލި އެވެ.
ދެ ވަނަ ހާފުގައި އީގަލްސް އިން ކުރިއަށް ޖެހިގެން ކުޅެ 11 މިނިޓް ތެރޭ އަލުން ލީޑުނެގި އެވެ. މެޗުގެ މެޗުގެ 56 ވަނަ މިނިޓްގައި އޭރިއާތެރެއިން އިންމަ އަށް ލިބުނު ފުރުސަތުން އޭނާ ވަނީ ގޯލުގެ ދުރު ކަނަށް އަމާޒުކޮށްލައިފަ އެވެ.
ލީޑުފުޅާކުރަން އީގަލްސް އަށް ގިނަ ފުރުސަތުތަކެއް ލިބުނެވެ. އެ ގޮތުން ހަންނަ ފޮނުވާލި ދެ ބޯޅައެއް ގޯލާ ސީދާނުވެ ދިޔައިރު، އައްމަޑޭ ޖެހި ބޯޅައެއް ވަނީ ސަސްގެ ކީޕަރު ޝަފީއު ހުއްޓުވައިފަ އެވެ. އަދި ކޯނަރެއްގައި ގޯލު ކުރިމައްޗަށް ހުރަސްވި ބޯޅައަކުން އިންމަ ބޮލުން ޖެހި ބޯޅަ ދިޔައީ ހުރަަސްދަނޑިމަތިންނެވެ.
