ލަންޑަން (އޭޕްރީލް 16) - އިނގިރޭސި އެފްއޭ ކަޕް ސެމީ ފައިނަލުގައި މެންޗެސްޓާ ސިޓީ 3-2 އިން ބަލިކޮށް ލިވަޕޫލުން މުބާރާތުގެ ފައިނަލުގެ ޖާގަ ހޯދައިފަ އެވެ.
މިއީ މިދިޔަ 10 އަހަރު ތެރޭ ލިވަޕޫލުން އެފްއޭ ކަޕް ފައިނަލްގައި ކުޅޭ ފުރަތަމަ ފަހަރެވެ. އެ ފަހަރު ލިވަޕޫލުން ވަނީ ޗެލްސީ އަތުން 2-1 އިން ބަލިވެފަ އެވެ. މި ފަހަރުގެ ފައިނަލުގައި ލިވަޕޫލާ ކުޅެން ޖެހޭ ޓީމެއް އެނގޭނީ މާދަމާރޭ ޗެލްސީ އާއި ކްރިސްޓަލް ޕެލަސް ކުޅޭ ދެ ވަނަ ސެމީ ފައިނަލް މެޗަށް ފަހު އެވެ. ފައިނަލް ކުޅޭނީ އަންނަ މަހު 14 ވަނަ ދުވަހުގެރޭގަ އެވެ.
ވެމްބްލީ ސްޓޭޑިއަމްގައި މިރޭ ކުޅުނު ސެމީ ފައިނަލަށް ސިޓީން ނުކުތީ ގިނަ ބަދަލުތަކެއް ގެނެސްގެންނެވެ. އެ ގޮތުން ޗެމްޕިއަންސް ލީގު މެޗުގައި އެތުލެޓިކޯ މެޑްރިޑާ އެކު ކުޅެނިކޮށް އަނިޔާވެގެން ބަދަލުކުރި ކައިލް ވޯކާ ސްކޮޑުގައި ވެސް ނުހިމެނޭއިރު، ކެވިން ޑި ބްރޭނާ އިނީ ބެންޗުގަ އެވެ. ފުރަތަމަ އެގާރަ އަށް ބަލާއިރު، ސިޓީން ވަނީ ފެނާންޑީނިއޯ، ނޭތަން އަކޭ އަދި ދެ ވަނަ ގޯލްކީޕަރު ޖެކް ސްޓެފެން އަށް ފުރުސަތު ދީފަ އެވެ.
ފުރަތަމަ މިނިޓުން ފަށައިގެން ލިވަޕޫލްގެ ޕްރެސިން ގޭމް ފެނުުނުއިރު، ސިޓީގެ ޖެކް ގްރީލިޝް އަށް ވަނީ އެ ޓީމަށް ލީޑުނަގައިދޭން ރަނގަޅު ފުރުސަތެއް ލިބިފަ އެވެ. ގްރީލިޝް ޖެހި ބޯޅަ ވަނީ ބްލޮކްވެފަ އެވެ.
ލިވަޕޫލުން ވަނީ ނުވަ ވަނަ މިނިޓްގައި ފްރާންސްގެ ޑިފެންޑަރު އިބްރާހިމާ ކޮނާޓޭ ޖެހި ގޯލުން ލީޑުނަގައިފަ އެވެ. މިއީ އެންޑީ ރޮބަޓްސަން ނެގި ކޯނަރަކުން ކޮނާޓޭ ބޮލުން ޖެހި ގޯލެކެވެ. ޗެމްޕިއަންސް ލީގުގެ ކުއާޓާ ފައިނަލް ދެ ލެގުގައި ވެސް ކޮނާޓޭ ވަނީ ގޯލު ޖަަހައިފަ އެވެ. އެއީ ވެސް ކޯނަރުން ލިބުނު ފުރުސަތުތަކުން ބޮލުންނެވެ. މެޗުގެ 17 ވަނަ މިނިޓްގައި ސިޓީގެ ކީޕަރު ސްޓެފެން ހެދި ބޮޑު ގޯހެއްގެ ފައިދާނަގައި ލިވަޕޫލްގެ ސަޑިއޯ މާނޭ ވަނީ އެ ޓީމަށް ލީޑުފުޅާކޮށްދީފަ އެވެ. ސްޓެފެން ފައި ކައިރީގައި އޮތް ބޯޅައެއް ފޮނުވާލުން ލަސްކޮށްލުމުން މާނޭ ވަނީ ޓެކަލްކޮށްފައި، ގޯލަށް ބޯޅަ ވައްދާލައިފަ އެވެ.
ސިޓީގެ ކީޕަރު ސްޓެފަން (ވ) ހެދި ގޯހެއްގެ ފައިދާނަގައި މާނޭ ގޯލު ޖަހަނީ.-- ފޮޓޯ: އޭއެފްޕީ
ސިޓީގެ އެޓޭކިން ކުުޅުންތެރިންގެ ފަރާތުން ދަށް ކުޅުމެއް ފުރަތަމަ ހާފުގައި ފެނުނުއިރު، ލިވަޕޫލުން ވަނީ ފުރަތަމަ ހާފު ނިމުމުގެ ކުރިން ތިން ވަނަ ގޯލު ޖަހައިފަ އެވެ. މެޗުގެ 45 ވަނަ މިނިޓްގައި ތިއާގޯ އަލްކަންޓާރާގެ މޮޅު ކުޅުމާ އެކު ތަނަވަސްކުރި ފުރުސަތަކުން މާނޭ ވަނީ ވޮލީ އަކުން ގޯލުގެ ކައިރީ ކަނަށް ބޯޅަ ފޮނުވާލައިފަ އެވެ.
ދެ ވަނަ ހާފްގެ ކުޅުން ފަށައިގެން ސިޓީން ވަނީ ދެ މިނިޓް ތެރޭގައި ގޯލެއް ޖަހައި، އުންމީދެއް ހޯދައިފަ އެވެ. މިއީ މެޗުގެ 47 ވަނަ މިނިޓްގައި ގަބްރިއެލް ޖީސޫސް ދިން ބޯޅައަކުން ޖެކް ގްރީލިޝް ޖެހި ގޯލެކެވެ. ސިޓީން ދެ ވަނަ ގޯލެއް ޖަހަންކުރި މަސައްކަތުގައި މެޗުގެ 70 ވަނަ މިނިޓްގައި ރަނުގެ ފުރުސަތެއް ޖީސޫސް އަށް ލިބުނެވެ. މުޅިން ހުސްކޮށް ބޯޅަ ހިފައިގެން އޭރިއާތެރެއަށް ވަދެ، ޖީސޫސް ޖެހި ބޯޅަ ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ.
ލިވަޕޫލަށް ހަތަރު ވަނަ ގޯލެއް ޖަހަން، މެޗުގެ 73 ވަނަ މިނިޓްގައި ހުސް ފުރުސަތެއް ލިބުނެވެ. ސިޓީގެ އޮލެކްސަންޑަ ޒިންޗެންކޯ ފަަހަތަށް ޖައްސާލި ބޯޅައެއް ހޯދައި ލިވަޕޫލްގެ މުހައްމަދު ސަލާހު ޖެހި ބޯޅަ ދިޔައީ އަރިމަތިން ބޭރުންނެވެ. ސިޓީން ދެ ވަނަ ގޯލެއް ޖަަހަން ކުރި މަސައްކަތް ކާމިޔާބުވީ މެޗުގެ އިތުރު ވަގުުތުގެ ގޮތުގައި ދެއްކި ހަތަރު މިނިޓް ތެރެއިން ފުރަތަމަ މިނިޓްގަ އެވެ. މިއީ ބަދަލަކަށް އެރި ރިޔާދު މާރޭޒް ދިން ބޯޅައަކުން ބެނާޑޯ ސިލްވާ ޖެހި ގޯލެކެވެ. ސިޓީ އަށް އެއްވަރުކޮށްދޭން ފެނާންޑީނިއޯ ޖެހި ބޯޅައެއް ހުރަސްދަނޑިމަތިންދިޔައިރު، ސްޓާލިން ފޮނުވާލި ހަމަލާ އަމާޒުވީ ކީޕަރު އެލިސަން އަތަށެވެ.
އެފްއޭ ކަޕުން ކެޓުމާ އެކު ސިޓީން ތިން ތަށި ހޯދަން ކުރި މަސައްކަތަށް ނިމުން އައީ އެވެ. ސިޓީ އަށް ދެން އޮތީ އިނގިރޭސި ޕްރިމިއާ ލީގާއި ޗެމްޕިއަންސް ލީގެވެ. ޗެމްޕިއަންސް ލީގު ސެމީގައި ސިޓީ ކުޅޭނީ ރެއާލް މެޑްރިޑާ އެވެ. ލިވަޕޫލުން މި ސީޒަނުގައި ހަތަރު ތަށި ހޯދަން މަސައްކަތް ކުރަމުން އަންނައިރު، މިހާތަނަށް ވަނީ ޗެލްސީ ބަލިކޮށް ލީގު ކަޕް ކާމިޔާބުކޮށްފަ އެެވެ. ޗެމްޕިއަންސް ލީގުގެ ސެމީ ފައިނަލުގައި ލިވަޕޫލުން ވިޔަރެއާލާ ކުޅޭއިރު، އެފްއޭ ކަޕް ފައިނަލަށް މި ވަނީ ދަތުރުކޮށްފަ އެވެ.
