މައިލޯ އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މެޗުގައި ފޯރިގަދަ ކުޅުމަކަށް ފަހު ދަ ގްރާންޑޭ ސްޕޯޓްސް ކްލަބް 3-2 އިން ބަލިކޮށް މޯލްޑިވްސް ސޮކަ މޭޓްސް ފައިނަލުގެ ދެ ވަނަ ޖާގަ ހޯދައިފި އެވެ.
މިއަދުގެ މެޗުން މޮޅުވެގެން ދަ ގްރާންޑޭ އަށް ވެސް ފައިނަލަށް ދެވެން އޮތެވެ. އެކަމަކު، ސޮކަ މޭޓްސް ވަނީ ދަ ގްރާންޑޭ ބަލިކޮށް ބާކީ މެޗެއް ނުކުޅެ އޮއްވައި ފައިނަލުން ފުރުސަތު ހޯދައިފަ އެވެ. އަންނަ ހޮނިހިރު ދުވަހު ކުޅޭ ފައިނަލުގައި ސޮކަ މޭޓްސް ނުކުންނާނީ ހުޅުމާލެ ވެޓެރަންސް ކްލަބާ ދެކޮޅަށެވެ. މި ދެ ޓީމުން ވެސް ފައިނަލަށް ދަތުރުކުރީ މިހާތަނަށް މެޗަކުން ބަލިނުވެ އެވެ.
ހަތް ޓީމު ވާދަކުރާ ލީގު ބުރުގެ އެއް ވަނައިގައި ހުޅުމާލެ ވެޓެރަންސް އޮތީ ފަސް މެޗުން 13 ޕޮއިންޓާ އެކު އެވެ. ދެ ވަނައިގައި އޮތް ސޮކަ މޭޓްސް އަށް ވަނީ ފަސް މެޗުން 11 ޕޮއިންޓް ލިބިފަ އެވެ. ތިން ވަަނައިގައި އޮތް ދަ ގްރާންޑޭ އަށް ލީގު ބުރުގެ ހަ މެޗު ހަމަވެފައިވާއިރު، އެ ޓީމަށް ލިބުނީ 10 ޕޮއިންޓެވެ.
ޓާފް އެއް ނަމްބަރު ދަނޑުގައި މިއަދު ހަވީރު ކުޅުނު މެޗު ފަށައިގެން 13 ވަނަ މިނިޓްގައި ސޮކަ މޭޓްސް އަށް ލީޑުނަގައިދިނީ ޓީމުގެ ކެޕްޓަން އައްސަދު އަބްދުލް ގަނީ އެވެ. މިއީ ކޯނަރަކުން އަބްދުލްވާހިދު މުހައްމަދު (ވާޑޭ) ނެގި ކޯނަރަކުން އައްސަދު ބޮލުން ޖެހި ގޯލެކެވެ. ބަދަލު ކުޅުންތެރިއެއްގެ ގޮތުގައި ކުޅެން އަރައި، ސޮކަ މޭޓްސްގެ އަހުމަދު އަފްރާދު (އަފޭ) ވަނީ މެޗުގެ 25 ވަނަ މިނިޓްގައި ސޮކަ މޭޓްސް އަށް ލީޑުފުޅާކޮށްދީފަ އެވެ. އޭރިއާތެރެއިން ހުސްވި ޖާގައަކުން އަފޭ ފޮނުވާލި ބޯޅަ އަމާޒުވީ ގޯލުގެ ދުުރު ކަނަށެވެ.
ދަ ގްރާންޑޭ އިން ދެ ވަނަ ހާފުގައި ތަފާތު ރޫހެއްގައި ކުޅެ، 12 މިނިޓް ތެރޭ ނަތީޖާ ހަމަހަމަކުރި އެވެ. އެ ޓީމުގެ ފުރަތަމަ ގޯލު 39 ވަނަ މިނިޓްގައި ޖެހި ހަސަން ޝަރީފް އެވެ. އޭރިއާތެރެއިން ޝަރީފް ޖެހި ބޯޅަ ގޯލަށް ވަނީ ސޮކަ މޭޓްސްގެ ކީޕަރު ހުސެއިން ހަބީބް އަތުގައި ޖެހިފަ އެވެ. އޭގެ ތިން މިނިޓް ފަހުން ޝަރީފް ހުސްކޮށްލާފައި ދިން ބޯޅައަކުން ގޯލެއް ޖަހައި، އަހުމަދު ސާއިގް ވަނީ ދަ ގްރާންޑޭ އަށް އެއްވަރުކޮށްދީފަ އެވެ. ދަ ގްރާންޑޭ އަށް ލީޑުނަގައިދޭން އެ ޓީމުގެ އިބްރާހިމް ޒައީމް ހުސްކޮށްލާފައި ގޯލު ކުރިމަތީގައި ހުރި ޝުއައިބު ޒާހިރަށް ދިނުމުން އޭނާ އަށް ރަނގަޅަށް ގޯލަށް ފޮނުވައިނުލެވުނެވެ.
ސޮކަ މޭޓްސް އަށް ޕްރެޝަރު ކަނޑުވާލައިދީ މެޗުން މޮޅުކޮށްދިން ގޯލު ޖެހީ އަހުމަދު މަމްދޫހު އެވެ. މެޗުގެ 52 ވަނަ މިނިޓްގައި ސޮކަ މޭޓްސްގެ އަބްދުﷲ ވަހީދު (ބިންމާ އައްލޯ) ނަގައިިދިން ބޯޅައަކުން އޭރިއާތެެރޭގައި ހުސްކޮށް ހުރެފައި، މަމްދޫހު ޖެހި ބޯޅަ ވަނީ ގޯލުގެ ކަނަށެެވެ.
ލީގު ބުރުގައި ބާކީ ނުކުޅެ އޮތީ ތިން މެޗެެވެ. މާދަމާ ހަވީރު ކުޅޭ މެޗުގައި ސިފައިން ކުޅޭނީ ހުޅުމާލެ ވެެޓެރަންސްއާ އެވެ. މެޗު ފަށާނީ 16:30 ގަ އެވެ.
