މިލާން (އޭޕްރީލް 23) - އިޓާލިއަން ލީގުގައި މިރޭ ރޯމާ އަތުން 3-1 އިން މޮޅުވެ، އެންމެ ފަހުގެ ޗެމްޕިއަން އިންޓަ މިލާނުން ލީގުގެ އެއް ވަނަ އަށް ޖެހިލައިފި އެވެ.
މި މެޗަށް ރޯމާ އިން ކުރިމަތިލީ ބަލިނުވެ 12 މެޗު ހަމަކޮށް ރަނގަޅު ފޯމެއް ދެމެހެއްޓުމަށް ފަހު އެވެ. އެކަމަކު، އިންޓަ އިން ރަނގަޅު ރޫހެއްގައި ކުޅެ، އެއް ވަނަ އަށް އަރަން ލިބިފައި އޮތް ފުރުސަތުގެ ބޭނުންހިފީ އެވެ. އެއް ވަނައިގައި އޮތް އިންޓަ އަށް 33 މެޗުން 72 ޕޮއިންޓް ލިބިފައިވާއިރު، އޭސީ މިލާން ދެ ވަނައިގައި އޮތީ 33 މެޗުން 71 ޕޮއިންޓާ އެކު އެވެ. މިލާނުން މާދަމާރޭ ލާޒިއޯ ބަލިކޮށްގެން އަލުން އެއް ވަނަ އަށް އެރޭނެ އެވެ.
އިންޓަ ދަނޑުގައި މިރޭ ކުޅުނު މެޗު ފަށައިގެން އެ ޓީމުން ފުރަތަމަ ހަަމަލާ ފޮނުވާލީ އޭރިއާބޭރުން ހަކަން ޗަނޮނޮގްލޫ އެވެ. އޭނާ ޖެހި ބޯޅަ ރޯމާގެ ކީޕަރު ރުއީ ޕެޓްރީޝިއޯ ވަނީ މަތަކޮށްފަ އެވެ. ރޯމާ އަށް ލީޑުނަގައިދޭން ހިލޭ ޖެހުމަކުން ޖިއަންލޫކާ މަންޗީނީ ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ.
މެޗުގެ 30 ވަނަ މިނިޓްގައި އިންޓަ އިން ލީޑުނެގީ ނެދަލެންޑްސްގެ ފުލްބެކް، ޑެންޒެލް ޑަމްފްރީސް ޖެހި ގޯލުންނެވެ. މިއީ ޗަނޮނޮގްލޫ ދިން ބޯޅައެއް ހިފައިގެން އޭރިއާތެރެއަށް ވަދެ، ޑަމްފްރީސް ތިރިތިރިން ގޯލުގެ ތެރެއަށް ބޯޅަ ފޮނުވާލައިގެން ޖެހި ގޯލެކެވެ. މެޗުގެ 40 ވަނަ މިނިޓްގައި އޭރިއާތެރެއިން ގޯލުގެ މަތީ ކަނަށް ބޯޅަ ފޮނުވާލައިގެން މާސެލޯ ބްރޮޒޮވިޗް ވަނީ އިންޓަ އަށް ލީޑުފުޅާކޮށްދީފަ އެވެ. ބްރޮޒޮވިޗް ވަނީ މިދިޔަ ހަފްތާގައި އިންޓަ ކުޅުނު މެޗުގައި ސްޕެޒިއާ ކޮޅަށް ވެސް ގޯލު ޖަހައިފަ އެވެ. އެ ގޯލަކީ އަހަރެއްހާ ދުވަސް ފަހުން ލީގުގައި ބްރޮޒޮވިޗް ޖެހި ފުރަތަމަ ގޯލެވެ.
ދެ ވަނަ ހާފްގެ ކުޅުން ފެށިގެން ހަތް ވަަނަ މިނިޓްގައި އިންޓަ އިން ތިން ވަނަ ގޯލެއް ޖެހި އެވެ. މިއީ މެޗުގެ 52 ވަނަ މިނިޓްގައި ކޯނަރަކުން ޗަނޮނޮގްލޫ ނެގި ބޯޅައަކުން ލަޓާރޯ މާޓީނޭޒް ބޮލުން ޖެހި ގޯލެކެވެ. ރޯމާ އިން މެޗުގައި ޖެހި ހަމައެކަނި ގޯލު ކާމިޔާބުކުރީ މެޗުގެ 85 ވަނަ މިނިޓްގަ އެވެ. މިއީ އެލްޑޯ ޝޮމުރޯޑޯވް ދިން ބޯޅަައަކުން އޭރިއާތެރެއިން ހެންރިކް މިކިތާރްޔަން ޖެހި ގޯލެކެވެ.
ޗެމްޕިއަންސް ލީގަށް ކޮލިފައިވާން މަސައްކަތް ކުރަމުން އަންނަ ރޯމާ އޮތީ ލީގުގެ ފަސް ވަނައިގަ އެވެ. ހޯސޭ މޮރީނިއޯގެ ކޯޗުކަމުގައި ކުޅެމުން އަންނަ ރޯމާ އަށް 34 މެޗުން ވަނީ 58 ޕޮއިންޓް ލިބިފަ އެވެ. ހަތަރު ވަނައިގައި އޮތް ޔުވެންޓަސް އަށް ވަނީ 33 މެޗުން 63 ޕޮއިންޓް ލިބިފަ އެވެ.
ހަ ވަނައިގައި އޮތް ފިއޮރެންޓީނާ އާއި ހަތް ވަަނައިގައި އޮތް ލާޒިއޯ އަށް ވަނީ 56 ޕޮއިންޓް ލިބިފަ އެވެ. މެޗު ހަމަކުރާއިރު، މި ދެ ޓީމަށް ވެސް ރޯމާ އަށް ވުރެ ކުރިއަށް އެރުމުގެ ފުރުސަތު އެބައޮތެވެ. ފިއޮރެންޓީނާ އިން 32 މެޗު ކުޅެފައިވާއިރު، ލާޒިއޯ އިން ވަނީ 33 މެޗު ކުޅެފަ އެވެ.
