ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ފިނޭންޝިއަލް ކޮންޓްރޯލަރުގެ މަގާމަށް އިބްރާހިމް މާއިޒް ހަމަޖައްސައިފި އެވެ.
ކްރިކެޓް ބޯޑުގެ ފިނޭންޝިއަލް ކޮންޓްރޯލެއް ނެގުމަށް އެ އެސޯސިއޭޝަނުން ފުރަތަމަ ވަނީ ޝައުގުވެރިވާ ފަރާތްތަކަށް އާންމުކޮށް އިއުލާނެއްކޮށްފަ އެވެ.
އެ ގޮތުން ގިނަ ފަރާތްތަކަކުން ފިނޭންޝިއަލް ކޮންޓްރޯލަރުގެ މަގާމަށް ކުރިމަތިލުމުން، ކްރިކެޓް ބޯޑުން ވަނީ އިންޓަވިއުތަކެއް ކުރިއަށް ގެންގޮސްފަ އެވެ. އެ އަށް ފަހު، ކޮލިފިކޭޝަނާއި ތަޖުރިބާ އަށް ބެލުމަށް ފަހު މާއިޒް އެ މަގާމަށް އައްޔަނުކުރަން ކްރިކެޓް ބޯޑުން ނިންމީ އެވެ.
ކްރިކެޓް ބޯޑުގެ އިސް ވެރިންނާއި ފިނޭންޝިއަލް ކޮންޓްރޯލަރަކަށް ހަމަޖެއްސި މާއިޒް ފޮޓޯ އަކަށް ހުއްޓިލައިގެން: (ކ.ވ) ކްރިކެޓް ބޯޑްގެ ނައިބު ރައީސް ދޮނާ، ބޯޑުގެ ރައީސް ފައިސަލް، އަލަށް ހަމަޖެއްސި ފިނޭންޝިއަލް ކޮންޓްރޯލަރު މާއިޒް އަދި ޖެނެރަލް ސެކްރެޓަރީ މުނާޒް.-- ފޮޓޯ: ކްރިކެޓް ބޯޑް އޮފް މޯލްޑިވްސް
ކްރިކެޓް ބޯޑުން ބުނީ މާއިޒް އެ މަގާމަށް ނެގުމުގައި ބެލީ ދާއިރާއާ ބެހޭ ތައުލީމު ހާސިލްކޮށްފައިވާ މިންވަރާއި މަސައްކަތާ ގުޅޭ ގޮތުން ލިބިފައިވާ ތަޖުރިބާ އަށް ކަމަށެވެ. އެ ގޮތުން މާއިޒްގެ ޕްރޮފައިލަށް ބަަލާއިރު، އޭނާ އަކީ ފާހަގަކޮށްލެވޭ ދާއިރާތަކުގައި ފިނޭންޝިއަލް ރަނގަޅު މަސައްކަތްކޮށްފައިވާ ފަރާތެއް ކަމަށް ކްރިކެޓް ބޯޑުން ވަނީ ބުނެފަ އެވެ.
އަދި ކްރިކެޓް ބޯޑު ހިންގުމުގައި މިހާރު އޮތް ލީޑަޝިޕާ ގުޅިގެން ބޭނުންވާ މިސްރާބަށް މާއިޒާ އެކު ކުރިއަށް ދެވޭނެ ކަމުގެ ޔަގީން އެ ބޯޑަށް އެބައޮތް ކަމަށް ވެސް ވަނީ ބުނެފަ އެވެ.
މި ވަގުތު އޮތް ކްރިކެޓް ބޯޑްގެ ލީޑަޝިޕް މަގާމުގެ ޒިންމާތަކާ ހަވާލުވީ މީގެ ދޮޅު އަހަރެއްހާ ދުވަސް ކުރިން އޮތް އެ އެސޯސިއޭޝަންގެ އިންތިހާބް ކާމިޔާބުކުރުމަށް ފަހު އެވެ.
ކްރިކެޓް ބޯޑްގެ ރައީސް މުހައްމަދު ފައިސަލްގެ ލީޑަޝިޕުން ވަނީ ކުރު ރާސްތާ ޓާގެޓްތަކެއްގެ އިތުރުން ދުރު ރާސްތާ ޕްލޭނެއް އެކުލަވާލައި، މިހާތަނަށް ވެސް އެސޯސިއޭޝަންގެ ހިންގުމުގެ ކަންކަމަށް މުހިންމު ބަދަލުތަކެއް ގެނެސްފަ އެވެ. އެ ގޮތުން ކްރިކެޓް ބޯޑުގެ އެންމެ އިސް އެއް މަސައްކަތަކީ 2030 އާ ހަމައަށް ހާސިލްކުރެވޭނެ ޓާގެޓްތަކެއްގެ މައްޗަށް ހަދާ ޕްލޭނުގެ ކަންކަމެވެ.
