މައިލޯ އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މެޗުގައި ޕޮލިސް ކްލަބް ގޯލެއް ޖަހާފައިވަނިކޮށް ކްލަބް އީގަލްސް އިން ފަހަތުން އަރައި 3-1 އިން މޮޅުވެއްޖެ އެވެ.
އީގަލްސް އިން ފުރަތަމަ ކުޅުނު ދެ މެޗު ނިންމާލީ މޮޅެއް ނުލިބި އެވެ. ހުޅުމާލެ ވެޓެރަންސް އަތުން ތަފާތު ބޮޑުކޮށް ބަލިވިއިރު، ދިވެހި ސިފައިންގެ ކްލަބާ ވަނީ އެއްވަރުވެފަ އެވެ. މިއަދުގެ މެޗުން ހޯދި މޮޅާ އެކު އީގަލްސް އޮތީ ލީގުގެ ހަތަރު ވަނައިގަ އެވެ. އެއީ ތިން މެޗުން ހަތަރު ޕޮއިންޓާ އެކު އެވެ. ޕޮލިސް ކްލަބް ފުލުގައި އޮތީ ހަތަރު މެޗުން ވެސް ބަލިވެގެންނެވެ.
ޓާފް އެއް ނަމްބަރު ދަނޑުގައި މިއަދު ކުޅުނު މެޗުގެ ހަތަރު ގޯލު ވެސް ފެނުނީ ދެ ވަނަ ހާފުގަ އެވެ. މެޗުގައި ފުރަތަމަ ގޯލު ޖެހީ ޕޮލިހުންނެވެ. ދެ ވަނަ ހާފް ކުޅުން ފަށައިގެން ހަތް ވަނަ މިނިޓްގައި ޕޮލިހަށް ލީޑުނަގައިދިނީ މުހައްމަދު ނާޒިމް އެވެ.
އީގަލްސް މޮޅުވީ ފަހު 10 މިނިޓް ތެރޭ ތިން ގޯލު ޖަހައިގެންނެވެ. މެޗުގެ 50 ވަނަ މިނިޓްގައި އީގަލްސް އަށް އެއްވަރުކޮށްދިނީ އިބްރާހިމް އާރިފް އެވެ. އޭނާ ވަނީ ހަތް މިނިޓް ފަހުން އިތުރު ގޯލެއް ޖަހައި އީގަލްސް އަށް ލީޑު ނަގައިދީފަ އެެވެ. އޭގެ ތިން މިނިޓް ފަހުން އަހުމަދު ޝަރީފް ވަނީ އީގަލްސްގެ ތިން ވަނަ ގޯލު ޖަހައިދީފަ އެވެ. މެޗުގެ މޮޅު ކުުޅުންތެރިއަކީ އީގަލްސްގެ އާރިފް އެވެ.
ތިން އަަހަރުގެ މެދުކެނޑުމަކަށް ފަހު އެފްއޭއެމްގެ ވެޓެރަންސް މުބާރާތް މި ފަހަރު ކުރިއަށްދާއިރު، އިންތިޒާމްކުރަނީ ކްލަބް އިވެންޓްސް އިންނެވެ. މުބާރާތުގެ މެއިން ސްޕޮންސަރަކީ ނެސްލޭ ކުންފުނީގެ މައިލޯ އެވެ. ޕާޓްނަރުންނަކީ ސްޕޯޓްސް، އެއްކާފު އަދި އަދަދު އޮންލައިން އެވެ.
މުބާރާތުގައި މާދަމާ ހަވީރު ކުޅޭ މެޗުގައި ދިވެހި ސިފައިންގެ ކްލަބް ބައްދަލުކުރާނީ ކްލަބް ގްރީން ސްޓްރީޓްސްއާ އެެވެ. މެޗު ފަށާނީ 16:30 ގަ އެވެ
