ލަންޑަން (އޭޕްރީލް 23) - މެންޗެސްޓާ ސިޓީގެ ބްރެޒިލް ފޯވާޑް ގަބްރިއެލް ޖީސޫސް އަށް އާސެނަލުން ފާރަލަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
އިނގިރޭސި ނޫހެއް ކަމަށްވާ ދި އެތުލެޓިކް އިން ރިޕޯޓްކުރާ ގޮތުގައި އުމުރުން 25 އަހަރުގެ ޖީސޫސް ގަންނަން އާސެނަލްގެ ޗީފް ޑިރެކްޓަރު އޭޑޫ އަންނަނީ މަސައްކަތްތަކެއް ކުރަމުންނެވެ. އަދި ސިޓީއާ އެކު ރަސްމީކޮށް މި ސީޒަނަށް ފަހު ޖީސޫސްގެ ޑީލާ ގުޅޭގޮތުން މަޝްވަރާކުރާނެ އެވެ. މިއީ އާސެނަލްގެ ކޯޗު މިކޭލް އާޓެޓާގެ އެދުމުގެ މަތިން އާސެނަލުން ފުރިހަމަ ކުރަން ބޭނުންވާ ޓްރާންސްފާ އެކެވެ.
ޖީސޫސް މި ވަގުތު ސިޓީގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. ސިޓީއާ އެކު ޖީސޫސް ހަދާފައިވާ އެއްބަސްވުން އާ ކުރުމުގެ މަޝްވަރާތައް ނުފެށި އޮތީ، މި ވަގުތަށް ޖީސޫސް އެ ގޮތަށް ބޭނުންނުވާތީ ކަމަށް ބްރެޒިލްގެ ނޫސްތަކުން ވަނީ ރިޕޯޓްކޮށްފަ އެވެ. އެއީ ސިޓީގެ ފުރަތަމަ އެގާރައިގައި ކުޅެލަން ލިބޭ މެޗުގެ އަދަދު ފަަހަކަށް އައިސް މަދުވަމުން އަންނާތީ އެވެ.
ޔޫރޯ ސްޕޯޓްސް އިން ރިޕޯޓްކުރާ ގޮތުގައި ސިޓީން ބޮރުޝީއާ ޑޯޓްމަންޑަށް ކުޅޭ ނޯވޭގެ ފޯވާޑް އާލިން ބްރައުޓް ހާލަންޑް ގެންގޮސްފިނަަމަ، ޖީސޫސް ކްލަބް ބަދަލުކުރަން ރަސްމީކޮށް ހުށަހެޅުމުގެ ފުރުސަތު ބޮޑެވެ. އެއީ ފުރަތަމަ އެގާރައިން ކުޅެލަން ލިބޭ ޓީމަކަށް ބަދަލުވުމުގެ ގޮތުންނެވެ. އަދި ވޯލްޑް ކަޕްގައި ކުޅޭ ބްރެޒިލްގެ ސްކޮޑުން ޖާގައެއް ބޭނުންވާތީއާ އެކުގަ އެވެ.
ބްރެޒިލްގެ ޕަލްމެއިރާސް ދޫކޮށް 2016 ވަނަ އަހަރު ސިޓީ އަށް ސޮއިކުރި ޖީސޫސް މި ސީޒަނުގައި މިހާތަނަށް ޕްރިމިއާ ލީގުގައި ފުރަތަމަ އެގާރައިގައި ހިމެނިގެން ކުޅުނީ 16 މެޗުގަ އެވެ. އެ މެޗުތަކުން ޖެހުނީ އެންމެ ތިން ގޯލެވެ.
އާސެނަލުން މިދިޔަ ޖެނުއަރީ މަހު ކޮންޓްރެކްޓް ކެންސަލްކޮށް، އެ ޓީމުގެ އެއް ވަނަ ފޯވާޑް، ޕިއޭ އެމެރިކް އޮބާމަޔަން ބާސެލޯނާ އަށް ދޫކޮށްލިއިރު، އަލެކްސަންޑަ ލަކަޒޭޓް މި ސީޒަނަށް ފަހު އާސެނަލް ދޫކޮށްލުމުގެ ފުރުސަތު އެބައޮތެވެ.
ލަަކަޒޭޓް އާސެނަލްގައި މަޑުކުރުން ބަރޯސާވެފައި އޮތީ އާސެނަލް މި ފަހަރު ލީގުގެ ގަދަ ހަތަރެއްގައި ނިންމުމުގެ މައްޗަށެވެ. އަދި އާސެނަލުން ޖީސޫސް ހޯދަން ބާރު ލިބޭނީ ވެސް ލީގުގެ ގަދަ ހަތަރެއްގައި ނިންމައި، އަންނަ ސީޒަނުގެ ޗެމްޕިއަންސް ލީގަށް ކޮލިފައިވެގެންނެވެ.
ގަދަ ހަތަރެއްގެ ރޭހުގައި އާސެނަލުން މިއަދު މުހިންމު މެޗެއްގައި އަމިއްލަ ދަނޑުގައި މެންޗެސްޓާ ޔުނައިޓެޑާ ދެކޮޅަށް ނުކުންނާނެ އެވެ. މި މެޗުން މޮޅުވެއްޖެނަމަ އާސެނަލަށް ހަތަރު ވަނަ އަށް ޖެހިލެވޭނެ އެވެ. މެޗު ފަށާނީ ރާއްޖެ ގަޑިން 16:30 ގަ އެވެ.
