އަންނަ މަހު 9-11 އަށް މާލޭގައި ކުރިއަށްގެންދާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕަށް ތައްޔާރުވާން ރާއްޖޭގެ ގައުމީ ޓީޓީ ޓީމުން މާލޭގައި ކްރޮއޭޝިއާގެ ދެ ކުޅުންތެރިންނާ އެކު ޓްރެއިނިން މެޗުތަކެއް ކުޅެން ފަށައިފި އެވެ.
މިއީ ދާދި ފަހުން ބޭއްވި މޯލްޑިވްސް ސްޕޯޓްސް އެވޯޑްސް 2022ގެ ހާއްސަ މެހެމާނަކަށް ރާއްޖެ އައި، ޓޭބަލް ޓެނިސްގެ ކުރީގެ ދުނިޔޭގެ ޗެމްޕިއަން ކްރޮއޭޝިއާގެ ޒޯރާން ޕްރިމޯރަކްއާ އެކު ރާއްޖޭގެ ޓޭބަލް ޓެނިސް އެސޯސިއޭޝަން (ޓީޓީއޭއެމް) އިން ކުރި މަޝްވަރާގެ އަލީގައި ހަމަޖެހިގެން ދިޔަ ޓްރެއިނިން ސީރީސެއް ނުވަތަ މެޗުތަކެކެވެ.
މި މަހު 29 ގެ ނިޔަލަށް ކްރޮއޭޝިއާގެ ދެ ކުޅުންތެރިން ރާއްޖޭގެ ކުޅުންތެރިންނާ އެކު ތަމްރީން މެޗުތައް ކުޅޭނީ ސޯޝަލް ސެންޓަރު އެތެރެ ކޯޓުގެ އިތުރުން ހުޅުމާލެ ޓީޓީ ހޯލުގަ އެވެ. މިއީ، ސައުތު އޭޝިއާ މުބާރާތަށް އަމިއްލަ ގައުމުގައި ތިބެގެން ތައްޔާރުވާން ލިބިގެންދިޔަ ރަނގަޅު ފުރުސަތެކެވެ. އަދި މަތީ ފަންތީގެ ކުޅުންތެރިންނާ ދެކޮޅަށް މުބާރާތުގެ ކުރިން ޓްރެއިނިން މެޗުތަކެއް ކުޅެގެން ކުޅުންތެރިންގެ މެޗު ތަޖުރިބާ ވެސް ރަނގަޅުކުރެވޭނެ އެވެ.
ކްރޮއޭޝިއާގެ ކުޅުންތެރިންނާ އެކު ކުރިއަށްދާ ޓްރެއިނިން މެޗުތަކުގެ ތެރެއިން.-- ފޮޓޯ: މުހައްމަދު ޝާބިން/ އަދަދު
ޓީޓީ އެސޯސިއޭޝަނުން ވަނީ މި ފުރުސަތު ފަހިކޮށްދިނީތީވެ، ޒޯރާން އާއި ޔޫތު މިނިސްޓަރު އަހުމަދު މަހުލޫފް އަށް ޝުކުރު އަދާކޮށްފަ އެވެ. އަދި ކުރިމަގުގައި ވެސް ޕާޓްނަރުންގެ ގޮތުގައި މި ފަދަ ކަންކަން ރޭވުމުގެ ވިސްނުން ޓީޓީ އެސޯސިއޭޝަނުން ގެންގުޅެ އެވެ.
ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގެ ލޯގޯ ލޯންޗް ކުރުމަށް ބޭއްވި އިވެންޓްގައި ވާހަކަ ދައްކަވަމުން ޓީޓީ އެސޯސިއޭޝަންގެ ރައީސް އަލީ ރަޝީދު (އައްޔަ) ވިދާޅުވީ ރާއްޖޭގައި އަންނަ މަހު ބާއްވާ ޓީޓީ މުބާރާތަށް ސަޕޯޓަރުންގެ އެހީ ބޭނުންވާ ކަމަށާއި އަމިއްލަ ފަސްގަނޑުގައި ކުޅެ ކާމިޔާބީ ހޯދަން ލިބޭނެ ހިތްވަރަކީ ސަޕޯޓަރުން ކަމަށެވެ.
މި މުބާރާތުގައި ރާއްޖޭގެ އިތުރުން އިންޑިއާ އާއި ސްރީ ލަންކާ އާއި ނޭޕާލާއި ބޫޓާނާއި ބަންގްލަދޭޝް އާއި ޕާކިސްތާން ބައިވެރިވެ އެވެ. މި މުބާރާތަކީ ގައުމުތަކުގެ ޓޭބަލް ޓެނިސްގެ މުސްތަގުބަލު ބިނާކުރަން އިސް ރޯލެއް އަދާކުރާ މުބާރާތެކެވެ.
