މައިލޯ އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މެޗުގައި ކްލަބް އީގަލްސް ވެޓެރަންސް 2-0 އިން ބަލިކޮށް ކްލަބް ގްރީން ސްޓްރީޓްސް އިން ފުރަތަމަ މޮޅު ހޯދައިފި އެވެ.
ގްރީން ސްޓްރީޓްސް އިން މި ފަހަރުގެ މުބާރާތުގައި ފުރަތަމަ ކުޅުނު ހަތަރު މެޗުގެ ތެރެއިން، ފުރަތަމަ ތިން މެޗުން ބަލިވިއިރު، އެންމެ ފަހުން ކުޅުނު މެޗުން ވީ އެއްވަރެވެ. ފުރަތަމަ މޮޅާ އެކު ގްރީން ސްޓްރީޓްސް ލީގު ބުރުގެ ހަ ވަނައިގައި އޮތީ ހަތަރު ޕޮއިންޓް ހޯދައިގެންނެވެ. އީގަލްސް އޮތީ ލީގުގެ ފަސް ވަނައިގައި ފަސް ޕޮއިންޓް ހޯދައިގެންނެވެ.
ޓާފް އެއް ނަމްބަރު ދަނޑުގައި މިއަދު ހަވީރު ކުޅުނު މެޗުގެ 11 ވަނަ މިނިޓްގައި ގްރީން ސްޓްރީޓްސް އިން ލީޑުނެގި އެވެ. އަރިމަތިން ގްރީން ސްޓްރީޓްސްގެ ކުޅުންތެރިއަކު ގޯލު ކުރިމައްޗަށް ނެގި ހުރަހަކުން، މުހައްމަރު އަރީފް ޖެހި ބޯޅަ ގޯލަށް ވަނީ ދަނޑީގައި ޖެހިފަ އެވެ.
ގްރީން ސްޓްރީޓްސް އާއީ އީގަލްސް ކުޅުނު މެޗުގެ ތެރެއިން.-- ފޮޓޯ: މުހައްމަދު ޝާބިން/ އަދަދު
ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ އީގަލްސް ކީޕަރު ހެދި ގޯހެއްގެ ފައިދާނަގައި، ގްރީން ސްޓްރީޓްސްގެ ދެ ވަނަ ގޯލު ޖެހީ އަހުމަދު ޝިޔާން އެވެ. އޭނާ މި ގޯލު ޖެހީ އޭރިއާބޭރުން ފޮނުވާލި ޝޮޓަކުންނެވެ.
ހަތް ޓީމުގެ މެދުގައި ވެޓްރަންސް މުބާރާތުގައި މި ފަހަރު ކުޅޭ ލީގު ބުރުގައި ބާކީ ނުކުޅެ އޮތީ ހަތަރު މެޗެވެ. ފައިނަލުގެ ދެ ޖާގައިގެ ތެެރެއިން ފުރަތަމަ ޖާގަ ޔަގީންކޮށްފައިވަނީ ހުޅުމާލެ ވެޓެރަންސް އިންނެވެ. އެ ޓީމު އެއް ވަނައިގައި އޮތީ ފަސް މެޗުން 13 ޕޮއިންޓް ހޯދައިގެންނެވެ.
ދެ ވަނަ ޖާގަ އަށް ވާދަކުރަނީ ދެ ވަނައިގައި އޮތް ދަ ގްރާންޑޭ ސްޕޯޓްސް ކްލަބާއި ތިން ވަނައިގައި އޮތް މޯލްޑިވްސް ސޮކަ މޭޓްސް އެވެ. ދަ ގްރާންޑޭ އަށް ފަސް މެޗުން 10 ޕޮއިންޓް ލިބިފައިވާއިރު، ތިން ވަނައިގައި އޮތް ސޮކަ މޭޓްސް އަށް ހަަތަރު މެޗުން ވަނީ އަށް ޕޮއިންޓް ލިބިފަ އެވެ.
މާދަމާ ހަވީރު 16:30 ގައި ކުޅޭ މެޗުގައި ދަ ގްރާންޑޭ ކުޅޭނީ ސޮކަ މޭޓްސްއާ ދެކޮޅަށެވެ.
